أهم 7 معلومات عن مدارس الأورمان الفندقية بالإسكندرية

أهم 7 معلومات عن مدارس الأورمان الفندقية بالإسكندرية

عدم الحصول على مجموع الثانوي العام في الإعدادية مش نهاية لمستقبل الطالب، ففي الفترة الأخيرة بدأت وزارة التربية والتعليم تولي اهتمام غير مسبوق للمجالات الفنية، ودا بسبب زيادة عدد الشهادات الجامعية مقابل عدد غير كافي من العمالة المدربة.

وعشان كدا بدأت الوزارة تشجع افتتاح مدارس على أعلى مستوى لطلبة التعليم الفني، وواحدة من أبرز المدارس دي هي مدارس الأورمان الفندقية.

ومن خلال المقال هنتعرف على النظام التعليمي بمدارس الأورمان، وكمان هنقولك على كل المعلومات اللي محتاج تعرفها عن فرعها في الإسكندرية، وتجربة أولياء الأمور مع المدرسة.

1- ما هي مدارس الأورمان الفندقية؟

مدارس الأورمان الفندقية والكمبيوتر هي مدارس خاصة، بتعرف نفسها كمدرسة فنية للحاسبات، والإلكترونيات، يلتحق بها الطلاب بعد المرحلة الإعدادية، وبتتواجد في عدة محافظات، زي: طنطا، والجيزة، والقليوبية، والإسكندرية.

المدرسة بتكون خيار قدام الطلبة المغرمة بالسفر ومجالات السياحة، ولم يقبلوا بالمدارس الفندقية الحكومية، وكمان الطلبة اللي بيخططوا يلتحقوا بكليات ومعاهد السياحة والفنادق بطريقة أسهل من الثانوية العامة.

وتبعًا للي ذكرته المدرسة على صفحات مواقع التواصل الاجتماعي، فالمدارس دي بتهدف لتقديم تعليم مميز عن طريق نظامها المدمج بالتكنولوجيا الحديثة، وبتقديمها فرص تدريب صيفية في أشهر فنادق ومطاعم مصر، وتوفيرها فرص عمل للطلاب بعد التخرج.

مدارس الأورمان بتوفر نظامين للتعليم الفندقي، وهما نظام الـ 5 سنوات، ونظام الـ 3 سنوات، وفي الحالتين الطالب بيكون عنده الفرصة في الالتحاق بالمعاهد والكليات السياحية الحكومية، وبمجموع أقل من المجموع المحدد لطلبة الثانوي العام، أو الأكاديمية البحرية بالإسكندرية.

خريجي المدارس الفندقية بيكون متاح أمامهم مجالات عمل مختلفة، بالإضافة إلى عملهم في الفنادق والمطاعم، فمثلًا هنلاقيهم مطلوبين في:

  • الضيافة الأرضية أو الضيافة الجوية، بعد الإلتحاق بكليات الضيافة الجوية.
  • مكتب حجز مواقع الطيران.
  • التغذية علاجية.
  • الإرشاد السياحي

وبالنسبة للمواد الدراسية في المدرسة، فالطالب بيدرس:

  • مواد الثقافية: الرياضيات، والجغرافيا، واللغة الفرنسية، واللغة الإنجليزية.
  • مواد تجارية: فن اتصال، وفن اقتصاد، وسكرتارية إنجليزي، ومبادئ المحاسبة المالية.
  • مواد فندقية: أصول فن الطهي، وفن الخدمة، ومدخل صناعة السياحة، والإشراف الداخلي لشركات السياحة.

وبالإضافة للمواد دي، فالطلاب بيدرسوا الكمبيوتر والحاسبات عملي ونظري، ودا اللي بيخلي خريجي مدارس الأورمان مميزين بمعرفتهم لاستخدام تطبيقات الكمبيوتر الحديثة في العمل، مش بس أساسيات الشغل اليدوية القديمة.

المدرسة بتهتم كمان بالتجربة العملية، فبنلاقي إنها مجهزة بمطابخ بتحتوي على أحدث التقنيات المستخدمة في الفنادق والمطاعم العالمية، ومزودة بغرف وسائط متعددة لدمج التكنولوجيا بالعملية التعليمية، وتوصيل المعلومة بأسهل الطرق الممكنة.

