أفضل مدارس انترناشونال في الإسكندرية بالعناوين والمصاريف

في الوقت الحالي أصبحت المدارس الانترناشونال خيار مثالي لأولياء الأمور؛ عشان يضمنوا لأولادهم تعليم متميز يساعد على رفع مستواهم بطريقة مناسبة لعقولهم، وكمان عشان يكونوا على اطلاع بالمناهج الدولية اللي بتركز بشكل كبير على الفهم بدلًا من نظام الحفظ والتلقين. 

المدارس دي عددها كبير جدًا في الإسكندرية، وعشان تعرف أي مدرسة منهم مناسبة لابنك بتحتاج لوقت طويل من البحث والاستشارات، عشان كدا في المقال دا هنتعرف على أفضل مدارس انترناشونال في الإسكندرية، وعنواينها.

وكمان هنعرض المصاريف المدرسية للمدارس اللي أعلنتها، وهنساعدك تختار أنسب مدرسة لابنك بسهولة. 

أفضل مدارس IGCSE في الإسكندرية

مدارس الـ IGCSE هي مدارس بتمنح شهادة معتمدة دوليًا بعد دراسة مناهج بريطانية مميزة بتتيح للطالب فرصة للتفكير والإبداع، ودا بيتم تحت إشراف المجلس الثقافي البريطاني. 

أفضل مدارس انترناشونال في الإسكندرية بتقدم الشهادة دي: 

مدرسة القومية للغات الرواد – KLS – AlRowad

مدرسة القومية للغات (الرواد) بتندرج تحت قائمة أفضل مدارس انترناشونال في الإسكندرية بتقدم شهادة IGCSE، وشهادة البكالوريا الدولية؛ ودا بسبب اهتمامها بتقديم نموذج تعليمي فريد يساعد على الارتقاء بمستوى الطالب العلمي والخلقي، ويعمل على تطوير مهاراته في جميع مراحل التعليم ما قبل الجامعي. 

أحد الأشخاص اللي بيرشحوا المدرسة بيقول عنها:

“العمل الجاد في صالح الطالب للوصول به إلى درجة عالية من المعرفة، والاعتماد على النفس”. 

المصروفات الدراسية حاليًا للعام الدراسي 2024 – 2025م بتبدأ من 73500 جنيه مصري، لمرحلة البلاي سكول، وبتكون شاملة رسوم الكتب المدرسية. 

العنوان: الطريق الدائري – خلف مطار النزهة – أبيس – الإسكندرية. 

رقم التواصل: 01284442140. 

مدرسة الإسكندرية للغات

مدرسة الإسكندرية الدولية هي مدرسة مختلطة بتفتح أبوابها للطلبة من مرحلة رياض الأطفال إلى المرحلة الثانوية، وبتُعرف بتطبيق مناهج تعليمية مميزة، بتساعد الطالب على استخدام الإمكانيات اللي عنده، وتطوير مهاراته المختلفة بعيدًا عن نظام الحفظ والتلقين، وكمان بتحرص على دعم الطلبة باستمرار، ورفع مستوى كل طالب موجود على حدة. 

المدرسة بتحتوي على مجموعة من المعامل المجهزة بأدوات للفيزياء والكيمياء، عشان تتيح فرصة للطالب يطبق على اللي بيدرسه، ويستوعب المادة العلمية أكتر، بالإضافة إلى توفير مكان مخصص للألعاب الرياضية، وحمام سباحة.

عشان كدا بعض أولياء الأمور بيرشحوها، وبيعتبروها ضمن أفضل مدارس انترناشونال في الإسكندرية. 

العنوان: شارع جميلة بوحريد – السيوف – الإسكندرية. 

رقم التواصل: 03/3311306. 

مدرسة صلاح الدين الدولية

مدرسة صلاح الدين الدولية هي مدرسة مختلطة معتمدة من العديد من الجهات، وبتقدم شهادة الـ IG. 

المدرسة بتقبل الأطفال من سن 3 سنوات و 6 شهور، وبتهتم بتنشئة جيل واعي عنده القدرة على فهم التغييرات اللي بتدور حواليه، والتكيف معاها. 

