10 معلومات عن مدرسة المتفوقين الثانوية بالإسكندرية (س و ج)

مدرسة المتفوقين الثانوية بالإسكندرية STEM

 

بعد حصول الطالب على شهادة إتمام المرحلة الإعدادية بيبدأ ولي الأمر يحتار في اختيار المدرسة الثانوية المناسبة لابنه؛ لإن بيكون قدامه خيارات كتيرة على رأسهم مدارس الثانوية العامة ومدارس المتفوقين-مدارس ستيم- اللي من أشهرهم مدرسة المتفوقين الثانوية بالإسكندرية.

مدارس ستيم هي مداس بتهتم برعاية الطلبة المتفوقين في مجال العلوم والتكنولوجيا، وبتقدم لهم مجموعة كبيرة من المميزات اللي مش يتكون موجودة في مدارس الثانوية العامة زي إنها بتركز أكثر على التفكير والإبداع، وبتهتم بتطوير مهاراتهم، وغيرهما.

لكن رغم المميزات دي بنلاقي مجموعة من العيوب اللي بتخلي الطلبة وأولياء الأمور يرفضوا التقديم فيها، عشان كدا هنتكلم بالتفصيل عن مدرسة ستيم وخاصة مدرسة المتفوقين الثانوية بالإسكندرية ونعرف أهم المميزات والعيوب الموجودة فيها.

1_ ما هي مدارس المتفوقين للعلوم والتكنولوجيا STEM؟

مدارس المتفوقين للعلوم والتكنولوجيا هي مدارس حكومية بدأ تواجدها في مصر منذ 2011 بهدف رعاية الموهوبين في العلوم والتكنولوجيا وتنمية مهاراتهم عن طريق تطبيق نظام تعليمي أمريكي بيركز بشكل كبير على التطبيق العملي والبحث العلمي اللي بيساعد الطلبة يستوعبوا المادة العلمية أكثر ويعودهم على التفكير وإيجاد حلول بسيطة وفعالة للمشكلات اللي حواليهم، وكمان بيعلمهم يعتمدوا على نفسهم في الحصول على المعلومات؛ لإن الطالب في مدارس ستيم بيكون هو المسئول الأول عن شرح المادة العلمية، والمعلم بيكون دوره إرشادي فقط.

ومن الوقت دا ومدارس ستيم معروفة بإنها من أفضل المدارس اللي بتقدم خدمات تعليمية للطلبة في المرحلة الثانوية وبتأهلهم للكليات العملية.

عدد كبير من أولياء الأمور والطلبة بيعتبروا مدارس ستيم بديل مميز للثانوية العامة في مصر؛ لإن الطالب هنا مش بيكون مضطر يحفظ مواد علمية مرهقة عشان يقدر يحصل على درجات مرتفعة في نهاية العام، كل المطلوب هنا هو إن الطالب يجتهد في البحث عن المعلومات ويعمل الأنشطة المطلوبة بدون أي حاجة إلى الحفظ والتلقين.
يمكنك البحث عن المدارس الحكومية بالإسكندرية من هنا. 

2_ ما هو عنوان مدرسة STEM بالإسكندرية؟

بعد نجاح نظام STEM في مصر بدأ التوسع في إنشاء مدارس المتفوقين في العلوم والتكنولوجيا اللي بتطبق النظام دا لحد ما وصلت إلى محافظة الإسكندرية.

مدرسة المتفوقين الثانوية بالإسكندرية تعد من أشهر مدارس المتفوقين في مصر واللي مازالت بتحرص على تقديم خدمة تعليمية فريدة من نوعها وبتهتم بشكل كبير بتطوير مهارات الطلاب.

توجد المدرسة في مدينة برج العرب الجديدة أمام مسجد دار الأيتام والجامعة اليابانية، وخلف التأمينات الاجتماعية الجديدة، ويمكن التواصل معها لمعرفة تفاصيل أكثر حول نظام الدراسة والمصاريف الدراسية المطلوبة عن طريق صفحة الفيسبوك أو الموقع الالكتروني الخاص بالمدرسة.

3_ كم عدد طلبة مدرسة المتفوقين بالإسكندرية؟

من المميزات الموجودة في مدرسة المتفوقين الثانوية بالإسكندرية إن عدد الطلبة اللي بيتم قبولهم كل عام بيكون محدود جدا مقارنة بباقي المدارس الحكومية؛ ودا لإن المدرسة بتحرص على تقديم أعلى جودة من التعليم وبتهتم بكل طالب على حدة؛ عشان تضمن له استفادة كبيرة من دراسته.

تبعًا لأخر الأرقام المذكورة بنلاقي إن مدرسة المتفوقين الثانوية بالإسكندرية بتقبل حوالي 150 طالب في كل دفعة جديدة من كلا الجنسين، ودا بيثبت فعلا حرصها على جودة الخدمة التعليمية اللي بتقدمها.

