دليل شامل كل مدارس ناشيونال بالإسكندرية وأفضل 10 مدارس قومية

المدارس الناشيونال بالإسكندرية

التعليم في مصر شهد تغير كبير، وتقدم ملحوظ في السنوات الأخيرة، وفتح أبواب كبيرة قدام أولياء الأمور لاختيار نوع التعليم الأفضل والأنسب لأولادهم، ودا لإن الحكومة وفرت أنواع متعددة من المدارس اللي بتقدم لابنك أو بنتك تعليم مختلف، ومن ضمنها “المدارس الناشيونال” أو “القومية”.

وفي المقال دا هنقولك إيه هي المدارس القومية، وأهم مدارس ناشيونال بالإسكندرية، والتفاصيل الخاصة بكل مدرسة، ومميزات المدارس الناشيونال عن غيرها من المدارس.

ما هي المدارس القومية بالإسكندرية؟

المدارس القومية أو الناشيونال أو الأهلية؛ هي مدارس بتخضع مالياً لإشراف وزارة التربية والتعليم زي مدارس الحكومة العادية، لكن الاختلاف في نظام الإدارة، فبيكون ليها إدارة خاصة اسمها “مجلس إدارة الجمعية العامة للمعاهد القومية”، ودا مجلس إدارة بيكون منتخب من أولياء الأمور، وبالتالي الإدارة بالشكل دا بتكون أفضل نسبياً من المدارس الحكومية العادية.

سن تقديم الـ KG1 من سن 4-6 سنوات، وسن القبول بيتغير من سنة للتانية، وبيعتمد على اجتياز الانترفيو للطالب والوالدين، وتنسيق السن للمتقدمين من الأكبر للأصغر.

معظم المدارس القومية بتاخد من سن فوق الـ 5 سنوات لكن مش كلها، وبيكون في مراحل في التنسيق، ممكن توصل لـ 4 مراحل وفي مدارس 2 فقط، وأوقات بتوصل لـ 7 مراحل.

والمدارس القومية بتنقسم إلى:

  • مشترك (بنين وبنات).
  • بنين فقط.
  • بنات فقط.

وبتنقسم كمان على حسب لغة المناهج اللي بيدرسها الطلاب، وهي: قسم عربي، أو لغات، أو عربي ولغات، ومنهم 3 مدارس ناشيونال بالإسكندرية عربي ولغات، و7 مدارس ناشيونال بالإسكندرية قسم لغات فقط.

مدارس ناشيونال بالإسكندرية عربي ولغات

مدارس ناشيونال الإسكندرية عربي ولغات

ودي أهم التفاصيل عن كل مدرسة من العنوان،ورقم التواصل، ومتوسط المصاريف لكل مرحلة، ولكن بيضاف عليها مصاريف الباص، واليونيفورم، والكتب، والمصاريف دي كانت لسنة 2021 -2022.

1- مدارس الإقبال القومية (لها فرعين)

من أفضل المدارس الناشيونال بالإسكندرية، وتمتاز بالسُمعة الجيدة عن جودة الدراسة، وبيتوفر فيها قسم عربي، وقسم لغات إنجليزي، مشتركة أولاد وبنات، وفيها كل المراحل لحد الثانوي.

الفرع الأول: 30 شارع الميثاق – السرايا

يتم فتح التقديم في شهر يونيو، وسن القبول من 6 سنوات إلا يوم حتى 4 سنوات، والقبول بيكون حسب الأكبر سناً.

وبتتميز المدرسة بالعديد من الأنشطة الطلابية، زي: الأنشطة الرياضية، والعلمية، والفنية، والموسيقية، وغيرها من الأنشطة اللي بتوفر جو محفز للطلاب.

المصاريف:

  • مرحلة رياض الأطفال: 5857 جنيه مصري.
  • المرحلة الابتدائية: 5859 جنيه مصري.
  • المرحلة الإعدادية: 6329 جنيه مصري.
  • المرحلة الثانوية: 6797 جنيه مصري.

رقم التليفون:

033588082.

الفرع الثاني: القرية العاشرة أبيس – طريق الإسكندرية الدائري.

بتتميز بأنشطة طلابية كتيرة لتنمية مواهب الطلاب، بجانب وجود مكتبة كبيرة، وتوفير رعاية طبية للطلبة.

