تأثير المدرسة على أبنائنا كبير، لإنهم بيقضوا فيها معظم وقتهم، عشان كدا اختيار المدرسة المناسبة هو أهم خطوة في طريق طفلك التعليمي، لإنها هتتحكم في حاضره، وهتساعد على تشكيل مستقبله.
ولإن التعليم المتميز مصاريفه كتير؛ كانت المدارس التجريبية هي الحل الأنسب للفئات المتوسطة، لإنها بتجمع بين جودة التعليم، والبيئة الآمنة لطفلك، مع التكاليف المنخفضة نسبيًا.
في المقال دا هنساعدك تتعرف على المدارس التجريبية المميزة، من خلال حصر أبرز مميزاتها، مع تجميع قائمة بـ 10 مدارس تجريبي لغات بالإسكندرية إدارة وسط، فتابع معنا.
لماذا تختار المدارس التجريبية المميزة؟
التعليم الجيد بيبدأ من نوع المدرسة؛ والمدارس الانترناشونال الكويسة مصاريفها غالية، والمدارس المناسبة من ناحية التكلفة غالبًا بتكون مستواها التعليمي أقل!
المعضلة دي بيقع فيها أغلب الآباء والأمهات، ووقتها بيكون الحل الأنسب ليهم هو المدارس التجريبية المميزة، ودا لإنها بتجمع بين مميزات المدارس اللغات من ناحية المستوى التعليمي، وفي نفس الوقت مصاريفها بتكون أقل بكتير، فبتناسب الفئات المتوسطة.
ومن أهم مميزاتها:
- المصاريف بتبدأ من 2000 إلى 4000 جنيه مصري تقريباً لمختلف المراحل، ومتاح تقسيطها.
- القبول فيها بيكون من سن 4 سنوات، مقابل المدارس الحكومية اللي بتقبل من 5 سنوات.
- الاعتماد في طريقة التدريس على الوسائل التكنولوجية والأنشطة التعليمية المختلفة.
- الاهتمام باللغات التانية، زي اللغة الفرنسية أو الألمانية بدايةً من المرحلة الابتدائية.
- احتوائها على ملاعب مفتوحة، وفرق رياضية، وبتهتم بالأعمال اليدوية.
- أعداد الطلاب في الفصل بتتراوح بين 20 إلى 35 طالب كحد أقصى.
- الاهتمام بالطلاب الموهوبين، وبتعمل لهم برامج لتنمية مواهبهم.
- تدريس منهج الرياضيات والعلوم باللغة الإنجليزية.
- توفير منهج خاص بيها بجانب المنهج الوزاري.
- الاهتمام باللغة الإنجليزية من الحضانة.
عشان كدا بتكون حل تعليمي ممتاز للفئة متوسطة الدخل، ودلوقتي هنعرض لك أبرز المدارس التجريبية لغات في إدارة وسط بالإسكندرية، عشان تختار الأقرب ليك، والأنسب لطفلك.
أبرز 10 مدارس تجريبي لغات في إدارة وسط
المدارس التجريبية منتشرة على مستوى إسكندرية، لكن التقديم لازم يتم في حدود النطاق الجغرافي اللي ساكن فيه، فلو أنت من سكان وسط إسكندرية؛ دي قائمة بأبرز 10 مدارس تجريبي لغات تقدر تقدم لأولادك فيها.
1- مدرسة الرصافة التجريبية لغات
مدرسة الرصافة للغات هي واحدة من أبرز مدارس تجريبي لغات بالإسكندرية إدارة وسط، والمدرسة بتقبل المراحل التعليمية زي: رياض الأطفال، والابتدائية، وبتقدملهم تعليم متميز.
عنوان المدرسة: الإسكندرية، محرم بك، 119 شارع مصطفى زيان، أمام صيدلية النهضة.
رقم التليفون: 03/4973119.
2- مدرسة وابور المياه التجريبية لغات
لو عندك أكتر من طفل في مراحل تعليمية مختلفة؛ فمدرسة وابور المياه التجريبية هتكون حل مناسب ليك، ودا لإنها بتدعم جميع المراحل التعليمية: ابتدائي، وإعدادي، وثانوي.
عنوان المدرسة: 9 ش حافظ إبراهيم، باب شرقي، وسط الإسكندرية.
