من أول دخول المدارس الألمانية مصر، وهي لافتة انتباه كتير من أولياء الأمور؛ ودا لكفاءة نظامها التعليمي، والحفاظ على الالتزام والنظام الشديد اللي بتتميز بيه جميع النظم الألمانية.
ولإننا مهتمين بعرض تفاصيل المدارس بالإسكندرية، ففي المقال دا هنتكلم عن المدارس الألمانية بالإسكندرية، وأبرز مميزاتها وعيوبها، وإزاي تقدم لابنك فيها.
ما هي المدارس الألمانية؟
هي مدارس بتعلم الطلاب باللغة الألمانية، وبتديهم فرصة يحصلوا على شهادة معتمدة دوليًا، زي شهادة “الأبيتور” اللي بتفتح ليهم أبواب الجامعات في ألمانيا وأماكن تانية؛ بالإضافة إن التركيز بيكون كبير على الرياضة والفنون عشان يطلعوا جيل متكامل.
وبداية المدارس الألمانية في مصر كانت في إسكندرية سنة 1884، وأول مدرسة هي سان شارل بوروميه، ودي كانت البداية للتعليم الألماني في مصر، بعد كدا المدارس الألمانية انتشرت في أماكن تانية ووصل عددها لـ 7 مدارس في مصر، ومن ضمنهم المدارس الألمانية بالإسكندرية وعددهم 2، وهنعرضلكم كل التفاصيل عنهم في الفقرات الجية.
دا غير إن وزير التربية والتعليم صرح عن اتفاقية جديدة لإنشاء 100 مدرسة ألمانية إيماناً بأهميتها لتنشئة جيل متحدث للغة الألمانية.
ما مميزات المدارس الألمانية؟
تعدد مميزات المدارس الألمانية خلاها خيار أول لشريحة كبيرة من أولياء الأمور، ومن أبرز المميزات دي بنلاقي:
النظام التعليمي المتميز
نظام التعليم الألماني هو واحد من أفضل أنظمة التعليم سواء في مصر أو في العالم، لإن اهتمام المدارس الألمانية بيكون غير منصب على المادة العملية فقط.
لإنها بتهتم كمان بتنمية مهارات الطلاب عن طريق دمج الأنشطة داخل العملية التعليمية، وبالتالي الأطفال بيكتسبوا المهارات اللازمة للتواصل مع زملائهم ومع المدرسين.
وبنلاقي إن نسبة كبيرة من المدرسين بيكونوا ألمان، لنقل التجربة الألمانية بكل تفاصيلها، بالإضافة إن جميع المدارس الألمانية بالإسكندرية حاصلة على شهادات جودة تعليمية.
حصول الطالب على شهادة الأبيتور
المدارس الألمانية بتتبع نظام الأبيتور – Abiturprüfung، واللي بيتمد لحوالي 12 أو 13 عام، علشان يقدر الطالب يتخرج بالشهادة.
بتتجمع نتائج امتحانات أخر سنتين من الثانوية، بالإضافة إلى نتيجة اختبار الأبيتور، وبعد الحصول على الشهادة “واللي بتكون تحت إشراف وزارة التعليم الألماني” بيقدر الطالب يلتحق بالجامعات الألمانية أو أي نظام تعليمي جامعي في العالم.
إتقان الطفل لأكتر من لغة أجنبية
اللغة الألمانية بتكون اللغة الثانية للطالب بعد اللغة العربية، وهي واحدة من أهم اللغات في العالم، وفي الفترة الأخيرة أصبحت مطلوبة جدًا في سوق العمل، وحتى للدراسة في بعض الجامعات.
وكمان بتدي اهتمام كبير لتدريس اللغات الأجنبية الأخرى، فبنلاقي حرص شديد إن الطلاب يتقنوا اللغة الإنجليزية بجانب اللغة الألمانية، وبعض المدارس الألمانية بالإسكندرية بتدرس اللغة الفرنسية من الصف السادس الابتدائي، وبكدا الطفل بيكون معاه 3 لغات غير لغته الأم.
