قائمة مدارس تجريبي لغات مميز بالإسكندرية إدارة شرق

المدارس التجريبي حالياً ليها شهرة واسعة جداً ما بين أولياء الأمور، وفي السنين اللي فاتت زاد الإقبال عليها، ودا بيرجع لفروقات كتيرة بينها وبين المدارس الحكومية. ففي المدارس التجريبي عدد الطلاب في الفصل أقل من المدارس الحكومية، دا غير اهتمامها بتعليم اللغات الأجنبية للطفل من صغره. 

ودا سمح لها تكون موجودة بشكلين مختلفين وهي: المدارس التجريبي العادية، والمدارس التجريبي المميز، ولكل نوع فيهم مميزاته وعيوبه وشروط خاصة للالتحاق بيه.

ولكن أي نوع أفضل فيهم؟ وإيه أفضل مدارس تجريبي لغات مميز بالإسكندرية إدارة شرق؟

في المقال دا هنجاوب عن أسئلة كتير بتدور في ذهن كل ولي أمر بحيث يقدر ياخد قراره المناسب.

الفرق بين التجريبي المميز لغات والتجريبي العادي

بمجرد ما الطفل يكمل 5 سنين -سن دخول المدرسة- بيبدأ كل أب وأم رحلة البحث عن أفضل المدارس المتاحة بالنسبة ليهم وللطفل. ولكن في نفس الوقت بتبدأ الحيرة بسبب بعض الفروقات البسيطة بين المدارس، زي: الفرق بين التجريبي المميز والعادي.

في البداية، لازم نعرف إن لكل واحدة مميزات وعيوب، ولازم ولي الأمر يكون على دراية بالتفاصيل دي عشان يقدر يحدد المدرسة المناسبة لابنه، فبنلاقي:

المدارس التجريبي العادي

مدارس تابعة لإشراف وزارة التربية والتعليم من حيث المناهج، ومن خصائصها: 

• بيدرس الطالب منهج المستوى الرفيع في اللغة الإنجليزية – Connect Plus. 
• يكون الطالب تابع للمربع السكني المنتمي للإدارة التعليمية.
• بيبدأ تدريس اللغة التانية فيها من الصف الأول الإعدادي.
• بيتراوح عدد الطلاب في فصولها من 35 إلى 40 طالب.
• بيبدأ تعلم اللغة الإنجليزية من مرحلة رياض الأطفال.
• بيدرس مادتي الرياضيات والعلوم باللغة الإنجليزية.
• بيتم قبول الطفل بداية من 4 سنين و6 شهور.
• لا يشترط حصول الوالدين على مؤهل عالي.

وبالنسبة لمصاريف مدارس التجريبي العادية فهي أقل مقارنة بـالتجريبي لغات مميز، فبنلاقيها بتبدأ من 1133 جنيه لـ KG1، وبتوصل لـ 850 جنيه للصف الثالث الثانوي، ودي المصاريف اللي تم الإعلان عنها من الوزارة لعام 2025، ولكن دا مش الفرق الوحيد.

اقرأ أيضاً: أشهر 10 مدارس تجريبي لغات بالإسكندرية إدارة وسط.

مدارس تجريبي لغات مميز

المدارس التجريبي مميز لغات هي جزء من النظام التجريبي، وبتتميز بأنها:

• بتركز على تقييم مستوى الطالب بشكل مستمر عن طريق امتحانات كل فترة بتحدد المستوى العلمي للطلبة.
• بتهتم بوجود أنشطة طلابية بشكل أفضل، لمساعدة الطلاب على اكتشاف مواهبهم.
• لا يشترط إن المدرسة تكون ضمن المربع السكني التابع للإدارة التعليمية.
• بتستقبل عدد طلاب أقل فكثافة الفصل بتتراوح بين 20 – 35 طالب.
• بيتم التحاق الطفل بالمدرسة بدايةً من عمر 5 سنوات و 10 شهور.
• بيبدأ تدريس اللغة التانية في الصف الرابع الابتدائي.
• بيبدأ تعلم اللغة الإنجليزية من المرحلة الإبتدائية.
• يشترط حصول الوالدين على مؤهل عالي.

ومصاريف المدارس التجريبي المميز لعام 2025 بتتراوح بين 2200 – 3200 جنيه لجميع المراحل الدراسية.