المصاريف:

  • مرحلة رياض الأطفال: 4300 جنيه مصري.
  • المرحلة البتدائية: 4600 جنيه مصري.
  • المرحلة الإعدادية: 6100 جنيه مصري.
  • المرحلة الثانوية: 6000 جنيه مصري.

الرقم:

034305638 – 034305639.

3- محمد كريم القومية (مشتركة)

بتتميز المدرسة بالآراء الإيجابية من أولياء الأمور، زي إن اليونيفورم بيتم شراؤه بالقطعة حسب الاحتياج، وتقديم خصم 10% للإخوات. وبإمكان الطلاب القدام في المدرسة تسديد المصروفات على قسطين.

العنوان:

35 شارع توت عنخ آمون، سموحة، الإسكندرية.

الرقم:

034210032 – 034210033 – 034210036.

المصاريف:

  • مرحلة رياض الأطفال: 7800 جنيه مصري.
  • المرحلة الابتدائية: 8500 جنيه مصري.
  • المرحلة الإعدادية: 7700 جنيه مصري.
  • المرحلة الثانوية: 7885 جنيه مصري.

أقسام المدرسة:

  • قسم عربي يتم تدريس اللغة الثانية الفرنسية أو الإيطالية بداية من الصف الأول الثانوي.
  • قسم ناشيونال إنجليزي.

مدارس ناشيونال بالإسكندرية لغات فقط

مدارس ناشيونال بالإسكندرية لغات

وبيتوفر كمان عدد من المدارس الناشيونال اللغات في مناطق مختلفة من المحافظة، وعددهم 7 مدارس ناشيونال بالإسكندرية.

1- فيكتوريا كولدج (كلية النصر للبنين)

من المدارس اللي سمعتها كويسة جداً بين أولياء الأمور، ودا لتواصل المدرسة معاهم بشكل كويس عن مستوى الطالب ووجود أي مشكلة لحلها بمساعدة الأهل.

بالإضافة إن المدرسة بتوفر حضور الحصص أونلاين ودا فرق في وقت الكورونا، وبيهتموا بوجود مشروعات الطلبة بيشتغلوا عليها لتنمية مهارات الطلاب.

العنوان:
شارع الميثاق فيكتوريا، قريب من أمام محطة ترام فيكتوريا، الإسكندرية.

الرقم:

033588673 – 033581160.

المصاريف:

  • مرحلة رياض الأطفال: 10500 جنيه مصري.
  • المرحلة الابتدائية: 11500 جنيه مصري.
  • المرحلة الإعدادية: 11000 جنيه مصري.
  • المرحلة الثانوية: 10800 جنيه مصري.

أقسام المدرسة:

  • قسم ناشيونال إنجليزي(أولاد) فقط، ويشمل جميع المراحل الدراسية.
  • قسم أمريكاني مشترك يشمل جميع المراحل الدراسية.
  • قسم بريطاني IG مشترك. يوجد في المرحلة الثانوية فقط.

2- المنار القومية للبنات

بتتميز مدرسة المنار بتنفيذ جزء كبير من رؤيتها بإعداد تلميذ حر سعيد متميز علمياً وخلقياً، وقادر على مواكبة تطورات العصر في ظل مشاركة مجتمعية فعالة؛ ودا بيتم من خلال أنشطة كتير بيقوموا بيها الطلبة بتساعدهم على تنمية مهاراتهم، من خلال الأنشطة الرياضية والفنية.

العنوان:
8 شارع أمين فكري، محطة الرمل، الإسكندرية.

الرقم:
034861444 – 034863213.

المصاريف:

  • مرحلة رياض الأطفال: 8200 جنيه مصري.
  • المرحلة الابتدائية: 8800 جنيه مصري.
  • المرحلة الإعدادية: 8400 جنيه مصري.
  • المرحلة الثانوية: 8000 جنيه مصري.

القسم:
ناشيونال إنجليزي.

3- كلية البنات القومية

بتتميز المدرسة بالاشتراك في المسابقات في مختلف الأنشطة في مجالات متنوعة لتنمية مواهب الطالبات.

وتمنح الطالبات شهادتين الثانوية العامة المصرية، والدبلومة الأمريكية.

العنوان:
22 شارع أحمد يحيى زيزينيا – الإسكندرية.