إحدى أولياء الأمور بترشح المدرسة وبتقول:

“مدرسة صلاح الدين تعاملت بشكل منظم ومحترم وملتزم جدًا، صراحة المدرسة كانت مش سايبة الأولاد خالص، وعملوا مجهود فوق الوصف، فـ دي مدرسة يعتمد عليها في إدارة الأزمات، دا من وجهه نظري مع مجموعة من المدرسين المميزين for year 10 .. شكرًا ميس حنان الجمّال”

وبالتالي فهي ضمن أفضل مدارس انترناشونال في الإسكندرية. 

مصاريف المدرسة للعام الدراسي 2024-2025 م بتبدأ من 97000 جنيه مصري لمرحلة رياض الأطفال، شاملة الكتب الدراسية. 

العنوان: أبيس الرابعة – الطريق الدائري – الإسكندرية. 

رقم التواصل: 01000339164 – 01060630404. 

المدرسة البريطانية بالإسكندرية – BSA 

المدرسة البريطانية (BSA) هي مدرسة انترناشونال مختلطة، بتضم جميع مراحل التعليم ما قبل الجامعي، وبتُعد من أشهر المدارس الانترناشونال اللي بتقدم شهادة IG في الإسكندرية. 

بتحرص المدرسة على توظيف معلمين أكفّاء، يكونوا قادرين على توصيل المعلومات للطلاب بطريقة بسيطة سهلة الاستيعاب، وكمان بتهتم بإتقان اللغات الأجنبية، إلى جانب حرصها على تعليم الطلاب لغة عربية سليمة. 

ومصاريف العام الدراسي الحالي 2024-2025 م لمرحلة Pre-KG بتبدأ من 140 ألف جنيه مصري، بحسب ما أعلنته المدرسة على موقها الرسمي. 

العنوان: 7 شارع كفر عبده – رشدي – الإسكندرية. 

رقم التواصل: 03/5445426. 

أكاديمية جيمس بالإسكندرية – GEMS Academy

أكاديمية جيمس بالإسكندرية هي مدرسة مختلطة معروفة بتميزها بين المدارس الانترناشونال؛ ودا نتيجة حرصها على خلق بيئة تعليمية مناسبة للطالب في جميع المراحل الدراسية تؤهله للتفوق، وتحقيق أهدافه. 

من الأدلة اللي بتوضح إن المدرسة دي مصنفة ضمن أفضل مدارس انترناشونال في الإسكندرية هو كلام إحدى الشخصيات اللي بترشح المدرسة وبتقول عنها:

“بعد خبرتي الطويلة في مجال التربية والتعليم، أفضل مدرسة بالنسبة لي هي جيمس، من حيث الاحترام والتقدير في التعامل، التنسيق والترتيب .. أكفأ معلمين ومعلمات وإدارة”. 

مصاريف المدرسة للعام الدراسي الحالي 2024-2025 م بتبدأ من 155 ألف جنيه مصري لمرحلة رياض الأطفال، شاملة رسوم التسجيل لأول مرة، والكتب الدراسية، والباص، وتقدر تدفع المصاريف على 3 أقساط. 

العنوان: الكيلو 13 – طريق القاهرة إسكندرية الزراعي – أبيس – الإسكندرية. 

رقم التواصل: 03/5190800 – 01000505331. 

مدرسة القدس الدولية

تعد مدرسة القدس من أفضل مدارس انترناشونال في الإسكندرية؛ فهي بتسعى لتطبيق نظام تعليمي ملائم لعقول الطلاب، يساعد على فتح مداركهم، وتنمية مهاراتهم في جميع المراحل التعليمية. 

من الحاجات المميزة في مدرسة القدس هي اهتمامها الكبير بممارسة الأنشطة، فبنلاقي إنها بتوفر للطلبة أنشطة رياضية، وفنية، وتعليمية، وغيرهم، وبيبذل القائمون عليها قصارى جهدهم في سبيل تقديم أفضل نسخة من التعليم للطلبة المسجلين بالمدرسة. 

العنوان: شارع القدس – الراس السودا – الإسكندرية. 

رقم التواصل: 01507285775. 

اقرأ كمان عن: 9 أماكن كورسات إنجليزي في الإسكندرية وأسعارها. 

أفضل مدارس الدبلومة الأمريكية في الإسكندرية

عدد كبير من الطلبة بيقبل على المدارس اللي بتمنح شهادة الدبلومة الأمريكية، ودا لإنها بتساعدهم على تحقيق حلم السفر للخارج لاستكمال الدراسة بجامعات عالمية. 

