أهم 6 مميزات وعيوب مدارس الراهبات بالإسكندرية

مميزات وعيوب مدارس الراهبات بالإسكندرية؛ واحد من أهم المواضيع اللي بتشغل بال أولياء الأمور اللي بيفكروا لأطفالهم في نظام تعليمي مناسب؛ ولإن محافظة الإسكندرية بتتميز بتعدد أنواع المدارس والأنظمة التعليمية فيها، وكل مدرسة منهم بيكون ليها مجموعة من المميزات والعيوب اللي لازم نعرفها أو على الأقل يكون عندنا فكرة عنها قبل ما نقدم فيها لأولادنا؛ عشان نضمن لهم تعليم بجودة عالية ويكون مناسب لقدراتهم. 

ومن ضمنهم مدارس الراهبات اللي بتتميز باهتمامها بمستوى تربوي عالي للأطفال، وتعليمهم سلوكيات وقيم سامية على مدار دراستهم، إلى جانب اهتمامها بتقديم تعليم يليق بعقولهم وقدراتهم، فبتخرج جيل متميز دراسيًا وأخلاقيًا، ورغم المميزات دي إلا إن لها بعض العيوب اللي بتخلي أولياء الأمور يفضلوا باقي المدارس عنها زي صعوبة التقديم للطالب فيها.

وفي المقال دا هنتعرف أكتر على أهم مميزات وعيوب مدارس الراهبات بالإسكندرية، ونعرف كل ما يخص نظام الدراسة فيها وشروط التقديم لعام 2024 – 2025.

ما هي مدارس الراهبات وأنواعها

هي مدارس بيقوم على إدارتها راهب أو راهبة، والمدارس دي بتكون تابعة للأمانة العامة للمدارس الكاثوليكية بمصر، وبتهتم بتقديم خدمات تعليمية لمراحل التعليم ما قبل الجامعي.

والمدارس دي موجودة في مصر من سنة 1847م، وأول مدرسة اتعملت كانت مدرسة القديس يوسف بالقاهرة، وبعد نجاح تطبيق النظام اللي بتتبعه المدارس دي بدأ التوسع في إنشائها، ومن وقتها وهي حريصة إنها تقدم خدمات تعليمية متميزة بأسعار معقولة ومناسبة لفئة متوسطي الدخل من أولياء الأمور، وأسمى أهدافها هي تربية إنسان سوي يكون قدوة للي حواليه ويقدر يخدم المجتمع وينهض بيه، عشان كدا بيزيد الإقبال عليها كل سنة.

وقبل ما نتكلم عن أهم مميزات وعيوب مدارس الراهبات بالإسكندرية؛ هنتعرف على أنواعها:

1- مدارس فرنسية

مدارس الراهبات الفرنسية هي أكتر مدارس الراهبات انتشارًا، وبيقبل عليها عدد كبير من الطلبة كل سنة؛ لإنها بتهتم جدًا إن الطلبة يتقنوا اللغة الفرنسية، إلى جانب إنهم بيتعلموا فيها مبادئ وقيم سامية بتساعدهم يكونوا أشخاص أسوياء.

ومن أشهر المدارس دي:

• مدارس نوتردام الدليفراند Notre Dame De La Delivrande. 
• مدارس نوتردام دي زابوتر Notre Dame Des Apotres. 
• مدارس الفرير Freres. 

2- مدارس إنجليزية 

المدارس الإنجليزية للراهبات موجود منها حالياََ في مصر 3 مدارس بس أشهرهم مدرسة سان فنسان دي بول الموجودة بشارع أبي الدرداء بالإسكندرية.

وتقدر تعرف أكتر عن المدارس دي من خلال كل ما تريد معرفته عن مدارس الراهبات إنجليزي بالإسكندرية | شروط التقديم والمصاريف. 

