أبرز مميزات وعيوب مدرسة الترسانة البحرية بالإسكندرية

مميزات وعيوب مدرسة الترسانة البحرية بالإسكندرية

إيه هي مميزات وعيوب مدرسة الترسانة البحرية بالإسكندرية؟ 

انتشر مؤخرًا توجه جديد بين طلاب الإعدادية وأهاليهم، وأصبح جزء كبير منهم بيهتم بالالتحاق بمدارس ليها أنظمة مختلفة عن الثانوية العامة، وأحد المدارس دي هي مدرسة الترسانة. 

المدرسة كانت في بداية تأسيسها عبارة عن مركز تدريب مشترك بين مصر وروسيا، ثم تحولت لمدرسة فنية بيلتحق بيها العديد من الطلاب كل سنة. 

في المقال دا، بنوضح تاريخ نشأة المدرسة، وبنتكلم كمان عن أبرز مميزات وعيوب مدرسة الترسانة البحرية بالإسكندرية، وشروط التقديم في المدرسة، وكل المستندات المطلوبة للتقديم فيها خلال عام 2024م. 

ما هي مدرسة الترسانة البحرية؟ 

تعد مدرسة الترسانة البحرية واحدة من أعرق المدارس المصرية اللي بتهتم بمجال الشحن، والتفريغ، والصيانة البحرية للسفن والمراكب، وافتُتِحت المدرسة عام 1963 م في عهد الرئيس الراحل جمال عبد الناصر. 

في البداية كان الغرض من إنشاء المدرسة إنها تكون مركز تدريب مشترك بين مصر وروسيا، ثم في سنة 1965 م تحولت إلى مدرسة رسمية، بتهدف لتخريج أخصائيين وفنيين مصريين متخصصين في مجال الترسانة البحرية. 

وبتتواجد المدرسة في طابية صالح، بجوار قسم مينا البصل، في محافظة الإسكندرية، وبيدرس فيها الطالب لمدة 3 سنوات، وبيحصل بعدها على شهادة الدبلوم اللي بتعادل شهادة الثانوية العامة. 

أقسام مدرسة الترسانة البحرية بالإسكندرية

والمدرسة فيها 7 أقسام يقدر الطالب يلتحق بأي قسم منهم، وهي: 

  1. قسم بدن السفن (أعمال صاج ثقيل). 
  2. قسم الخراطة وتشكيل المعادن. 
  3. قسم محركات الديزل البحرية. 
  4. قسم اللحام والقطع بالغاز. 
  5. قسم التركيبات الميكانيكية. 
  6. قسم التركيبات الكهربائية. 
  7. قسم برادة المواسير. 

تعرف أيضًا على: أشهر 8 مدارس التعليم الفني. 

مميزات مدرسة الترسانة البحرية بالإسكندرية 

مميزات مدرسة الترسانة البحرية بالإسكندرية

قبل الحديث عن عيوب مدرسة الترسانة البحرية بالإسكندرية، لازم نبحث الأول عن مميزاتها، لإنها خيار مميز لطلاب الإعدادية غير الراغبين في التقديم على الثانوية العامة، ومن أهم المميزات دي بنلاقي: 

1- احترافية التدريب 

بتتميز المدرسة باحترافيتها في تدريب الطلاب على كل ما يخص السفن والآلات البحرية، سواء الأعمال الميكانيكية أو الكهربية. 

2- توفير الفرص بعد الدراسة 

تفتح المدرسة الفرصة أمام المتفوقين لاستكمال دراستهم في المعاهد الفنية الحكومية أو الخاصة، وكمان بتأهل الطالب للتقديم والقبول في المعهد الفني للقوات المسلحة بعد التخرج منها. 

3- التجهيزات الحديثة 

بتوفر شركة الترسانة المرافق والتجهيزات الحديثة اللي بيحتاجها الطلبة أثناء الدراسة، زي المختبرات، وورش العمل المجهزة بالتقنيات الحديثة. 