4_ ما هو تنسيق مدرسة STEM بالإسكندرية؟

تنسيق مدرسة المتفوقين الثانوية بالإسكندرية

من المتعارف عليه إن جميع مدارس ستيم بتمنح الطلبة في نهاية الدراسة الشهادة المصرية في العلوم والتكنولوجيا، واللي بتكون بمثابة شهادة الثانوية العامة في الشعبة العلمية فبتأهل الطلبة للالتحاق بالكليات العلمية المختلفة زي الطب والهندسة والصيدلة وغيرهم ولكن التنسيق بتاعهم بيكون مختلف عن تنسيق الثانوية العامة.

بنلاقي إن طلبة مدرسة المتفوقين الثانوية بالإسكندرية بيخضعوا لنظام النسبة المرنة عشان يقدروا يلتحقوا بالكليات، بمعنى إن عدد الطلبة اللي اتخرجوا من ستيم بيكون لهم مقاعد محدودة في الكليات، وعدد المقاعد دي بيختلف كل سنة تبعا لمجموع طلبة الثانوية العامة وطلبة ستيم.

النسبة المرنة بيتم حسابها بقسمة عدد طلبة مدارس ستيم على عدد طلبة مدارس الثانوية العامة، ثم ضرب الناتج في عدد المقاعد الموجودة بكل كلية، وبالتالي ممكن الطالب يكون عايز يدخل كلية علمية معينة وما يقدرش يدخلها بسبب إن النسبة المرنة لم تسمح بذلك في السنة دي.

عشان كدا بنوضح إن لو هدف الطالب من البداية هو دخول كلية علمية معينة دون الاكتراث بطريقة تلقيه العلم أو جودة الخدمة التعليمية المقدمة فيفضل اختيار نظام تعليمي آخر غير اللي بيتم تطبيقه في مدارس ستيم، أما إن كان حابب مجال البحث العلمي وبيتطلع إلى التطوير في مجال العلوم والتكنولوجيا فبنلاقي إن مدارس ستيم هي أنسب خيار له في هذه الحالة.

5_ ما هي شروط الالتحاق بمدرسة STEM بالإسكندرية؟

مدرسة المتفوقين الثانوية بالإسكندرية بتضع مجموعة من الشروط اللي لازم تتوافر في الطالب المتقدم؛ عشان تضمن إنه مؤهل فعلا للالتحاق بيها واستكمال دراسته الثانوية فيها، وفي حين سقوط أحد الشروط دي بيكون قدامه فرصة واحدة للقبول هنتعرف عليها، غير كدا بيتم رفض ملف الطالب وبيلتحق بأي مدرسة ثانوية أخرى.

الشروط دي هي:

  • ألا يزيد عمر الطالب المتقدم عن 18 سنة في شهر أكتوبر
  • حصول الطالب على مجموع 98% في المرحلة الإعدادية مع الحصول على الدرجة النهائية في مادة العلوم أو الرياضيات أو اللغة الإنجليزية
  • حصول الطالب على مجموع 95% مع حصوله على الدرجة النهائية في مادتين على الأقل من الثلاثة (العلوم – الرياضيات – اللغة الإنجليزية)
  • اجتياز امتحانات القبول

ملحوظة: في حالة عدم حصول الطالب على الحد الأدنى للالتحاق بمدارس ستيم بيكون لسه قدامه فرصة لو هو حاصل على براءة اختراع معتمدة من أكاديمية البحث العلمي.

6_ ما هي الأوراق المطلوبة للتقديم لمدرسة المتفوقين بالإسكندرية؟

التقديم لمدرسة Stem بالإسكندرية بيكون إلكتروني في البداية من خلال موقع مركز معلومات وزارة التربية والتعليم، وبعدها بيتم طباعة استمارة التقديم الإلكتروني وإمضاؤها من ولي أمر الطالب وتقديمها لشئون الطلبة.

بعدها بيتم تقديم الأوراق المطلوبة وهي كالآتي:

  • طلب الالتحاق
  • 8 صور شخصية للطالب
  • 4 شهادات ميلاد + صور لها
  • بيان نجاح الطالب في المرحلة الإعدادية + 4 صور للبيان
  • إيصال سداد المصروفات الدراسية للصف الأول الثانوي
  • استمارة الكشف الطبي
  • 3 صور للبطاقة الشخصية لولي الأمر
  • إيصال تأمين اللابتوب
  • طوابع بريدية
  • ظرف بلاستيكي

7_ ما هي مصاريف مدرسة المتفوقين الثانوية بالإسكندرية؟

مصاريف مدارس المتفوقين بالإسكندرية

إلى جانب العديد من المميزات اللي بتقدمها مدرسة المتفوقين بالإسكندرية بنلاقي إن مصاريفها محدودة جدا ومناسبة لفئة محدودي الدخل من أولياء الأمور، فالمصاريف بالنسبة للطلبة اللي كانوا بيدرسوا في مدارس رسمية أو رسمية للغات بتكون 1000 جنيه مصري، بالإضافة إلى 2000 جنيه مصري تأمين على اللابتوب اللي بيستلمه الطالب مع بداية دخوله المدرسة.