3- مدارس ألمانية

توجد في مصر مدرسة راهبات ألمانية واحدة حتى الآن وهي مدرسة سان شارل بورمي الشهيرة الموجودة بالعطارين وليها فروع تانية، ودي مدرسة للبنات بس ومصاريفها بتكون مرتفعة مقارنة بباقي مدارس الراهبات الأخرى.

وبتظهر مميزات وعيوب مدارس الراهبات بالإسكندرية في أكتر من نقطة أولهم نظام الدراسة فيها، عشان كدا هنتعرف على نظام الدراسة بالتفصيل في السطور الجاية.

نظام الدراسة في مدارس الراهبات

مدارس الراهبات في مصر بتحرص إنها تعلم الطلبة النظام والالتزام سواء خارج المدرسة أو داخلها، وبالتالي نظام الدراسة فيها قائم على الحزم واتباع التعليمات؛ عشان تخرج شخص ملتزم مش بيكسر القوانين أو يسبب تخريب لمنشئات وغيره، وبالتالي مش بنسمع أبدًا إن طالب من مدارس الراهبات تسبب في حدوث عمل إرهابي أو أذى لغيره.

والطلبة في مدارس الراهبات إما بيكونوا بنات بس أو ولاد بس -مدارس منفصلة- أو ولاد وبنات -مدارس مختلطة-، والطلبة بيكونوا موجودين مع بعض في كل الحصص ما عدا الحصص الدينية بيبدؤا يفصلوا فيهم الطلبة المسلمين عن الطلبة المسيحيين.

الدراسة في مدارس الراهبات بتكون بنظام الفصل الدراسي زي باقي المدارس المعروفة، وعشان كدا بيعد نظام الدراسة والقواعد الإلزامية للطلاب في كفة المميزات أثناء توضيحنا لمميزات وعيوب مدارس الراهبات بالإسكندرية؛ أما عن مناهجها فهنعرفها دلوقتي.

مناهج مدارس الراهبات

مدارس الراهبات في مصر مش بيكون ليها مناهج مخصصة، هي مدارس عادية بمناهج حكومية، وبيكون فيه منهج إضافي للغات على حسب نوعها، وكل مدرسة بيكون ليها منهج مختلف حسب المدرسة الخاصة المناظرة ليها، بمعنى إن لو المدرسة بتعتبر إن اللغة الفرنسية هي اللغة الأولى فهنلاقي إن المناهج اللي بيتم تدريسها في المدرسة دي هي نفس المناهج الموجودة في المدارس الخاصة الفرنسية، والكلام دا بينطبق على باقي أنواع مدارس الراهبات.

وبعض مدارس الراهبات بتعتمد نظام البوكليت وهو عبارة عن ملزمة لكل مادة للشرح والتدريبات ومتابعة الطالب، ودا بيكون بجانب كتب الوزارة وكتب المدرسة الخاصة باللغات.

وطريقة تدريس مناهج مدارس الراهبات بتكون مميزة جدًا؛ لإن القائمين على المدارس دي بيحرصوا على تعيين مدرسين أكفاء عندهم القدرة على تبسيط المادة العلمية، وشرحها بطريقة تناسب المرحلة العمرية للطالب، وبجانب دا فهما كمان بيساعدوا في تنمية مهارات الطالب وتربيته بشكل إيجابي.

وبعد ما عرفنا تفاصيل المدارس ونظامها ومناهجها جه الدور على مميزات وعيوب مدارس الراهبات بالإسكندرية اللي هنتعرف عليها حالاََ بالتفصيل.

تقدر تتعرف على آراء أولياء الأمور من خلال مجموعة مدارس الراهبات والرهبان والحضانات الفرنسية والإنجليزية في مصر على فيس بوك. 

مميزات مدارس الراهبات

مميزات وعيوب مدارس الراهبات بالإسكندرية بتساعد ولي الأمر يقرر هل المدرسة مناسبة لابنه ولا لأ، وبناءً على القرار دا بيبدأ خطوة، وبالتالي فهو لازم يتعرف عليها بوضوح قبل ما ياخد أي قرار.

