التعليم في مصر شهد تغير كبير، وتقدم ملحوظ في السنوات الأخيرة، وفتح أبواب كبيرة قدام أولياء الأمور لاختيار نوع التعليم الأفضل والأنسب لأولادهم، ودا لإن الحكومة وفرت أنواع متعددة من المدارس اللي بتقدم لابنك أو بنتك تعليم مختلف، ومن ضمنها “المدارس الناشيونال” أو “القومية”.
وفي المقال دا هنقولك إيه هي المدارس القومية، وأهم مدارس ناشيونال بالإسكندرية، والتفاصيل الخاصة بكل مدرسة، ومميزات المدارس الناشيونال عن غيرها من المدارس، فتابع معنا.
ما هي المدارس القومية بالإسكندرية؟
المدارس القومية أو الناشيونال أو الأهلية؛ هي مدارس بتخضع مالياً لإشراف وزارة التربية والتعليم زي مدارس الحكومة العادية، لكن الاختلاف في نظام الإدارة، فبيكون ليها إدارة خاصة اسمها “مجلس إدارة الجمعية العامة للمعاهد القومية”، ودا مجلس إدارة بيكون منتخب من أولياء الأمور، وبالتالي الإدارة بالشكل دا بتكون أفضل نسبياً من المدارس الحكومية العادية.
سن التقديم لمرحلة الـ KG1 بيبدأ من 4 – 6 سنوات، وسن القبول بيتغير من سنة للتانية، وبيعتمد على اجتياز الانترفيو للطالب والوالدين، وتنسيق السن للمتقدمين من الأكبر للأصغر.
معظم المدارس القومية بتاخد من سن فوق الـ 5 سنوات لكن مش كلها، وبيكون في مراحل في التنسيق، ممكن توصل لـ 4 مراحل وفي مدارس 2 فقط، وأوقات بتوصل لـ 7 مراحل.
والمدارس القومية بتنقسم إلى:
- مشترك (بنين وبنات).
- بنين فقط.
- بنات فقط.
وبتنقسم كمان على حسب لغة المناهج اللي بيدرسها الطلاب، وهي: قسم عربي، قسم لغات، أو قسم عربي ولغات، ومنهم 3 مدارس بالإسكندرية عربي ولغات، و7 مدارس قسم لغات فقط.
اقرأ أيضاً: أفضل مدرسين ثانوية عامة بالإسكندرية 2023 – 2024.
مدارس ناشيونال بالإسكندرية عربي ولغات
ودلوقتي هنذكر أهم التفاصيل عن كل مدرسة من العنوان، ورقم التواصل، ومتوسط المصاريف لكل مرحلة، للعام الدراسي 2024 – 2025.
1- مدارس الإقبال القومية (لها فرعين)
من أفضل المدارس ناشيونال بالإسكندرية، وتمتاز بالسُمعة الجيدة عن جودة الدراسة، وبيتوفر فيها قسم عربي، وقسم لغات إنجليزي، مشتركة أولاد وبنات، وفيها كل المراحل لحد الثانوي.
الفرع الأول: 30 شارع الميثاق – السرايا
بيتم فتح التقديم في شهر يونيو، وسن القبول من سن 4 سنوات وحتى 6 سنوات إلا يوم، والقبول بيكون حسب الأكبر سناً.
وبتتميز المدرسة بالعديد من الأنشطة الطلابية، زي: الأنشطة الرياضية، والعلمية، والفنية، والموسيقية، وغيرها من الأنشطة اللي بتوفر جو محفز للطلاب.
المصاريف:
- مرحلة رياض الأطفال: 11149 جنيه مصري.
- المرحلة الابتدائية: 11415 جنيه مصري.
- المرحلة الإعدادية: 11471 جنيه مصري.
- المرحلة الثانوية: 12293 جنيه مصري.
رقم التليفون: 03/3588082
الأقسام: عربي، ولغات ناشيونال إنجليزي.
القسم العربي بيتدرس فيه اللغة الإنجليزية، وبيكون فيه منهج إضافي لمنهج الوزارة.
الفرع الثاني: القرية العاشرة أبيس – طريق الإسكندرية الدائري.
بتتميز بأنشطة طلابية كتيرة لتنمية مواهب الطلاب، بجانب وجود مكتبة كبيرة، وتوفير رعاية طبية للطلبة.
المصاريف:
- مرحلة رياض الأطفال: 12711 جنيه مصري.
- المرحلة الابتدائية: 12860 جنيه مصري.
- المرحلة الإعدادية: 13146 جنيه مصري.
- المرحلة الثانوية: 12365 جنيه مصري.
واليونيفورم بيتم شرائه على حسب الاحتياج بالقطعة، وبيدفع ولي الأمر 5000 جنيه قيمة شير بالمدرسة، وبيستردهم في حالة تخرج الطفل أو تحويله.