المدارس دي بتتبع نظام تعليم مختلف تمامًا عن النظام المصري، بيخلي الطالب هو اللي يبحث عن المعلومة بنفسه مع توفير مصادر تساعده على دا، ومش بيحتاج أبدًا لكتب خارجية عشان يقدر يستوعب المناهج، وكمان مش بيضطر يحفظ مناهج صماء، ودا بيعلمه العديد من المهارات اللي بيحتاجها بعد كدا سواء في دراسته الجامعية، أو الحياة العملية. 

ومن أفضل المدارس دي بنلاقي: 

مدرسة ويلينجتون الدولية

تعد مدرسة ويلينجتون من أفضل مدارس انترناشونال في الإسكندرية اللي بتقدم الدبلومة الأمريكية والشهادة البريطانية، وبتساعد الطلبة على التفوق، وتحقيق أهدافهم العلمية. 

المدرسة مختلطة وبتشمل جميع مراحل التعليم ما قبل الجامعي، وبتحرص على تنمية مهارات الطلاب المختلفة بطريقة مناسبة لكل طالب. 

العنوان: الكيلو 23 – داخل كومباوند أليكس ويست – طريق الإسكندرية مطروح. 

رقم التواصل: 01011199222. 

مدرسة طيبة الدولية

مدرسة طيبة الدولية هي مدرسة مختلطة بتحتوي على قسم ناشونال وقسم انترناشونال، وبتقبل من سن 4 سنوات، وبتضم جميع مراحل التعليم ما قبل الجامعي. 

إحدى الأمهات بتقول:

“الحمد لله لي الشرف أن بناتي ينتسبوا للمدرسة، وبجد أنا سعيدة جدًا بدا، ولازم أقدم كل الشكر لكل المعلمات القائمات على مرحلة رياض الأطفال، اللي فعلًا فرقوا جدًا جدًا معايا في مستوى البنت من وقت دخولها المدرسة، ودا اللي شجعني أقدم لأختها”. 

ومن هنا نقدر نقول بقوة إنها ضمن أفضل مدارس انترناشونال في الإسكندرية. 

العنوان: تقاطع شارع 45 مع شارع مصطفى كامل – ميامي – الإسكندرية. 

رقم التواصل: 01091880091. 

مدرسة أليكس دريم للغات

مدرسة أليكس دريم هي مدرسة مختلطة بتشمل جميع المراحل التعليمية، وبتحتوي على قسم تعليم ناشونال، وقسم انترناشونال. 

إدارة المدرسة كويسة جدًا، ومنظمة، وقادرة على الارتقاء بمستوى الطلاب العلمي، والخلقي من خلال تطبيق برامج فعّالة تتناسب مع عقولهم، وكمان من خلال الحرص على تعيين معلمين أكفّاء، عندهم القدرة على تبسيط المادة العلمية. 

ومصاريف المدرسة السنة اللي فاتت 2023-2024 م كانت بتبدأ من 30200 جنيه مصري لمرحلة الـ Play school. 

العنوان: الطريق الدائري، بجوار مديرية التربية والتعليم – أبيس العاشرة – الإسكندرية. 

رقم التواصل: 03/4308161. 

مدرسة الزهراء الدولية

تعد مدرسة الزهراء من المدارس المشهورة اللي بتقدم شهادة الدبلومة الأمريكية في الإسكندرية، فبنلاقي إحدى الشخصيات بتقول عنها:

“مدرسة ممتازة، وقد تكون أيضًا فوق الممتازة .. قيادة ممتازة تحت إشراف الجميلة ميس هبة الخواجة .. إدارة ممتازة وطاقم تدريس ممتاز .. روح التعاون والحب وبث الطاقة الإيجابية بين كل فريق العمل من أكبر شخص لأصغر شخص .. شابوه ميس هبة ربنا يبارك فى صحتك وعمرك يا رب”.

وبالتالي فهي من أفضل مدارس انترناشونال في الإسكندرية. 

العنوان: 21 شارع عزمي – جناكليس – الإسكندرية. 

رقم التواصل: 03/5742503 – 03/5743490. 

مدرسة ليبرتي الدولية

بتحتوي مدرسة ليبرتي على العديد من الأقسام التعليمية؛ قسم ناشونال، وقسم انترناشونال بريطاني، وقسم انترناشونال أمريكي، وبتضم جميع مراحل التعليم ما قبل الجامعي. 