ما عيوب المدارس الألمانية؟
مفيش حد بيختلف على النظام التعليمي المتميز للمدارس الألمانية، واعتمادهم على الفهم في توصيل المعلومة بعيدًا عن الحفظ والتلقين، ولكن فيها بعض العيوب، ومنها:
ارتفاع المصروفات الدراسية
واحدة من أكبر عيوب المدارس الألمانية بالإسكندرية هو ارتفاع أسعارها، وبالنسبة للطلبة الملتحقين بالمدرسة، فبيتم احتساب زيادة سنوية على المصاريف بنسبة من 5 %- 20% على حسب شرائح محددها الوزارة في آخر تصريح ليها للعام الدراسي 2024-2025.
أما الدفعات الجديدة، فبنلاحظ فجوة كبيرة في أسعارها من سنة لسنة، ودا طبعًا بيرجع لمشاكل التعويم وارتفاع سعر الدولار.
صعوبة اختبارات القبول
بسبب العدد المحدود لمدارس الألمانية بالإسكندرية ومصر عمومًا، فالمقابلات الشخصية بتكون أحيانًا صعبة الاجتياز، وطبعًا أنظمة المقابلات بتختلف من مدرسة لمدرسة.
وعلشان كدا لازم الطالب يكون جاهز ومتدرب كويس قبل دخول المقابلة، عن طريق:
- التطوير من قدراته الاجتماعية والحوارية قدر الإمكان
- الحرص على ممارسة الأنشطة
- الاهتمام بتنمية مهاراته
كمان يُفضل إن الطالب ينضم للحضانات الألمانية، وعلى الرغم من إن معرفة أساسيات اللغة الألمانية مش شرط أساسي للقبول في كل المدارس، إلا إنها بتزود فرص القبول.
وبنلاقي إن بعض المدارس بتشترط إجادة أحد الوالدين للغة الألمانية، وأحيانًا بتشترط حصول الوالدين على مؤهل عالي، علشان تضمن متابعة الأهل للمستوى الدراسي للطالب.
صعوبة التحويل
من الأفضل إلحاق الطفل بالمدرسة بداية من المرحلة التمهيدية؛ ودا لإن عمليات التحويل بعد كدا بتكون معقدة، وبتستوجب إن المدرسة السابقة للطفل تكون انترناشونال ألماني، والتحويلات مش بتتقبل من المدارس البريطاني أو الأمريكي أو الفرنسي.
اقرأ أيضًا: أفضل مدارس انترناشونال في الإسكندرية.
قائمة بالمدارس الألمانية بالإسكندرية
تنحصر المدارس الألماني بالإسكندرية في مدرستين، وهما:
1- مدرسة سان شارل بورومي
تأسست مدرسة شارل بورومي سنة 1884 كمدرسة للجالية الألمانية والنمساوية في مصر، وبعد كدا فتحت أبوابها للطالبات المصريات والأجنبيات من الجنسيات المختلفة.
المدرسة بتقع في 32 شارع صلاح الدين، العطارين، الإسكندرية. وتعد من أول المدارس الألمانية بالإسكندرية أو في مصر عمومًا، وبعد نجاح التجربة في الإسكندرية، ومرور 40 عام على افتتاحها تم فتح فرع تاني ليها في القاهرة.
من أبرز خصائص المدرسة دي بنلاقي:
- خريجين المدرسة بيكون معاهم حق الالتحاق بالجامعات المصرية والألمانية، لإن معاهم شهادة الأبيتور.
- خدمات المدرسة في التعليم تُقدم على الطراز الأوروبي الحديث.
- المدرسة غير مشتركة، فهي مخصصة للطالبات فقط.
- التدريس بيبدأ من مرحلة التهميدي وحتى المرحلة الثانوية.
- حاصلة على شهادة الجودة في التعليم.
- تابعة لمدارس الراهبات.
أما عن آراء الطلاب وأولياء الأمر، فكانت غالبية الآراء إيجابية عن المدرسة، وأشادوا بأسلوب التعليم، ومجهود المعلمين العظيم اللي بيتضح على مستوى شخصيات الطالبات ومستواهم الدراسي، وانحصرت تقريبًا جميع المشاكل اللي أولياء الأمور بيواجهوها في المصاريف الغالية للمدرسة، وصعوبة القبول فيها.