ومتوفر خصم للإخوة 5% للأخ التاني، و 5% للأخ التالت، وفي حالة التقسيط للمصاريف فبيكون الخصم من القسط التاني.
الرقم: 03/4305638 – 03/4305639.
الأقسام: عربي، ولغات ناشيونال إنجليزي.
وبنلاقي إن قسم اللغات مشترك وغير مختلط يعني فصل للأولاد وفصل للبنات.
2- محمد كريم القومية (مشتركة)
من أفضل مدارس ناشيونال بالإسكندرية، وبتتميز بالآراء الإيجابية من أولياء الأمور، زي إن اليونيفورم بيتم شرائه بالقطعة حسب الاحتياج، وتقديم خصم 10% للإخوات.
وبإمكان الطلاب القدامى في المدرسة تسديد المصروفات على قسطين.
العنوان: 35 شارع توت عنخ آمون، سموحة، الإسكندرية.
الرقم: 03/4210032 – 03/4210033 – 03/4210036.
المصاريف:
- مرحلة رياض الأطفال: 14455 جنيه مصري.
- المرحلة الابتدائية: 14862 جنيه مصري.
- المرحلة الإعدادية: 15491 جنيه مصري.
- المرحلة الثانوية: 15891 جنيه مصري.
وبيدفع ولي الأمر قيمة الشير 10000 جنيه، بيتدفعوا على 5 مرات (2000 كل سنة)، وبيتم ردهم عند تخرج الطالب أو تحويله.
ومصاريف الباص 3795 جنيه للمناطق القريبة، و4485 جنيه للمناطق التانية.
أقسام المدرسة:
- قسم عربي، بيتم فيه تدريس اللغة الفرنسية أو الإيطالية كلغة تانية، بدايةً من الصف الأول الثانوي.
- قسم ناشيونال إنجليزي.
اقرأ أيضاً: دليل شامل لكل مدارس الدبلومة الأمريكية بالإسكندرية.
مدارس ناشيونال بالإسكندرية لغات فقط
وبيتوفر كمان عدد من المدارس الناشيونال اللغات في مناطق مختلفة من المحافظة، وعددهم 7 مدارس ناشيونال بالإسكندرية.
1- فيكتوريا كولدج (كلية النصر للبنين)
من مدارس ناشيونال بالإسكندرية اللي سمعتها كويسة جداً بين أولياء الأمور، ودا لتواصل المدرسة معاهم بشكل كويس عن مستوى الطالب ووجود أي مشكلة لحلها بمساعدة الأهل.
بالإضافة إن المدرسة بتوفر حضور الحصص أونلاين ودا فرق في وقت الكورونا، وبيهتموا بوجود مشروعات الطلبة يشتغلوا عليها لتنمية مهاراتهم.
وسن التقديم في 1 أكتوبر بلاي سكول من عمر 3 سنين و6 شهور، والـ KG من عمر 4 سنين.
العنوان: 54 شارع الميثاق فيكتوريا، قريب من أمام محطة ترام فيكتوريا، الإسكندرية.
الرقم: 03/3581167 – 03/3581160 – 01221130348.
المصاريف:
- مرحلة رياض الأطفال: 12779 جنيه مصري في السنة (غير متاح تقسيط).
- المرحلة الابتدائية: 18871 جنيه مصري (متاح تقسيط وبيكون القسط الأول 13021 جنيه).
- المرحلة الإعدادية: 22520 جنيه مصري (متاح قسط على مرتين، قسط أول 13021 جنيه).
- المرحلة الثانوية: 31613 جنيه مصري (متاح تقسيط، قسط أول 21286 جنيه).
وبيتدفع قيمة شير للمدرسة 20000 جنيه مصري وبتكون مرة واحدة بعد القبول بالمدرسة، وبتترد في وقت التخرج منها.
أقسام المدرسة:
- قسم ناشيونال إنجليزي (أولاد فقط)، وبيشمل جميع المراحل الدراسية من بلاي سكول للثانوي.
- قسم أمريكاني بيشمل جميع المراحل الدراسية، ومشترك أولاد وبنات.
- قسم بريطاني IG. يوجد في المرحلة الثانوية فقط، مشترك أولاد وبنات.
2- المنار القومية للبنات
واحدة من مدارس ناشيونال بالإسكندرية اللي بتتميز بتنفيذ جزء كبير من رؤيتها بإعداد تلميذ حر سعيد متميز علمياً وخلقياً، وقادر على مواكبة تطورات العصر في ظل مشاركة مجتمعية فعالة؛ ودا بيتم من خلال أنشطة كتير بيقوموا بيها الطلبة بتساعدهم على تنمية مهاراتهم، زي الأنشطة الرياضية، والفنية، وغيرها.