المدرسة بتحرص إن كل فصل يحتوى على عدد محدود جدًا من الطلبة،عشان تضمن إنهم يستوعبوا كويس، ويكون في مجال للمدرس إنه يهتم بكل طالب لوحده، ويعرف مهاراته وقدراته، ويعمل خطة لكيفية تنميتها. 

العنوان: تقاطع الطريق الدائري مع الطريق الزراعي – أبيس – الإسكندرية. 

رقم التواصل: 01210023333. 

مدرسة رويالتي للغات

بتندرج مدرسة رويالتي للغات تحت قائمة أفضل مدارس انترناشونال في الإسكندرية اللي بيقدر الطالب يحصل من خلالها على الدبلومة الأمريكية، ويلتحق بالجامعات الخارجية للتعرف على المناهج المختلفة. 

أحد أولياء الأمور بيقول عنها:

“مدرسة ممتازة من حيث مجلس إدارة راقي، وإدارة ناجحة، وهيئة تدريس على أعلى مستوى من الرقي، بالإضافة للتعاون المثمر مع أولياء الأمور الذى يصب فى النهاية فى مصلحة أولادنا”. 

العنوان: امتداد شارع 45 – على بعد 500 متر من مدخل الطريق الدولي – الإسكندرية. 

رقم التواصل: 03/5172883. 

أفضل مدارس انترناشونال في الإسكندرية | البكالوريا الدولية – IB 

من المدارس الدولية الشهيرة اللي بيقبل عليها عدد كبير من الطلاب كل سنة هي مدارس الـ IB الدولية اللي بتقوم على فكرة السلام، وقبول الثقافات المختلفة المحيطة. 

نظام المدارس دي موحد على مستوى العالم، لإنها ظهرت عشان تحل مشكلة الطلاب اللي بيضطروا دايمًا للسفر بحكم شغل أولياء أمورهم، وبيدخلوا مدارس مختلفة في دول مختلفة صعب يتأقلموا معاها. 

بنلاقي إن أفضل مدارس انترناشونال في الإسكندرية بتطبق النظام دا هي: 

مدرسة إيليت الدولية – Elite international school

بتقع مدرسة إيليت تحت مظلة أفضل مدارس انترناشونال في الإسكندرية بتقدم البكالوريا الدولية، وبتشمل جميع مراحل التعليم ما قبل الجامعي. 

إحدى الأمهات بتقول:

“مدرسة ممتازة، جميع العاملين على مستوي عالي من الذوق، والرقي، ومستوى رائع في اختيار نخبة من المدرسين، وأنا فخورة لالتحاق ابني بهذه المدرسة”.

لكن في أولياء أمور شايفين إن المدرسة محتاجة تهتم أكتر بكفاءات المدرسين عشان تفضل في الصدارة. 

العنوان: طريق المطار المتفرع من الطريق الدائري – خلف مطار النزهة – أبيس 10 – الإسكندرية. 

رقم التواصل: 01093307078 – 01282752039. 

أكاديمية الإسكندرية الدولية – AIA

بتقدم أكاديمية الإسكندرية شهادة الدبلومة الأمريكية، وشهادة البكالوريا الدولية IB، وبتدخل ضمن تصنيف أفضل مدارس انترناشونال في الإسكندرية، وبتقدم خدماتها التعليمية لجميع المراحل الدراسية، بدايةً من المراحل التمهيدية، ولحد المرحلة الثانوية. 

مصاريف العام الدراسي الحالي 2024 – 2025م بتبدأ من 150 ألف جنيه لمرحلة KG 1، شاملة مصاريف التسجيل لأول مرة، ومصروفات الكتب الدراسية. 

العنوان: أبيس 1 – القطعة 2,3 – الإسكندرية. 

رقم التواصل: 01118431118 – 01286215550. 

أفضل مدارس كندية في الإسكندرية

المدارس الكندية في مصر هي مدارس انترناشونال بتطبق مناهج كندية، وبتعتمد نظام المادة بدلًا من الفصل الدراسي، والطالب بيحصل في نهاية دراسته فيها على شهادة OSSD، اللي بتؤهله لاستكمال دراسته في كندا. 

ومن أفضل مدارس انترناشونال في الإسكندرية اللي بتقدم الشهادة الكندية: 

مدرسة بريتش كولومبيا الكندية الدولية

مدرسة بريتش كولومبيا تعد من المدارس الكندية الشهيرة بالإسكندرية، وهي مدرسة انترناشونال مختلطة تعرف بتميزها، وحرصها على تطبيق نظام تعليمي مميز يقدر الطالب يستوعب مناهجه، ويستفيد منه. 