ومن أهم مميزات مدارس الراهبات بنلاقي:

الاهتمام بالتربية

مدارس الراهبات زي ما بتهتم إنها تقدم خدمات تعليمية مميزة للطلبة فهي كمان بتحرص إنها تربي جيل واعي ومنضبط وقادر على تحمل المسئولية، وبالتالي فهي بتهتم بشكل كبير بتربية الطلبة، وبتعلمهم العديد من القيم والمبادئ السامية، ودي ميزة بتفتقدها العديد من المدارس الموجودة في مصر.

الالتزام والانضباط

بنكمل في توضيح مميزات وعيوب مدارس الراهبات بالإسكندرية، ومن أهم النقاط اللي بيشيد بيها أولياء الأمور، إن الطلبة في مدارس الراهبات بيحترموا النظام وفاهمين صح يعني إيه انضباط؛ لإن المدرسة بتحرص إنها تزرع فيهم المبادئ دي، وبتبدأ تجني ثمار دا مع الوقت.

ودا من أهم الأسباب اللي بتخلي أولياء الأمور يُقبلوا على المدارس دي كل سنة، ويفضلوها عن غيرها من المدارس الخاصة أو الانترناشونال أو غيرهم.

الاهتمام بتعليم اللغات

مدارس الراهبات بتهتم بتعليم اللغات للطلبة وبتحرص إنهم يتقنوها، فبتخرج طلبة متميزين في اللغات، واهتمام المدارس دي باللغات بيتضح بداية من وقت التقديم، فبنلاقي إنه بيكون في اختبار للطفل في اللغة عشان تتأكد من مستوى الطفل قبل قبوله.

مصاريف مدرسية مناسبة لفئة متوسطي الدخل

بجانب المميزات العديدة اللي بتقدمها مدارس الراهبات بنلاحظ إن مصاريفها بتكون أقل من مصاريف المدارس الخاصة والانترناشونال، فبنلاقي إن متوسط أسعار مدارس الراهبات بالإسكندرية بتتراوح بين 12.000 – 25.000 جنيه مصري لعام 2025م. 

ومن المدارس اللي بتكون مصاريفها عالية هي مدرسة سان شارل الألمانية؛ لإن المصاريف بتوصل لـ 90.000 جنيه مصري، لكن القيمة دي بتكون مناسبة جداََ للمميزات وجودة الخدمة التعليمية اللي بيحصل عليها طلبة المدرسة، عشان كدا بيتهافت عليها أولياء الأمور، وبيفضلوها عن المدارس الخاصة.

مميزات وعيوب مدارس الراهبات بالإسكندرية بتحتاج لدراسة من قِبل أولياء الأمور زي ما ذكرنا، وكمان لازم يعرضوها على أولادهم قبل التقديم عشان يعرفوا هل هيقدروا يلتزموا بقواعد المدارس دي ويعيشوا فيها رحلتهم التعليمية ولا في مدارس تانية هتكون مناسبة أكتر؛ ودا لإن بعض المدارس ممكن تكون مميزة جداً لكن مش مناسبة لطبيعة الطالب أو قدراته.

عيوب مدارس الراهبات

بالطبع كل مدرسة بيكون ليها مجموعة من المميزات والعيوب اللي بنعمل موازنة بينهم قبل التقديم، وبنلاقي إن من أشهر الحاجات اللي بتخلي ولي الأمر يفكر كويس في قرار التقديم لأولاده في مدارس الراهبات:

صعوبة القبول في المدارس

مدارس الراهبات بالإسكندرية بتقبل عدد معين من الطلبة كل سنة، وبيكون الأولوية للأكبر سنًا، لكنها لو اكتفت بعدد الطلبات المسجلة عندها مش هتقدر تقدم لطفلك حتى لو استوفى كل الشروط المطلوبة.