العنوان: 8 شارع أمين فكري، محطة الرمل، الإسكندرية.
الرقم: 03/4861444 – 03/4863213
المصاريف:
- مرحلة رياض الأطفال: 12830 جنيه مصري.
- المرحلة الابتدائية: 12938 جنيه مصري.
- المرحلة الإعدادية: 13989 جنيه مصري.
- المرحلة الثانوية: 13217 جنيه مصري.
وقيمة الشير 10000 جنيه بتتدفع مرة واحدة بعد القبول بالمدرسة، وبتترد لما الطالبة بتتخرج منها.
القسم: ناشيونال إنجليزي.
3- كلية البنات القومية
بتتميز المدرسة بالاشتراك في المسابقات في مختلف الأنشطة في مجالات متنوعة لتنمية مواهب الطالبات.
وبتمنح الطالبات شهادتين: الثانوية العامة المصرية، والدبلومة الأمريكية.
العنوان: 22 شارع أحمد يحيى زيزينيا – الإسكندرية.
الرقم: 03/5820409 – 03/5851775
وبتكون مصاريف الدبلومة الأمريكية بالمدرسة للعام الدراسي 2024 – 2025:
- الصف العاشر: 33948 جنيه مصري.
- الصف 11: 37570 جنيه مصري.
- الصف 12: 42760 جنيه مصري.
قيمة الشير 10000 جنيه، وبتدفع مرة واحدة بعد القبول بالمدرسة، وبتترد لما الطالبة بتتخرج منها.
الأقسام:
- قسم ناشيونال إنجليزي بيشمل جميع المراحل لحد الثانوي.
- قسم أمريكان في المرحلة الثانوية فقط.
- قسم عربي في المرحلة الثانوية فقط.
بيتم تدريس اللغة الثانية (الفرنسية) بدايةً من الصف الرابع، ومن أول الصف الأول الثانوي بيكون متاح الفرنسية أو الإيطالية كلغة تانية.
4- النصر بنين EBS
بتتميز بمنح الطلاب المتخرجين الشهادة المصرية، والشهادة البريطانية، والدبلومة الأمريكية.
دا بجانب إنها من أفضل مدارس ناشيونال بالإسكندرية لإتقان اللغات، زي الإنجليزية، والفرنسية، والإيطالية، وبتتميز بمستوى الطلاب التعليمي العالي، وشعورهم بالانتماء ليها.
العنوان: 134 شارع طريق الحرية، الشاطبي، أمام كلية العلوم، الإسكندرية.
الرقم: 03/5926340 – 03/5926821 – 03/5934917.
المصاريف:
- مرحلة رياض الأطفال: 13293 جنيه مصري.
- المرحلة الابتدائية: 13754 جنيه مصري.
- المرحلة الإعدادية: 13003 جنيه مصري.
- المرحلة الثانوية: 12899 جنيه مصري.
وبيتدفع قيمة الشير 10000 جنيه مرة واحدة، وبتترد بالتخرج أو التحويل، ومصاريف الباص 5400 جنيه (غير إجباري).
الأقسام:
- قسم ناشيونال لجميع المراحل لحد الثانوي. (بنين فقط).
- قسم أمريكان: بيشمل المرحلة الثانوية فقط. (مشترك).
- القسم البريطاني IG بيشمل جميع المراحل. (مشترك).
5- النصر للبنات EGC
بتتميز المدرسة بمساحتها الواسعة ونظافة الفصول، دا غير إن فيها ملعب لكرة اليد، وملعب لكرة السلة، وفيها حوض سباحة كبير، وغرفة تغيير ملابس.
كل مرحلة ليها مبنى مستقل؛ وفيها مسرح وغرفة للموسيقى، فيها كل الأدوات الموسيقية.
وآراء أولياء الأمور والطلبة عنها إيجابي من حيث جودة التعليم، ومعاملة المدرسين، والأنشطة الكتير اللي بيقوموا بيها الطلبة.
العنوان: 15 شارع أحمد حسنين، الشاطبي، الإسكندرية.
الرقم: 03/5821752 – 03/5921753.
بتبدأ المصاريف للعام الدراسي 2024 – 2025م لمرحلة رياض الأطفال من 29000 جنيه مصري، وبتزيد لكل مرحلة.
الأقسام:
- المدرسة فيها نظام الدمج (ذوي الاحتياجات الخاصة).
- قسم ناشيونال إنجليزي يشمل كل المراحل الدراسية.
- قسم دولي بريطاني (IG) يشمل كل المراحل الدراسية.
6- الفراعنة القومية هوم كرافت
واحدة من أهم مدارس ناشيونال بالإسكندرية وأقدمهم، بتتميز بجودة التعليم في جميع المراحل التعليمية.