وبالمقارنة بين المدارس التجريبي العادية والمدارس الحكومية، هتقدر تقرر إيه الأنسب لطفلك. 

ولو موجود في إسكندرية فمدارس تجريبي لغات مميز بالإسكندرية إدارة شرق هتكون ضمن المدارس المناسبة لابنك، كونها بتتميز بتقديم برامج تعليمية مختلفة في مجالات كتير زي:

• التوعية الصحية والذاتية.
• التربية الرياضية.
• المسابقات.
• الفنون.

دا غير إنها مشهورة بجودة تعليم عالية، ومصاريف دراسية مناسبة لمتوسطي الدخل من أولياء الأمور، وأقل بكتير من مصاريف المدارس الخاصة والانترناشونال.

اقرأ أيضاً: دليل شامل لأفضل المدارس اللغات بالإسكندرية.

مدارس تجريبي لغات مميز بالإسكندرية إدارة شرق

أولًا سواء كان اختيارك هو مدارس التجريبي العادية أو مدارس تجريبي لغات مميز، فمهم تتعرف على المناطق التابعة لإدارة شرق التعليمية وهي: 

• قسم رمل أول.
• قسم رمل ثانى.
• قسم سيدى جابر.

وتسهيلاّ على كل أب وأم بنعرض عليك قائمة بأسماء مدارس تجريبي لغات مميز بالإسكندرية إدارة شرق، وهما:

1- مدرسة سموحة تجريبي مميز لغات

المدرسة بتتميز باستقبال جميع المراحل الدراسية بداية من الحضانة لحد المرحلة الثانوية، دا غير وجود أنشطة كتير ومسابقات بين الطلبة كنوع من أنواع الـ Activity والمرح بين الأطفال. 

دا غير حفاظ المدرسة على الانضباط والالتزام من خلال توضيح لائحة الانضباط الخاصة بيها بكل الإجراءات اللي بتتخذها في جميع المخالفات اللي ممكن يقوم بيها الطفل. 

كمان المدرسة مشهورة إنها بتحصل على جوائز كتير لجودة التعليم. ومن ضمن التعليقات على المدرسة من طلابها:

• “أنا في المدرسة من سنة تالتة وحقيقي المدرسة جميلة جداً”. 
• “أنا بحب مدرستي جداً ، دخلتها وأنا عندي 4 سنين ولسه موجودة فيها”.

العنوان: ميدان سموحة – سيدى جابر – الإسكندرية.

التليفون: 4251010(03) – 4282711(03). 

2- مدرسة عبدالسلام المحجوب الابتدائية التجريبى

مدارس عبد السلام محجوب بتهتم بتثقيف الطلاب بأهمية الخدمة الاجتماعية والتربية الفنية، دا غير اهتمامهم بمعلومات عن التغذية والصحة بجانب التعليم.

وعلى صفحتهم على الـ Facebook أولياء أمور كتير بتشكر جداً في المدرسين والمدرسات.

كمان فيها المراحل الدراسية بداية من رياض الأطفال لحد الثانوي. 

وبتلتزم المدرسة بكل الإجراءات الصحيحة لسير العملية التعليمية بشكل جيد، ابتداءً من متابعة مستوى الطالب وإبلاغ ولي الأمر بكل المشاكل السلوكية والتعليمية للطفل، والتشديد في اللجان لمنع الغش وتقييم مستوى الطالب الحقيقي.

العنوان: قرية الرابعة الناصرية، شرق سموحة، الإسكندرية.

التليفون: 03/9577933. 

3- مدرسة محمد زهران الرسمية مميز لغات

تعد مدرسة زهران من أشهر مدارس تجريبي لغات مميز بالإسكندرية إدارة شرق؛ ودا بيرجع لإنها بتهتم بالأنشطة والمسابقات الرياضية، والنشاط الإذاعي، كمان بتحفز الطلاب للمشاركة في معارض فنية ومسابقات: زي المبتكر الصغير، وغيرهم.

وبتضم جميع المراحل التعليمية بداية من KG1 لحد المرحلة الثانوية. 

والمدرسة مشتركة أولاد وبنات، ولكن بيتم الفصل بينهم بداية من أولى إعدادي، واللغة الفرنسية بتكون لغة تانية بداية من الصف الرابع، وابتداءً من الصف الأول الإعدادي بيتم الاختيار بين الفرنساوي والألماني كلغة تانية.