بمعنى إن المدرسة بتقبل من سن 5 سنوات و6 شهور، وبتفضل الأطفال اللي بيكون سنهم قريب من 6 سنوات، فلو طفلك كان عمره 5 سنوات و 6 شهور ممكن ما يتقبلش في حالة إن في طلبة كتير أكبر منه في السنة دي، وبالتالي بيكون دايماََ في صعوبة في القبول في المدارس دي.

الخوف من التأثير على عقيدة المسلم

من المعروف إن اللي بيدير مدارس الراهبات وبيشرف عليها إما بيكون راهب أو راهبة، والطفل بيتخذهم قدوة وبيتأثر بيهم بشكل كبير، وبالطبع عقيدة الطفل المسلم هتتأثر شوية؛ عشان كدا بعض أولياء الأمور بيتجنبوا إنهم يقدموا لأولادهم في المدارس دي وبيفضلوا إنهم يختاروا مدارس أخرى.

لكن النقطة دي عبر عنها بعض أولياء الأمور إن السن دا مطلوب فيه غرس قيم الدين للطفل من خلال النقاش وحفظ القرآن وفهمه لاحترام أديان الآخرين، وبكدا بعض الأهالي بيتلافوا النقطة دي تماماً.

وبعد ما اتعرفنا على مميزات وعيوب مدارس الراهبات بالإسكندرية بالتفصيل هنتعرف دلوقتي على شروط التقديم للمدارس دي.

شروط التقديم لمدارس الراهبات بالإسكندرية

مدارس الراهبات بالإسكندرية بتفتح أبوابها لاستقبال طلبة جدد في شهر يونيو من كل سنة، وأهم شرط بتختار الطالب على أساسه هو إنه يكون أكمل 5 سنوات و6 شهور، وطبعاً الأولوية للأكبر سنًا زي ما ذكرنا.

أما عن الأوراق المطلوبة فهي: 

• صورة من مؤهل الأب والأم (لازم يكون مؤهل عالي) وتكون واضحة.
• صورة البطاقة الصحية المستخرجة من مكتب الصحة.
• أصل شهادة الميلاد المميكنة (الرقم القومي).
• صورة بطاقة الأب والأم وتكون سارية.
• إيصال كهرباء لتحديد محل الإقامة. 
• عدد 8 صور شخصية للطفل/ة.

الأدوات المطلوبة: (قلم جاف أزرق – قلم رصاص – علبة ألوان للطفل/ة – ملف بكبسولة).

ملحوظة: ممكن يكون في تعديل في الأوراق المطلوبة زي إن المدرسة تطلب مستندات أكتر مثلًُا، وبالتالي يفضل التواصل مع إدارة المدرسة قبل التقديم لتجهيز كل الأوراق المطلوبة.

والمدرسة بتتفق مع ولي الأمر على ميعاد لعمل انترفيو بسيط مع الطفل للتعرف على قدراته المختلفة ومستواه في اللغات، وأحياناً بعض المدارس بتتطلب إن ولي الأمر يكون معاه مؤهل عالي؛ عشان تضمن إن هيكون في متابعة مع الطفل في المنزل. 

طريقة التسجيل لمدرسة سان شارل بورمي الإسكندرية 

إجراءات تسجيل الطفلة بالمدرسة بتتم على 4 خطوات بتتمثل في:

1- فترة التسجيل على الموقع

وبيكون في الفترة من 16 نوفمبر  إلى 31 ديسمبر من كل عام، ومتاح التقديم للأطفال من مواليد 1 يوليو 2020 لـ 31 أغسطس 2021، للتقديم للعام الدراسي 2025.

وتملأ الاستمارات باللغة الألمانية أو الإنجليزية، ولا ينظر للاستمارات غير المكتملة.

وفي حالة تعذر الدخول على الموقع لتسجيل البيانات يرجى الذهاب للمدرسة في نفس المواعيد السابقة كل أيام الأسبوع ما عد الأحد والجمعة من 8 ص – 12 م.