العنوان: 26 شارع عبد المنعم رياض – كفر عبده – الإسكندرية. 

رقم التواصل: 01006464473. 

أفضل مدارس انترناشونال في الإسكندرية | المدارس الألمانية

المدارس الألمانية هي مدارس بتقدم مناهج ألمانية مميزة تم وضعها طبقًا للمعايير الحديثة، عشان تناسب عقول الطلاب، وتساعدهم على تطوير مهاراتهم، وتزود إدراكهم ووعيهم للي بيدور حواليهم، وفي نهاية الدراسة بتقدم للطالب شهادة الأبيتور المعتمدة، اللي بيها بيقدر الطالب يلتحق بالجامعات الخارجية. 

والمدارس دي موجود منها في الإسكندرية، وأفضلهم: 

سان شارل بورومي

مدرسة سان شارل بورومي هي مدرسة بنات فقط بتشمل جميع مرحل التعليم ما قبل الجامعي، وبتقدم شهادة الأبيتور الألمانية المعتمدة في نهاية الدراسة، بالإضافة إلى شهادة ثانوية متخصصة. 

مصاريف المدرسة بتبدأ من 89500 جنيه مصري لمرحلة رياض الأطفال، وبتبدأ تقل في باقي المراحل الدراسية. 

العنوان: 32 شارع صلاح الدين – العطارين – الإسكندرية. 

رقم التواصل: 03/3980145 – 03/3980146. 

تعرّف على: أفضل 7 أماكن تعليم اللغة الألمانية في الإسكندرية. 

أفضل مدارس انترناشونال في الإسكندرية | المدارس الفرنسية

تعد المدارس الفرنسية ضمن الخيارات المميزة المتاحة لأولياء الأمور، ودا لإنها بتلبي فعلًا احتياجاتهم، وبتقدم تعليم فريد مناسب للطلاب، وبتهتم برفع مستوى الطالب في جميع الجوانب. 

المدارس دي بتقدم شهادة البكالوريا الفرنسية، اللي من خلالها بيقدر الطالب يلتحق بالجامعات والمعاهد الفرنسية، ويستكمل دراسته هناك، ومنهم: 

مدرسة الليسيه الفرنسية

مدرسة الليسيه الفرنسية هي مدرسة مختلطة بتضم جميع مراحل التعليم ما قبل الجامعي، وبتمنح البكالوريا الفرنسية، وبتعد من أشهر المدارس بالإسكندرية. 

العنوان: 92 شارع الإسكندر الأكبر – الشاطبي. 

رقم التواصل: 03/5904959. 

مدرسة ليسيه الحرية

مدرسة ليسيه الحرية هي مدرسة قومية بتحتوي على قسم إنجليزي، وقسم فرنسي، وبتمنح شهادة الثانوية العامة المصرية، وبتعد واحدة من أفضل مدارس انترناشونال في الإسكندرية. 

مع كل بداية عام جديد بنلاقي عدد كبير من أولياء الأمور بيقدموا لأولادهم فيها، للحصول على تعليم مميز، لكن على الجانب الآخر بيشتكي بعض أولياء الأمور من إدارة المدرسة، وصعوبة الامتحانات اللي بيتم وضعها للطلبة. 

مصروفات المدرسة السنة اللي فاتت للعام الدراسي 2023-2024 م كانت بتبدأ من 125 ألف جنيه مصري لمرحلة رياض الأطفال، وتقدر تتواصل مع إدارة المدرسة عشان تعرف تفاصيل أكتر عن مصروفات السنادي. 

عنوان المدرسة: 119 شارع الإسكندر الأكبر – الشاطبي. 

رقم التواصل: 03/5901216. 

تعرف على: أبرز 3 أماكن كورسات فرنساوي في الإسكندرية وأسعارها. 

أفضل مدارس انترناشونال في الإسكندرية | المدارس اليابانية

المدارس اليابانية هي مدارس حكومية مصرية بتخضع لإشراف وزارة التربية والتعليم المصرية، وبتطبق المنهج المصري، لكن بطريقة مختلفة عن الطريقة المتعارف عليها؛ لأنها بتستخدم أساليب تعليمية حديثة، مع تطبيق أنشطة التوكاتسو اللي بتنمي مهارات الطلاب بشكل ملحوظ. 