4- توفير فرص العمل 

بترشح إدارة المدرسة الطلبة المتميزين للعمل في ورش شركة الترسانة البحرية، أو في شركات شبهها، بالإضافة لتسهيل التقديم والقبول في وظائف القوات المسلحة المصرية بعد التخرج، دا غير إتاحة فرص للعمل بالمراكب التجارية، أو سفن نقل الركاب. 

5- تسهيل السفر للخارج 

بتزود المدرسة من فرص الخريجين في الحصول على وظائف في الخارج، ودا بسبب إمكانية الحصول على رتبة مهندس سفن بحرية من الدرجة التالتة، وسهولة استخراج جواز السفر البحري. 

لكن كأي مدرسة في أي مكان في العالم، هنلاقي إن زي ما ليها مميزات جذابة، فبرضو ليها بعض العيوب اللي لازم الطالب يكون عارفها قبل التقديم، ودا اللي هنذكره دلوقت. 

عيوب مدرسة الترسانة البحرية بالإسكندرية 

المدرسة ليها عدد من العيوب اللي ممكن تصعب الالتحاق بيها على بعض الطلاب، واللي من أهمها: 

1- قلة عدد الفروع 

المدرسة ليها فرع واحد بس في الإسكندرية، ودي حاجة صعبة على الطلاب غير الراغبين في الاغتراب عن محافظاتهم أثناء الدراسة. 

2- صعوبة نظام المدرسة 

بتتبع المدرسة النظام العسكري، وبالتالي بيخضع الطلاب فيها لنظام صارم من الالتزام والانضباط، وغالباً دا بيكون عكس اللي اتعودوا عليه في مدارسهم في الإعدادية. 

3- زيادة الضغوط النفسية 

أحد أبرز عيوب مدرسة الترسانة البحرية بالإسكندرية هو تعرض الطلاب في المدرسة للعديد من الضغوط النفسية، ودا بسبب طبيعة العمل الصعبة في مجال الصناعة البحرية، وتعرضهم لبعض المواقف الخطرة، بسبب التعامل مع المعدات الثقيلة. 

4- قلة التنوع الأكاديمي 

مفيش في المدرسة تنوع أكاديمي، ودا لأن المدرسة بتهتم بالمواد الخاصة بالهندسة البحرية فقط.

5- ارتفاع المصاريف الدراسية 

بيشتكي بعض أولياء الأمور من زيادة المصاريف الدراسية كل سنة، ودا بخلاف مصاريف الكشف الطبي والطوابع. 

6- طول فترة الدراسة 

تطول فترة الدراسة نسبيًا، مقارنةً ببرامج التدريب المهني الأخرى. 

نصائح للتغلب على عيوب مدرسة الترسانة البحرية بالإسكندرية 

بشكل عام نقدر نقول إن مدرسة الترسانة البحرية هي خيار جيد لمحبي مجال الصناعة البحرية، ودي بعض النصائح عشان يقدروا يتغلبوا على عيوبها:  

  • تقبّل فكرة الاغتراب، وتكوين صداقات جديدة من المدرسة. 
  • الاستعداد الجيد للنظام العسكري، ولطول فترة الدراسة. 
  • الاهتمام بالمذاكرة، للحصول على درجات مرتفعة. 
  • المشاركة في الأنشطة المدرسية باستمرار. 

اقرأ أيضًا: أهم 9 معلومات عن المدرسة العسكرية الرياضية. 

شروط القبول في المدرسة لعام 2024 

بعد معرفة أبرز مميزات وعيوب مدرسة الترسانة البحرية بالإسكندرية، إذا كنت طالب وشايف إنك لسه مهتم بدخول المدرسة، يبقى كمان لازم تفهم كويس أوي إيه هي شروط القبول في المدرسة دي، عشان تعرف تأهل نفسك ليها كويس، والشروط كالتالي: 

  • أن يحصل الطالب على شهادة الإعدادية حديثًا (دور أول)، ولا يتم القبول بشهادة الإعدادية القديمة. 
  • أن يوقع ولي أمر الطالب على تعهد بفصله، في حال اكتشاف تعاطيه للمخدرات. 
  • أن يجتاز الطالب جميع الفحوصات الطبية التي تقرها المدرسة. 
  • أن يجتاز الطالب المقابلة الشخصية، واختبارات اللياقة البدنية. 
  • أن يكون عمر الطالب المتقدم بين 15 إلى 17 سنة. 
  • أن يكون الطالب مصري الجنسية. 