وفي الإجازة الصيفية بتسعى المدرسة لإكساب الطلاب الخبرة اللازمة لسوق العمل؛ فبتوفر فرص تدريب صيفية للطلاب في فنادق من أكبر فنادق مصر، زي هيلتون، موفنبيك، جراند حياة، شبرد، ماريوت، ميريديان،شيراتون، وفي سلاسل المطاعم المشهورة زي: كنتاكي، وكوك دور، وتكة، وماكدونالدز، وهارديز.

ومع تخرج الطلاب بيقوم مكتب التوظيف التابع للمدرسة بمساعدتهم في إيجاد فرص العمل المناسبة لهم.

2- أقسام مدارس الأورمان الفندقية بالإسكندرية

مدرسة الأورمان الفندقية بالإسكندرية هي مدرسة مشتركة، وفيها نظام واحد فقط حتى الآن، وهو نظام الـ 3 سنوات، والطالب بيتخرج من المدرسة معاه دبلوم فني متوسط، والمدرسة بتوفر 4 أقسام للطلبة يختاروا بينهم، وهي:

  1. الإشراف
  2. المطعم
  3. الطبخ
  4. الخدمات السياحية

يشمل قسم الخدمات السياحية الضيافة الجوية والأرضية، والإرشاد السياحي، وحجز التذاكر والمقاعد، والطالب بيختار القسم المناسب ليه ابتداءً من الصف الثاني في المدرسة، وعلى أساس القسم اللي الطالب اختاره بيتم تقديم التدريبات الصيفية، وفرص التوظيف بعد التخرج.

3- مميزات مدارس الأورمان الفندقية بالإسكندرية

مميزات مدارس الأورمان الفندقية بالإسكندرية

مدارس الأورمان ليها مميزات كتيرة بتخلي أولياء الأمور يختارها كمدرسة لأولادهم، ومن أبرزها:

  • القبول من مجموع 140 للشهادة الإعدادية فقط.
  • مواد دراسية سهلة، فالطالب مش هيحتاج دروس خصوصية.
  • تدريب صيفي في أفضل الفنادق والمطاعم.
  • ضمان الالتحاق بالكليات أو المعاهد المصرية.
  • تقسيط المصاريف المدرسية وحتى 12 شهر.
  • فصول ومطابخ مجهزة بأحدث التقنيات.
  • ضمان إيجاد فرص عمل بعد التخرج بالمطاعم والفنادق.
  • دراسة الطالب للحاسبات والكمبيوتر في المدرسة.
  • دراسة اللغات الأجنبية زي اللغة الإنجليزية واللغة الفرنسية.
    .

وبالتالي المدرسة بتكون حل مناسب لجميع الطلبة اللي مقدروش يلتحقوا بنظام الثانوية العامة، وفي نفس الوقت بيدوروا على مدرسة يكون ليها مستقبل، وتؤهلهم لسوق العمل.

4- مصاريف مدارس الأورمان الفندقية بالإسكندرية

مدارس الأورمان الفندقية بالإسكندرية هي مدارس خاصة، وعشان كدا بيكون إجمالي مصاريفها مرتفع نسبيًا بالنسبة لباقي المدارس الحكومية، ووصلت إجمالي المصاريف المدرسية في العام الدراسي 2022 إلى حوالي 8650 جنيهُا مصريًا، غير شاملة مصاريف الباص واليونيفورم، واللي بتوصل منفصلة إلى 1750 مصاريف الباص، و 1780 مصاريف الزي المدرسي.

وفي حال قدم الطالب عن طريق الإنترنت، فبيتم خصم مبلغ 1000 جنيهًا مصريًا من إجمالي المصاريف، واحتساب خصم بردو لو الطالب دفع المصاريف كاش في بداية العام.

وتيسيرًا على أولياء الأمور، فالمدرسة وفرت نظام تقسيط لمصاريف المدرسة خلال 12 شهرًا، ويمكن يوصل عدد الأقساط في المدة دي لـ 16 قسط، وبحد أدنى 150 جنيهًا مصريًا للقسط الأول.

فلو هيتم التقسيط خلال 12 شهر، فبتكون الأقساط بداية من القسط الثاني كالآتي:

  • قسط المصاريف المدرسية: 905 جنيهًا مصريًا.
  • قسط اشتراك الاتوبيس 170 جنيهًا مصريًا.
  • قسط يونيفورم المدرسة 200 جنيهًا مصريًا.