2- تسليم طلب التقديم شخصياً للمدرسة

ولتأكيد طلب التقديم على الموقع الإلكتروني، يجب على الوالدين تسليم الأوراق المطلوبة اللي ذكرناها في الفترة من 11 يناير  حتى يوم 18، وتُسدد رسوم التسجيل ولا تُسترد في حالة تراجع الأهل عن التقديم أو عدم قبول الطفلة.

3- اختبارات القبول

بيكون الاختبار في فصول رياض الأطفال، ويُسمح بوجود الوالدين فقط أثناء الاختبار، وبيكون حوالي 60 دقيقة، وعادة بيكون باللغة العربية.

والنتيجة بتُرسل لأولياء الأمور عن طريق البريد الإلكتروني المسجل على الموقع.

وبتحتوي الرسالة على القبول أو الرفض، وفي حالة القبول بيتحدد ميعاد لانترفيو الوالدين، وبيتضاف اسم الطفلة في قائمة الانتظار.

4- انترفيو الوالدين

بيتحدد من 5 – 8 فبراير ، وبيكون للوالدين معاً وبيتلغى في حالة الإخوة لإن بيكونوا عدوا من الانترفيو قبل كدا، وفي حالة القبول أو الرفض بيتبعت إيميل بدا في يوم 17 فبراير.

وبكدا معايير القبول بتعتمد على اختبار الطفلة وانترفيو الوالدين.

قواعد وقوانين مدارس الراهبات

بعد ما اتعرفنا مميزات وعيوب مدارس الراهبات بالإسكندرية وشروط التقديم فيها، لازم يكون عندنا دراية كافية بقواعد وقوانين المدارس دي قبل التقديم.

مدارس الراهبات بتختلف عن غيرها من المدارس في كونها بتفرض الانضباط والالتزام أثناء تواجد الطالب بيها، ومش بتسمح لأي شخص إنه يمارس سلوكيات خاطئة داخل المدرسة، ودي من أهم الخطوات اللي بتسلكها المدارس دي عشان تربي طالب سوي قادر على احترام الإرشادات والتعليمات واتباعها.

بعض الطلبة بيخافوا من قوانين المدرسة دي في البداية وممكن يشعروا بإن حريتهم مكبوتة؛ لإن أي سلوك خاطئ هيعملوه هيسبب لهم مشكلة، لكن مع الوقت بيبدأ الطالب يفهم النظام كويس ويتبع الإرشادات اللي بتقولها المدرسة بدون ما يشعر بأي ضغط حواليه أو ضيق، ودا بيأثر بالإيجاب على شخصيته وتعاملاته سواء داخل أو خارج المدرسة.

ومن هنا بيتضح إن قواعد وقوانين مدارس الراهبات بالإسكندرية بتمثل دور مهم جدًا في تطبيق أهداف المدرسة، وتأثيرها بيكون واضح جداً على الطلبة بعدين.

هل يمكن للطلبة المسلمين الالتحاق بمدارس الراهبات؟

مدارس الراهبات بالإسكندرية بتتيح للطلبة المسلمين فرصة الالتحاق بيها؛ لإن هدفها هو تربية طفل سوي خلوق قادر على الارتقاء بالمجتمع بدون تفرقة بين مسلم أو مسيحي.

لكن نظرًا لإن القائمين على الإدارة إما بيكونوا رهبان أو راهبات فبيكون في تأثير بعض الشيء على عقيدة الطفل زي ما وضحنا، وبالتالي بيفضل ولي الأمر اختيار مدرسة تانية بتقدم نفس الخدمات اللي بتقدمها المدرسة ولكن غير تابعة ليها.

وأخيرًا، التعرف على مميزات وعيوب مدارس الراهبات بالإسكندرية بالتفصيل بيوضح الصورة ليك كولي أمر، وبيخليك قادر تحدد كويس هل المدرسة مناسبة لأولادك ولا لأ؛ عشان تضمن لهم تعليم راقي يساعدهم على التفوق والازدهار ويمكنهم من التأثير بالإيجاب في المجتمع حولهم والارتقاء به.