طريقة التقديم للمدرسة
ميعاد التقديم بيبدأ من منتصف شهر 11 وحتى منتصف شهر 12 من كل عام، وتُقبل الطالبات من عمر 4 سنوات، وحتى عمر 5 سنوات، والخطوات بتكون:
1- التقديم من خلال الموقع الإلكتروني للمدرسة
يقدر ولي الأمر يسجل من خلال الموقع الإلكتروني Deutsche Schule der borromäerinnen، والاستمارة بتكون باللغات الثلاثة؛ العربية، والألمانية، والإنجليزية، ومش بيتم الأخذ بأي استمارة غير مكتملة البيانات.
2- توجه الوالدين للمدرسة لتسليم المستندات المطلوبة
هنا بيكون مطلوب من أولياء الأمور تقديم شهادة ميلاد مميكنة وصورة شخصية حديثة للطفلة بالنسبة للطالبات المصريات، أما بالنسبة للأجنبيات بيتطلب جواز سفر الطالبة بالإضافة إلى الصورة الشخصية الحديثة.
3- دفع رسوم التسجيل
قيمة التسجيل لعام 2025-2024 حوالي 2000 جنيهًا مصريًا، وبمجرد الدفع مش بيكون مسموح استرداد الفلوس مرة ثانية.
اختبارات القبول
اختبارات القبول بتشمل كلاً من الوالدين والطفل، وعلى أساس المقابلتين بيتحدد قبول الطفل بالمدرسة من عدمه، ومش بيتم إجراء مقابلة القبول مرة تانية للوالدين في حال كان للطفل أخ شقيق في المدرسة.
والمقابلة بتكون في فصول رياض الأطفال، وبتستمر لمدة 60 دقيقة، وباللغة العربية، وبيسمح للأب والأم التواجد من الطفل خلال المقابلة، وبعدها بتتعمل مقابلات الوالدين، واللي بتشترط وجود الأب والأم معًا.
وفي خلال فترة قصيرة بيتبلغ ولي الأمر بنتيجة المقابلة عن طريق رسالة على البريد الإلكتروني.
مصاريف المدرسة
بتختلف مصاريف المدرسة حسب الصف الدراسي وطبعًا من عام لعام، ولكن بلغت قيمة المصاريف لعام 2024-2025 حوالي 90.500 لمرحلة رياض الأطفال، مقسمة على 3 أقساط، وبتوصل لـ 95000 جنيه في الصف الأول الابتدائي، وبتزيد في كل مرحلة.
وبيسدد القسط الأول في موعد أقصاه 2024/08/19، والقسط التاني في شهر 12، والتالت في شهر 3، ودا غير شامل سعر الكتب المدرسية واليونيفورم والباص.
وبالنسبة لخدمة الباص، فالمصاريف بتختلف تبعًا لعوامل كثيرة، زي اختيار خدمة الباص لفترة واحدة أو لفترتين، وكمان باختلاف منطقة سكن الطالبة وبعدها الجغرافي للمدرسة، واللي بتتقسم إلى أربع مناطق:
- المنطقة الأولى: البلد وحتى منطقة الشاطبي.
- المنطقة الثانية: كوبري الجامعة، وحتى سيدي جابر.
- المنطقة الثالثة: سيدي بشر الترام.
- المنطقة الرابعة: ميامي- العصافرة- المندرة.
طرق التواصل مع المدرسة
أرقام التليفونات: 01222494151- 3980155 -3980146 – 3980145
البريد الإلكتروني: dsb-alexandria.de@info
2- مدرسة فيوتشر الألمانية الجديدة بالإسكندرية
هي ثاني مدرسة من المدارس الألمانية بالإسكندرية، تم افتتاحها عام 2017 في شارع البرنس المتفرع من مصطفى كامل، المندرة، بالإسكندرية.
ورغم إنها مدرسة حديثة إلى حد ما، إلا إنها قدرت تثبت نفسها كواحدة من أفضل المدارس الألمانية بالإسكندرية، وفي مصر، وحصلت على ختم جودة كمدرسة ألمانية متميزة خارج ألمانيا ومن الجمهورية الألمانية الاتحادية، لحد ما بقيت منافس لمدرسة سان شارل بورومي العريقة.