وبالتالي بيكون للقسط الشامل لجميع المصاريف حوالي 1275 جنيهًا مصريًا.

وأما لو هيتم التقسيط خلال 16 شهر، فبتوصل قيمة الأقساط إلى:

  • قسط المصاريف المدرسية: 680جنيهًا مصريًا.
  • قسط اشتراك الاتوبيس 140جنيهًا مصريًا.
  • قسط يونيفورم المدرسة 150جنيهًا مصريًا.

بإجمالي مبلغ 970 جنيهًا مصريًا للقسط الواحد.

وكل عام بيكون في لزيادة السنوية في المصاريف، فبيتم احتساب زيادة قدرها 5% على مصاريف العام اللي قبله.

5- شروط التقديم والأوراق المطلوبة

أوراق التقديم بمدرسة الأورمان الفندقية بالإسكندرية

علشان يقدر الطالب يلتحق بمدارس الأورمان الفندقية بالإسكندرية يجب ألا يتجاوز عمره 18 عام، ويكون معاه شهادة طبية تفيد اجتيازه لكشف الهيئة، وإنه لائق للقبول بالمدرسة، وبالنسبة للتنسيق، فالمدرسة بتقبل من 140 درجة، أي مجموع 50% للشهادة الإعدادية، وهي نسبة النجاح.

أما عن الأوراق المطلوبة للتقديم، فولي الأمر بيحتاج إحضار:

  • شهادة الإعدادية.
  • شهادة الميلاد الأصلية.
  • اجتياز كشف الهيئة الطبي.
  • 3 صور بطاقة ولي الأمر
  • 6 صور شخصية حديثة

يمكن التقديم للمدرسة من خلال ملئ الاستمارة الموجودة على الموقع الإلكتروني لمؤسسة الأورمان التعليمية، وبيقفل باب التقديم للمدرسة مع اكتمال عدد الدفعة.

6- طرق التواصل مع مدرسة الأورمان الفندقية بالإسكندرية

المدرسة موجودة في الكيلو 18، أبو يوسف، العجمي، بالإسكندرية، وتقدر تتواصل معاهم من خلال:

صفحة الفيسبوك: مجمع مدارس الأورمان الثانوية الفندقية بالأسكندرية.
رقم التليفون: 01280428802
وتقدر كمان تبعت لهم على الواتس آب من خلال نفس الرقم.

7- آراء أولياء الأمور عن المدرسة

بالنسبة لآراء أولياء الأمور عن المدرسة، فالبعض شايف إن المدرسة بتدي وعود مش بتقدر توفي بيها، وإن المميزات اللي المدرسة بتعرضها على صفحاتها على مواقع التواصل الاجتماعي مش حقيقة، والواقع إن النظام التعليمي لمدارس الأورمان الفندقية بالإسكندرية ما يختلفش كتير عن المدارس الحكومية العادية.

يعني التجربة مش مرضية لعدد كبير من أولياء الأمور، ولسه مدارس الأورمان محتاجة لمراحل كتيرة من التطوير، وعلى أصعدة مختلفة؛ عشان يقدروا يوصلوا للرؤية اللي بيسعوا لتقديمها.

الخلاصة

مدارس الأورمان الفندقية بالإسكندرية هي بديل للثانوية العامة بتؤهل الطالب للعمل في المطاعم والفنادق وبتتيح فرص عمل بعد التخرج.

تبعًا للي بتقوله المدارس دي على صفحات التواصل الاجتماعي فهي بتسعى لتقديم تعليم مميز، لكن دا لسه مش متحقق بنسبة كبيرة في مدرسة الأورمان الفندقية بالإسكندرية.

ولإن خطوة اختيار المدرسة بيترتب عليها مستقبل كامل، فلازم كولي أمر تعرف تفاصيل كتير عن مميزات وعيوب أي مدرسة قبل التقديم فيها لابنك، وبناءً عليه تقرر إذا كانت مناسبة ليه ولا لأ.

دليل المدارس الاسكندرية

ابحث عن المدرسة واحصل علي أدق النتائج وكافة المعلومات.

إقرأ أكثر..

  • لا توجد تعليقات بعد.
  • أضف تعليق