وتنسيق القبول لسنة 2022 – 2023م وصل لـ 9 مراحل، وبيكون في انترفيو للطفل لقياس مستوى ذكاء الطفل واستيعابه.
العنوان: 7 شارع الفراعنة، باب شرق، الإسكندرية.
الرقم: 03/4862229 – 03/4850594.
المصاريف:
- المرحلة الابتدائية: 13371 جنيه مصري.
- المرحلة الإعدادية: 14273 جنيه مصري.
- المرحلة الثانوية: 13564 جنيه مصري.
قيمة الشير 20000 جنيه وبتدفع مرة واحدة.
الأقسام:
ناشيونال إنجليزي، مشتركة (أولاد وبنات).
7- ليسيه الحرية
تأسست سنة 1909، وليها 3 فروع في القاهرة، وهي من المدارس المشتركة اللي بتمتاز بجودة التعليم وكثرة الأنشطة الطلابية.
العنوان: 119 شارع الإسكندر الأكبر، الشاطبي، الإسكندرية.
الرقم: 03/5925491.
بتبدأ المصاريف من 23000 جنيه مصري لمرحلة رياض الأطفال، وبتزيد لكل مرحلة.
الأقسام:
- قسم فرنسي، وبيتم تدريس اللغة الثانية الإنجليزية بدايةً من الصف الأول الابتدائي، وبتشمل جميع المراحل الدراسية حتى الثانوية، مشتركة (أولاد وبنات).
- قسم إنجليزي.
الفرق بين المدارس الناشيونال والانترناشونال
المدارس الناشيونال هي مدارس حكومية، وبتخصع لرقابة وإشراف وزارة التربية والتعليم، وهي المدارس اللغات أو الخاصة، أما المدارس الانترناشيونال فهي مدارس بتقدم نظام تعليمي مختلف عن منهج الحكومة، وخاص بدولة معينة، وليها منهج خاص بيها تماماً، زي:
- المدارس البريطانية اللي بتتبع نظام التعليم البريطاني.
- المدارس الأمريكية اللي بتتبع التعليم الأمريكي.
وبيتميز التعليم في المدارس الانترناشيونال بتدريس مناهج الدول باللغة التابعة ليها زي المدارس البريطانية والفرنسية، وبتهتم المدارس الدولية بتوفير كل السبل التفاعلية لمساعدة الطلاب على التفكير والإبداع.
أما المدارس الناشيونال بتتميز إن تعليمها تابع للنظام التعليمي المصري، وبيحصل منها الطالب على شهادة الثانوية العامة المصرية، وبتهتم باللغات.
وبيتدرس فيها اللغات من مرحلة الـ KG، وغالباً بتبتدي بالإنجليزية وبعدها الفرنسية والألمانية، وبتتناسب مع متوسطي الدخل، يعني بتتشابه مع المناهج المصرية ولكن بتختلف في اللغات، وطريقة التدريس، ومستوى المعلمين.
أما المدارس الانترناشيونال بيدرسوا المناهج الخارجية الخاصة بأمريكا، أو بريطانيا، وغير تابعة لوزارة التربية والتعليم ولا الإمتحانات، وبيحصل الطالب في نهاية الدراسة على شهادة معتمدة تابعة للدولة المسؤولة، وكمان بتؤهله إنه يكمل دراسته بالخارج.
دا بالإضافة إن المدارس الانترناشيونال بتركز على تنمية وعي الطالب، وتنمية مهاراته من خلال تطبيق أحدث التقنيات التعليمية.
اقرأ أيضاً: الفرق بين المدارس الناشيونال والانترناشيونال في مصر.
الخلاصة
المدارس القومية هي مدارس تابعة للحكومة بمصروفات إضافية، لإنها بتركز على إتقان الطالب للغات، دا غير إنها بتوفر مجموعة كبيرة من الأنشطة اللي بتساعد الطالب على تنمية مهاراته في مختلف المجالات.
وبيتوفر 10 مدارس ناشيونال بالإسكندرية وهما؛ مدرسة الإقبال القومية فرع السرايا وفرع أبيس، ومدرسة محمد كُريم المشتركة، ومدرسة فيكتوريا كولدج، وكلية النصر للبنات، ومدرسة المنار القومية بنات، وكلية البنات القومية، ومدرسة النصر بنين، ومدرسة الفراعنة هوم كرافت، ومدرسة ليسيه الحرية.
وأخيرًا، اختيار المدرسة بيترتب عليه مستقبل طفلك، وطريقة تفكيره، عشان كدا لازم تهتم جدًا بالقرار دا، وتعرف معلومات أكتر عن المدارس المتاحة عشان تقدر تختار الأنسب له.
أضف تعليق