ومن ضمن تعليقات أولياء الأمور على المدرسة: 

• “مدرسة جميلة ونظيفة ومتطورة، بها كل التطويرات التكنولوجية الحديثة، بها ملعب كبير وحديقة جميلة”.
• “تتميز بحسن الإدارة والانضباط”.

العنوان: ميدان فيكتور عمانويل – سموحة شرق الإسكندرية.

التليفون: 03/4269670 – 03/4269675.

4- مدرسة مصطفى النجار الرسمية مميز لغات

المدرسة دي هي واحدة من المدارس المتميزة والمناسبة لكل ولي أمر مش بيرجح المدارس المشتركة، لإنها مدرسة بنات فقط. وبتضم جميع المراحل التعليمية بداية من KG1 حتى المرحلة الثانوية. 

المدرسة بتهتم جداً بالأنشطة والاحتفال بشهادات النجاح والتقدير مع أولياء الأمور، دا غير إنها بتنظم ندوات وورش بهدف تثقيف الطالبات بكيفية اختيار أهدافهم والسعى ليها، والثقة بالنفس، واحترام الذات.

أما كلام طلابها في حقها كان: “أنا بحب مدرستي جداً فوق الوصف، ودا لأن كل طلابها متميزين. وأنا فخورة جداً إني بدرس فيها”. 

العنوان: شارع مصطفى النجار – أمام حديقة أنطونيادس – سموحة – الإسكندرية.

التليفون: 03/4243674 – 03/4299074.

اقرأ أيضاً: قائمة بأفضل مدارس تجريبي لغات إدارة المنتزه.

شروط التقديم لمدارس تجريبي لغات بإدارة شرق

بداية من شهر يونيو كل عام بتفتح مدارس تجريبي لغات العادية ومدارس تجريبي لغات مميز أبوابها لاستقبال الطلاب، وبتستمر في استقبال الطلبات لمدة شهر كامل.

ومن الطبيعي إن لكل مدرسة شروط خاصة بالالتحاق. وبالنسبة لمدارس تجريبي لغات مميز بالإسكندرية إدارة شرق، تنحصر شروطها في:

• لا يشترط التواجد في نفس المربع السكنى نتيجة قلة أعداد النوع دا من المدارس.
• التقديم والتسجيل من خلال موقع الوزارة على شبكة الإنترنت، وانتظار النتيجة.
• وصول الطفل إلى عمر 5 سنوات و10 شهور.
• حصول الوالدين على مؤهل تعليم عالي.

مصاريف المدارس التجريبية لغات المميزة

مصروفات المدارس الرسمية لغات المميزة متقاربة بشكل كبير بين محافظات الجمهورية، وبتظهر أوجه الاختلاف في المرحلة التعليمية للطفل، وبالنسبة لمصاريف مدارس تجريبي لغات مميز بالإسكندرية إدارة شرق للعام الدراسي الجديد 2024 – 2025، فهي:

• مرحلة رياض أطفال 1: 2154 جنيه.
• مرحلة رياض أطفال 2: 2061 جنيه.
• المرحلة الابتدائية حتى الصف السادس: 2527 جنيه.
• الصف الأول والثاني الإعدادي: 2992 جنيه.
• الصف الثالث الإعدادي: 1579 جنيه.
• المرحلة الثانوية حتى الصف الثالث: 1879 جنيه.

شراء الكتب من المدرسة اختياري، وسعر الكتب لـ KG1 بيكون حوالي 450 جنيه لكل ترم.

واليونيفورم يُشترى على حسب الاحتياج، وعلى حسب المدرسة ليها باص أو لأ. 

في النهاية، القرار الأول والأخير لاختيار أفضل مدرسة للطفل بيرجع إلى ولي الأمر، ومكان سكنه، ومستوى الطفل، واعتبارات كتير بتختلف بين كل أسرة. 

ودا لا يمنع إن مدارس تجريبي لغات مميز بالإسكندرية إدارة شرق بتتميز بتقديم برامج تعليمية مختلفة في مجالات كتير. بالإضافة إلى كونها بتستخدم تقنيات حديثة، وأساليب تدريس مبتكرة، عشان تحفز الطلاب على التعلم، وتطوير مهاراتهم.