بجانب كل دا، بتشترط المدرسة إن مجموع الطالب اللي هيقدم ميقلش عن 210 درجة لسكان الإسكندرية، و230 درجة لباقي المحافظات، مع الوضع في الاعتبار إن الأرقام دي ممكن تتغير سنويًا، لكنها بتكون أرقام قريبة منها في الآخر. 

وبعد تخطي كل الشروط دي، بيجهز الطالب الأوراق والمستندات المطلوبة من المدرسة، وبيقدمها، ودا اللي هنتكلم فيه دلوقت. 

اقرأ أيضًا: شروط الالتحاق بمدارس البترول بعد الإعدادية. 

الأوراق المطلوبة للتقديم في مدرسة الترسانة البحرية بالإسكندرية

عادةً بيقدم الطلاب الراغبين في الالتحاق بالمدرسة أوراقهم في آخر شهر يونيو لحد نص شهر يوليو، ودي حاجة بتعلن عنها المدرسة كل سنة، عشان لو حصل أي تغيير، وبتكون الأوراق المطلوبة كالتالي: 

  • سحب استمارة الالتحاق بالمدرسة، ودفع مبلغ 200 جنيه (لا تُرد في حالة قبول أو رفض الطالب). 
  • تقديم عدد 2 صورة شخصية حديثة للطالب، مقاس 4*6 بخلفية بيضاء. 
  • تقديم شهادة ميلاد الطالب (بالكمبيوتر)، و 3 صور طبق الأصل منها. 
  • تقديم أصل استمارة النجاح بالإعدادية، و 3 صور طبق الأصل منها. 
  • تقديم عدد 2 صورة بطاقة ولي الأمر، ويجب أن تكون سارية. 
  • تقديم عدد 3 طوابع (دمغة)، من فئة جنيه واحد. 

بعد تقديم المستندات وقبولها بيدفع الطالب أو ولي أمره مبلغ بيتراوح بين 4500 – 5000 جنيه كمصروفات للعام الدراسي الأول، شامل الزي المدرسي والكتب الدراسية، ودا وفقًا لمصروفات آخر سنة، واللي ممكن تزيد مستقبلًا، دا غير مصروفات الكشف الطبي. 

وعشان كدا كتير من أولياء الأمور بيشوفوا إن دا أحد عيوب مدرسة الترسانة البحرية بالإسكندرية، لأن المصروفات مرتفعة مقارنةً بباقي المعاهد الفنية والمدارس الصناعية. 

الخلاصة 

مميزات وعيوب مدرسة الترسانة البحرية بالإسكندرية عديدة ومختلفة، زيها زي أي مدرسة في مصر أو في العالم كله، ومن هنا بيبدأ الطالب وولي أمره يتعرفوا على المميزات والعيوب دي عشان يحددوا إذا كان دا هدفه فعلًا ولا لأ. 

فلو كنت طالب إعدادية وحددت هدفك بالفعل عشان تدخل المدرسة، يبقى ضروري تقرأ عن عيوب مدرسة الترسانة البحرية بالإسكندرية كويس جدًا، عشان تحدد إذا كنت قادر على التأقلم مع العيوب دي ولا مش هتقدر. 

دا اللي قدمناه من خلال المقال، وكمان اتكلمنا عن أبرز الشروط اللي بتطلبها المدرسة عشان تقبل الطلاب اللي هيقدموا عليها، والمستندات الخاصة بكل طالب في مرحلة التقديم. 

دليل المدارس الاسكندرية

ابحث عن المدرسة واحصل علي أدق النتائج وكافة المعلومات.

إقرأ أكثر..

  • لا توجد تعليقات بعد.
  • أضف تعليق