التليفون: 03/4291629.
3- مدرسة الشهيد النقيب محمد درويش لغات (العبور سابقًا)
تالت مدرسة في قائمتنا لمدارس تجريبي لغات بالإسكندرية إدارة وسط؛ هي مدرسة العبور التجريبية، المدرسة بتقدم تعليم متميز، لكنها بتقتصر على المرحلة الابتدائية فقط.
عنوان المدرسة: 21 شارع فؤاد، العطارين، الإسكندرية.
التليفون: 03/3925384.
4- مدرسة بلقيس الابتدائية التجريبية لغات
لو عاوز تأسس طفلك صح؛ فمدرسة بلقيس الابتدائية هتكون حل مثالي، ودا لإنها واحدة من أبرز مدارس تجريبي لغات بالإسكندرية إدارة وسط، لكنها بتدعم مرحلة التعليم الابتدائية فقط، فبالتالي هتضطر تبحث عن مدرسة تانية بدايةً من المرحلة الإعدادية.
عنوان المدرسة: 95 طريق الحرية، محطة الرمل، الإسكندرية.
تليفون: 03/3938637.
5- مدرسة أمير البحر الإعدادية التجريبية لغات
لو مش حابب المدارس المشتركة، وبتفضل إنك تعلم أولادك في مدارس منفصلة؛ فمدرسة أمير البحار هتكون خيار جيد ليك، ودا لإنها مدرسة إعدادي بنين فقط، دا غير إنها واحدة من أفضل مدارس تجريبي لغات بالإسكندرية في إدارة وسط.
يعني هتختار لأولادك تعليم متميز، وفي نفس الوقت منفصل -لو أنت بتفضل دا-.
عنوان المدرسة: 11 شارع مرسى محمود، محرم بك، الإسكندرية.
التليفون: 03/3921966.
6- مدرسة إسكندرية الثانوية بنات التجريبية لغات
لو بتفضل التعليم المنفصل لبناتك؛ فالمدرسة دي هتكون خيار مثالي ليك، عشان تجمع بين التعليم المتميز والمنفصل في نفس الوقت، ودا لإنها بتعد من أفضل 10 مدارس تجريبي لغات بالإسكندرية إدارة وسط، لكنها بتقتصر على المرحلة الثانوية بس.
عنوان المدرسة: شارع شكور، محطة الرمل، إسكندرية.
التليفون: 03/4847662.
7- مدرسة العروة الوثقى التجريبية لغات
مدرسة العروة الوثقى هي واحدة من أفضل مدارس تجريبي لغات بالإسكندرية إدارة وسط، وبتدعم جميع مراحل التعليم: الابتدائي، والإعدادي، والثانوي، لكنها مدرسة منفصلة؛ بنين فقط.
عنوان المدرسة: 48 ش محرم بك، الإسكندرية.
التليفون: 03/3926712 – 03/3921726.
8- مدرسة الجبرتي الابتدائية التجريبية لغات
بتعد مدرسة الجبرتي الابتدائية واحدة من أبرز مدارس تجريبي لغات بالإسكندرية إدارة وسط، لكنها بتقتصر على المرحلة الابتدائية فقط.
عنوان المدرسة: 9 شارع كامل الكيلاني – شارع أرسطو سابقًا – باب شرق، الإسكندرية، أمام القنصلية التركية.
التليفون: 03/3939087.
9- مدرسة ابن أنس الابتدائية التجريبية لغات
تاسع مدرسة في قائمتنا لمدارس تجريبي لغات بالإسكندرية إدارة وسط؛ هي مدرسة ابن أنس، وبتدعم المرحلة الابتدائية بس.
عنوان المدرسة: 1 شارع الناصر محمد، امبروزو، محرم بك، الإسكندرية.
التليفون: 03/4211580.
10- مدرسة اتحاد الجمهوريات الرسمية لغات الابتدائية
لإن المرحلة الابتدائية هي حجر الأساس في تعليم أطفالنا؛ فعاشر مدرسة في قائمتنا من مدارس تجريبي لغات بالإسكندرية إدارة وسط خاصة بالتعليم الابتدائي برضو؛ وهي مدرسة اتحاد الجمهوريات الابتدائية.