الرقم:
035820409 – 035851775.

المصاريف:
مرحلة رياض الأطفال: 10900 جنيه مصري، وفي خصم 500 جنيه للإخوة.

الأقسام:

  • قسم ناشيونال يشمل جميع المراحل لحد الثانوي.
  • قسم أمريكان في المرحلة الثانوية فقط.

يتم تدريس اللغة الثانية (الفرنسية) بداية من الصف الرابع، ومن أول الصف الأول الثانوي بيكون متاح الفرنسية أو الإيطالية كلغة ثانية.

4- النصر بنين EBS

بتتميز بمنح الطلاب المتخرجين الشهادة المصرية، والشهادة البريطانية، والدبلومة الأمريكية.

دا بجانب إنها من أفضل المدارس لإتقان اللغات، زي الإنجليزية، والفرنسية، والإيطالية، وبتتميز بمستوى الطلاب التعليمي العالي، وشعورهم بالانتماء ليها.

العنوان:
134 شارع طريق الحرية، الشاطبي، أمام كلية العلوم، الإسكندرية.

الرقم:
035926340 – 035931180 – 035934917.

المصاريف:

  • مرحلة رياض الأطفال: 7500 – 8500 جنيه مصري.
  • المرحلة الابتدائية: من 7600 – 8600 جنيه مصري.
  • المرحلة الإعدادية: 9000 جنيه مصري.
  • المرحلة الثانوية: 9000 جنيه مصري.

الأقسام:

  • قسم ناشيونال لجميع المراحل لحد الثانوي. ( بنين فقط)
  • القسم البريطاني IG يشمل جميع المراحل. (مشترك)
  • قسم أمريكان: يشمل المرحلة الثانوية فقط. (مشترك).

5- النصر للبنات EGC

بتتميز المدرسة بمساحتها الواسعة ونظافة الفصول، دا غير إن فيها ملعب كرة يد، وملعب لكرة السلة، وفيها حوض سباحة كبير وغرفة تغيير الملابس.

كل مرحلة ليها مبنى مستقل؛ وفيها مسرح وغرفة للموسيقى فيها كل الأدوات الموسيقية.

آراء أولياء الأمور والطلبة عنها إيجابي من حيث جودة التعليم، ومعاملة المدرسين، والأنشطة الكتير اللي بيقوموا بيها الطلبة.

العنوان:
15 شارع أحمد حسنين، الشاطبي، الإسكندرية.

الرقم:
035821752 – 035900349.

المصاريف:

  • مرحلة رياض الأطفال: 11000 جنيه مصري.
  • المرحلة الابتدائية 10300 جنيه مصري.
  • المرحلة الإعدادية: 10500 جنيه مصري.
  • المرحلة الثانوية: 9300 جنيه مصري.

الأقسام:

  • المدرسة بها نظام الدمج (ذوي الاحتياجات الخاصة).
  • قسم ناشيونال إنجليزي.
  • قسم دولي بريطاني (IG).

6- الفراعنة القومية هوم كرافت

واحدة من أهم المدارس القومية بمحافظة الإسكندرية وأقدمهم، بتتميز بجودة التعليم في جميع المراحل التعليمية.

تنسيق القبول لسنة 2022 – 2023 وصل لـ 9 مراحل، وبيكون في انترفيو للطفل لقياس مستوى دكاء الطفل واستيعابه.

العنوان:
7 شارع الفراعنة، باب شرق، الإسكندرية.

الرقم:
034862229 – 034850594.

المصاريف:.

  • مرحلة رياض الأطفال: 8400 جنيه مصري.
  • المرحلة الابتدائية: من 10000 – 11000 جنيه مصري.
  • المرحلة الإعدادية: 10700 جنيه مصري.
  • المرحلة الثانوية: 12000 جنيه مصري.

الأقسام:
ناشيونال إنجليزي، مشتركة (أولاد وبنات).

7- ليسيه الحرية

تأسست سنة 1909، وليها 3 فروع في القاهرة، وهي من المدارس المشتركة اللي بتمتاز بجودة التعليم وكثرة الأنشطة الطلابية.

العنوان:
119 شارع الإسكندر الأكبر، الشاطبي، الإسكندرية.

الرقم:
035901224 – 035923284.