المدرسة بتعتمد اللغة الألمانية كلغة التدريس الأساسية، ما عدا مادة اللغة العربية والدين وتاريخ الدولة المصرية، اللي بيتدرس باللغة العربية.
أما بالنسبة للغة الثانية، فالطلاب بيدرسوا اللغة الإنجليزية بداية من الصف الثاني، واللغة الفرنسية بداية من الصف السادس.
والمدرسة مشتركة، وفصولها الدراسية بتبدأ من المرحلة التمهيدية وحتى المرحلة الثانوية، وبنلاقي إن كثافة الطلاب في الفصول متوسطة تقريبًا، فالعدد بيكون من 20 إلى 25 طالب في كل فصل، وبالتالي دا بيزود من استيعاب الطفل للمعلومة، وفي المقابل المدرس يقدر يقسم تركيزه ووقته على عدد محدود من الطلاب.
وعن آراء الطلاب وأولياء الأمور عن المدرسة فهي بتتنوع بين الإيجابية والسلبية، ولكنها بتتميز عن مدرسة سان شارل بورومي بإن احتمالات القبول بها أكبر بكثير من مدرسة سان شارل اللي معروفة بمقابلتها الصعبة.
طريقة التقديم للمدرسة
السن المناسب للتقديم بيبدأ من 3 سنوات للمرحلة التمهيدية، 4 سنوات لحد 5 سنوات للحضانة، والتقديم بيكون في شهر ديسمبر وحتى أول أسبوع من يناير، وعن طريق الفورم اللي بتنزل على صفحة المدرسة، ومع ملء الفورم يجب إرفاق المستندات التالية:
- 6 صور جواز سفر حديثة لمقدم الطلب إذا كان غير مصري.
- صورة من الشهادات الدراسية للوالدين.
- شهادة ميلاد أصلية للطالب.
- 6 صور شخصية حديثة للطالب.
- صورة من الرقم القومي للوالدين.
وبعد إرسال المستندات، بتسدد رسوم التسجيل في المدرسة وقيمتها لعام 2024-2025 حوالي 10.000 جنيهًا مصريًا، وبعدها هيوصل لولي الأمر رسالة إما بالرفض أو بتحديد ميعاد لعمل مقابلة للوالدين، ودا في حال ماكنش عندهم أطفال آخرين مسجلين في المدرسة.
مصاريف المدرسة
بلغت مصاريف مدرسة فيوتشر لسنة 2023-2024 حوالي 37.500 للمرحلة التمهيدية، وحوالي 56.500 جنيه للحضانة، والمصاريف بتكون شاملة الكتب واليونيفورم، وبالنسبة لباص المدرسة فوصل اشتراكه لحوالي 20000 جنيهًا مصريًا، ولمعرفة التفاصيل لمصروفات العام الجديد هيكون من خلال التواصل مع إدارة المدرسة.
طرق التواصل
صفحة التواصل على الموقع الإلكتروني
رقم إدارة المدرسة: 01099922750 – 035333170
الخلاصة
المدارس الانترناشونال أصبحت خيار شائع بين في الفترة الأخيرة بين أولياء الأمور، والنظام الألماني من الأنظمة اللي أثبتت جدارتها في التعليم، وحاليًا بيتوجه ليها اهتمام غير مسبوق لنتائجها المبهرة، ومن خلال المقال قدرنا نقدملكم صورة شاملة عن النظام الألماني، وكل التفاصيل الخاصة اللي محتاج تعرفها عن المدارس الألمانية بالإسكندرية.
وهما مدرستين شارل بورمي، وفيوتشر الألمانية الجديدة، واللي بيتميزوا بنظام تعليمي متقدم، وتركيز على اللغات، واستيعاب الطفل وتنمية مهاراته، بالإضافة لقلة الكثافة الطلابية في الفصول.
وإن عيوبها بتتمحور فقط على ارتفاع مصروفاتها، وصعوبة اجتياز المقابلة،عشان كدا مهم تقيم قدرات طفلك ومقدرتك المادية وتختار الأنسب ليك.
أضف تعليق