عنوان المدرسة: 65 شارع مسجد الحضري، بجوار كلية العلوم، محرم بك، إسكندرية.
التليفون: 03/3938249.
دي كانت أبرز 10 مدارس تجريبي لغات موجودة في إدارة وسط بالإسكندرية، لكن إيه شروط التقديم فيها، ومصاريفها كام؟
شروط التقديم بالمدارس التجريبي لغات
يتساءل معظم الآباء بمجرد وصول أبنائهم 4 سنوات عن مواعيد التقديم للمدارس التجريبية، وهل المدارس دي فيها فصول Kg، وإيه الشروط والأوراق المطلوبة للتقديم.
زي ما قولنا؛ المدارس التجريبية المتميزة هي محاولة من الدولة لجمع مميزات المدارس الخاصة والمدارس الحكومية في كيان واحد، فبالتالي بتبدأ مع طفلك من أول خطوة ليه في رحلته التعليمية، وهي مرحلة الـ Kg، وبتستمر معاه لنهاية المرحلة الثانوية.
وسن التقديم للـ Kg بيبدأ من 4 سنين وبيستمر لحد 6 سنوات إلا يوم في 1 أكتوبر من كل سنة، وبيكون القبول للأطفال الأكبر تبعاً للأماكن المتاحة بالمدارس والإدارات التعليمية، والمرحلة الابتدائية بتبدأ من 6 سنوات زي المدارس الحكومية، وبيكون التقديم إلكترونياً، مع مراعاة الشروط المطلوبة، وهي:
- كتابة الرغبات بمعرفة ولي الأمر وتحت مسؤوليته، وعدم كتابتها عن طريق العاملين بمراكز التنسيق.
- توقيع إقرار من قبل ولي الأمر بعدم التقدم لمدرستين رسميتين للغات.
- تعهد ولي أمر الطالب كتابيًا بمتابعة نتيجة مراحل التنسيق.
- كتابة كل الرغبات (20 رغبة) الموجودة بالاستمارة.
- الالتزام بمحل السكن لولي أمر الطفل.
- ألا يقل سن الطفل عن 4 سنوات.
- اجتياز الطفل للـ Interview.
اقرأ أيضاً: قائمة مدارس تجريبي لغات مميز بالإسكندرية إدارة شرق.
مصاريف المدارس التجريبية لغات
أعلنت وزارة التربية والتعليم، والتعليم الفني عن مصروفات المدارس التجريبية لغات للعام الدراسي 2024 – 2025م لـ:
- مرحلة الـ Kg: إجمالي 1954.67 جنيه.
- المرحلة الابتدائية: 2443.34 جنيه.
- الإعدادي: 2922.01 جنيه.
- الثانوي: بينطبق القرار الصادر على كل مدرسة لوحدها تبعاً للقرار الوزاري رقم 285 لعام 2014م، واللي بينص على زيادة رسوم 5% لخدمة اللغات.
والمصاريف دي غير شاملة لكتاب المستوى الرفيع؛ واللي بيتم دفع حسابه بشكل منفصل، وأتاحت الوزارة دفع المصروفات الدراسية على 3 أقساط.
كمان الوزارة أكدت على دفع المصاريف لحساب صندوق دعم، وتمويل، وإدارة، وتشييد المشروعات التعليمية من خلال المنافذ الإلكترونية المتعاقد معها، فلازم يتم بواحدة من الطرق دي:
- منافذ فوري، مع ضرورة الاحتفاظ بإيصال السداد، وتسليمه للمدرسة.
- مكاتب البريد، عن طريق الرقم القومي للطالب.
الخلاصة
أعظم استثمار في الدنيا هو استثمارك في تعليم أطفالك، فما بالك لو الاستثمار دا كانت تكاليفه قليلة والعائد بتاعه كبير! دا اللي بتحاول توفره المدارس التجريبية لغات.
ما تترددش إنك تخوض التجربة مع أبنائك، وعشان نسهل عليك جمعنالك قائمة بأبرز 10 مدارس تجريبي لغات بالإسكندرية إدارة وسط، واللي هتساعدك تختار منهم الأنسب ليك.
اقرأ أيضًا: أفضل مدارس انترناشونال في الإسكندرية.
أضف تعليق