المصاريف:

  • مرحلة رياض الأطفال: من 9500 – 10500 جنيه مصري.
  • المرحلة الابتدائية: من 10000 – 11000 جنيه مصري.
  • المرحلة الإعدادية: 10700 جنيه مصري.
  • المرحلة الثانوية: 12000 جنيه مصري.

الأقسام:

  • قسم إنجليزي.
  • قسم فرنسي، وبيتم تدريس اللغة الثانية الإنجليزية بدايةً من الصف الأول الابتدائي، وتشمل جميع المراحل الدراسية حتى الثانوية، مشتركة (أولاد وبنات).

ولكن خلي بالك إن المصاريف المذكورة لكل مدرسة هي مصاريف 2021-2022، والأسعار بتختلف كل سنة، عشان كدا الأفضل إنك تتواصل مع المدرسة بشكل مباشر عشان تعرف تفاصيل الأسعار.

الفرق بين المدارس الناشيونال و الانترناشونال

المدارس الناشيونال هي مدارس حكومية، وبتخصع لرقابة وإشراف وزارة التربية والتعليم، وهي المدارس اللغات أو الخاصة، أما المدارس الانترناشيونال فهي مدارس بتقدم نظام تعليمي مختلف عن منهج الحكومة، وخاص بدولة معينة، وليها منهج خاص بيها تماماً، زي:

  • المدارس البريطانية اللي بتتبع نظام التعليم البريطاني.
  • والمدارس الأمريكية اللي بتتبع التعليم الأمريكي.

وبيتميز التعليم في المدارس الانترناشيونال بتدريس مناهج الدول باللغة التابعة ليها زي المدارس البريطانية والفرنسية، وبتهتم المدارس الدولية بتوفير كل السبل التفاعلية لمساعدة الطلاب على التفكير والإبداع.

أما المدارس الناشيونال بتتميز إن تعليمها تابع للنظام التعليمي المصري، وبيحصل منها الطالب على شهادة الثانوية العامة المصرية، وبتهتم باللغات، وبيتم تدريس اللغات من مرحلة كي جي، وغالباً بتبتدي بالإنجليزية ثم الفرنسية والألمانية، وبتتناسب مع متوسطي الدخل، يعني بتتشابه مع المناهج المصرية ولكن بتختلف في اللغات، وطريقة التدريس، ومستوى المعلمين.

أما المدارس الانترناشيونال بيدرسوا المناهج الخارجية الخاصة بأمريكا، أو بريطانيا، وغير تابعة لوزارة التربية والتعليم ولا الإمتحانات، وبيحصل الطالب في نهاية الدراسة على شهادة معتمدة تابعة للدولة المسؤولة، وكمان بتؤهله إنه يكمل دراسته بالخارج.

دا بالإضافة إن المدارس الانترناشيونال بتركز على تنمية وعي الطالب، وتنمية مهاراته من خلال تطبيق أحدث التقنيات التعليمية.

اقرأ أيضاً: الفرق بين المدارس الناشيونال والانترناشيونال في مصر.

الخلاصة

المدارس القومية هي مدارس تابعة للحكومة بمصروفات إضافية، لإنها بتركز على إتقان الطالب للغات، دا غير إنها بتوفر مجموعة كبيرة من الأنشطة اللي بتساعد الطالب على تنمية مهاراته في مختلف المجالات، وبيتوفر 10 مدارس ناشيونال بالإسكندرية وهما؛ مدرسة الإقبال القومية فرع السرايا وفرع أبيس، ومدرسة محمد كُريم المشتركة، ومدرسة فيكتوريا كولدج، وكلية النصر للبنات، ومدرسة المنار القومية بنات، وكلية البنات القومية، ومدرسة النصر بنين، ومدرسة الفراعنة هوم كرافت، ومدرسة ليسيه الحرية.

وأخيرًا، اختيار المدرسة بيترتب عليه مستقبل طفلك، وطريقة تفكيره، عشان كدا لازم تهتم جدًا بالقرار دا، وتعرف معلومات أكتر عن المدارس المتاحة عشان تقدر تختار الأنسب له.

دليل المدارس الاسكندرية

ابحث عن المدرسة واحصل علي أدق النتائج وكافة المعلومات.

إقرأ أكثر..

  • لا توجد تعليقات بعد.
  • أضف تعليق