أعلنت وزارة التربية والتعليم المصرية إن المصاريف الدراسية المطلوبة في المدارس اليابانية للعام الدراسي 2024–2025 م هتكون في حدود 17200 جنيه مصري لمرحلة رياض الأطفال، بالإضافة إلى رسوم الكتب والزي الرسمي، ومن المدارس اليابانية في الإسكندرية: 

المدرسة المصرية اليابانية

المدرسة اليابانية المصرية معروفة باهتمامها على رفع مستوى الطالب وحرصها على تنمية قدراته، وبنلاقي إحدى الشخصيات بتقول عنها: “مدرسة ممتازة، كفاية ارتباط الأطفال بالمدرسين، واكتسابهم كل يوم حاجة جديدة، إن شاء الله تجربة ناجحة”. 

العنوان: آخر مدرسة على اليمين بشارع الجراج ناصية مدرسة الزراعة – أمام شركة إدفينا – ميدان عبد الوهاب – الراس السوداء. 

رقم التواصل: 03/26233880. 

المدرسة المصرية اليابانية ببرج العرب

المدرسة المصرية اليابانية هي مدرسة مميزة بتعطي الأنشطة قدر كبير من الاهتمام، لإنها بتؤمن بدور الأنشطة في تنمية المهارات، وهدفها هو تنشئة جيل واعي مواكب للتغيرات المحيطة وقادر على تحمل المسئوليات. 

العنوان: الحي السكني الأول – أمام قصر ثقافة برج العرب. 

المدرسة المصرية اليابانية ببرج العرب 2 

من المدارس الشهيرة أيضًا هي المدرسة المصرية اليابانية ببرج العرب 2 واللي لازالت بتبذل قصارى جهدها لتطبق أهداف نظام التعليم الياباني في مصر. 

العنوان: الحي التاني، شارع المحكمة – خلف مدرسة الشهيد مهيد الرسمية – برج العرب الجديدة. 

أفضل مدارس انترناشونال في الإسكندرية | المدارس الإيطالية

المدارس الإيطالية هي مدارس فنية بتفتح أبوابها للطلاب الحاصلين على الشهادة الإعدادية، ومعروف إن تنسيقها بيكون أعلى من تنسيق مدارس الثانوية العامة. 

بنلاقي إن المدارس الإيطالية بتتيح للطالب فرصة التدريب والتطبيق من خلال توفير العديد من الأدوات اللي بيحتاجها الطالب خلال دراسته، وبالتالي بيتخرج منها وهو فاهم كويس اللي درسه ومطبق عليه بإيده، ومن أهما: 

معهد دون بوسكو

معهد دون بوسكو الإيطالي بالإسكندرية هو معهد فني يمنح لخريجيه شهادة الدبلوم الفني الصناعي، وبتشمل تعليم ثانوي صناعي، وتعليم أساسي، وبيتيح ليهم فرصة الالتحاق بالجامعات والمعاهد الفنية بمصر. 

بالإضافة إلى إن الطلاب هنا ممكن يلتحقوا بالجامعات الهندسية الإيطالية، ويكملوا تعليمهم فيها بعد استيفاء كافة الشروط المطلوبة في الجامعات دي. 

العنوان: 99 شارع شريف – أمام مسجد العمري – أبو الدرداء – اللبان – الإسكندرية. 

رقم التواصل: 03/3929108 – 01222167450. 

أقرأ أيضًا: مراكز تعليم الإيطالية بالإسكندرية

الخلاصة 

محافظة الإسكندرية بتحتوي على عدد كبير من المدارس الانترناشونال اللي تقدر تقدم لابنك أو بنتك فيهم وأنت مطمن على المستوى الدراسي اللي هيتلقاه في المدرسة، وبتتنوع المدارس دي ما بين: مدارس الـ IG، مدارس الدبلومة الأمريكية، مدارس البكالوريا الدولية IB، المدارس الكندية، المدارس الفرنسية، المدارس اليابانية، والمدارس الإيطالية. 

وذكرنا في المقال مجموعة من أفضل مدارس انترناشونال في الإسكندرية اللي بيقدموا تعليم مميز وفقًا للشهادات اللي وضحناها، وتقدر تتعرف على كل مدرسة منهم بشكل متعمق، وتختار الأنسب لابنك.