ملحوظة: الطالب في مدرسة المتفوقين بالإسكندرية أو في مدارس STEM عموما مش بيستلم كتب مدرسية، هو فقط بيعتمد على اللابتوب للحصول على المعلومات المطلوبة منه وتحضيرها عشان يشرحها لزمايله في الفصل تحت إشراف معلم المادة، عشان كدا بيكون مهم جدا إنه يستلم اللابتوب في بداية التحاقه بالمدرسة.

المصاريف اللي تم ذكرها بتكون خاصة بالطلبة اللي حصلوا على الشهادة الإعدادية من المدارس الرسمية أو الرسمية للغات، أما بالنسبة للمدارس الخاصة فهنتعرف على مصاريفها حالًا.

8_ ما هي مصاريف مدرسة STEM بالإسكندرية لطلبة المدارس الخاصة؟

المصاريف اللي بتطلبها مدرسة المتفوقين الثانوية بالإسكندرية من الطلبة اللي حصلوا على الشهادة الإعدادية في مدارس خاصة بتختلف تبعا للمدرسة اللي كان مسجل فيها الطالب، بمعنى إن مدرسة ستيم بتطلب نفس المصاريف اللي كان بيدفعها الطالب في المدرسة الخاصة إلى جانب 2000 جنيه مصري تأمين اللابتوب.

المصاريف في الحالة دي بتكون بالطبع أعلى من المطلوبة طلبة المدارس الرسمية أو الرسمية للغات.

9_ ما الفرق بين الدراسة في مدرسة المتفوقين ومدارس الثانوية العامة؟

المناهج:

الدراسة في مدارس المتفوقين بتختلف تماما عن الدراسة في مدارس الثانوية العامة في طبيعة المناهج والمواد العلمية اللي بيتلقاها كل طالب، فبنلاقي إن المناهج في مدارس ستيم بتكون مناسبة لعقلية الطالب ومدى استيعابه، وبتركز أكثر على التطبيق العملي بغض النظر عن الحفظ.

أما في الثانوية العامة بتكون أغلب المناهج مركزة على الحفظ، والطالب بيضطر إنه يحفظ كل الحاجات المطلوبة منه عشان يقدر يحل كويس في الامتحانات ومنها يحصل على درجات عالية تمكنه من الالتحاق بالكلية اللي حابب يدخلها.

طريقة التدريس:

كمان طريقة تدريس المواد دي بيكون مختلف، ففي مدارس ستيم بنلاقي إن الطالب هو المسئول الأول عن شرح المادة العلمية لزمايله، والمعلم بيكون دوره إرشادي فقط زي ما ذكرنا، وبيكون في نسبة مرتفعة من الدرجات على المشاريع اللي بيعملها الطالب، لكن في الثانوية العامة بيكون المعلم هو المسئول عن الشرح، والدرجات موزعة فقط على الامتحانات اللي بيدخلها الطالب.

اختلاف طبيعة الدراسة في مدارس المتفوقين بالإسكندرية عن باقي المدارس بتكسبها العديد من المميزات، إلا إننا بنلاقي بعض العيوب اللي بتخلي بعض أولياء الأمور يرفضوا التقديم فيها لأولادهم، طيب إيه المميزات والعيوب دي؟ دا اللي هنعرفه حالا.

10_ ما هي عيوب ومميزات مدرسة STEM؟

عيوب ومميزات مدارس المتفوقين STEM

أي نظام تعليمي سواء موجود داخل مصر أو خارجها بيكون له عدة مميزات بتجذب الطلبة وبتخليهم مقبلين عليه، لكن مع الوقت بتظهر مجموعة من العيوب اللي بتخلي الطالب وولي الأمر يفكروا أكثر من مرة قبل يختاروه.

عيوب مدرسة المتفوقين الثانوية بالإسكندرية

من أشهر العيوب الموجودة في مدارس ستيم بنلاقي:

صعوبة نظام الدراسة

نظام الدراسة في مدارس ستيم بيتطلب مجهود كبير جدا من الطالب عشان يقدر يبحث ويحصل على المعلومات اللي محتاج يعرفها ويستوعبها كويس وبعدين يشرحها لزمايله في الفصل، والموضوع بيكون ممتع للطلبة اللي بتحب البحث العلمي، لكن دا ما يمنعش من إن بعض الطلبة شايفين إن الأمر مرهق جدا لهم وصعب إنهم يكملوا فيه.

تطبيق نظام النسبة المرنة

نظام النسبة المرنة اللي بيتم تطبيقه في مدرسة المتفوقين الثانوية بالإسكندرية يعد من أشهر عيوب المدارس دي؛ لإنه ممكن يكون سبب في إن الطالب ما يدخلش الكلية اللي حاببها عشان عدد المقاعد بيكون محدود، وممكن يضطر يلتحق بكلية مش عايزها لنفس السبب، وبالتالي لو الطالب حاطط قدام عينه كلية معينة وحابب يدخلها بغض النظر عن طريقة الدراسة في المرحلة الثانوية فيفضل إنه يلتحق بنظام تعليمي غير ستيم زي ما وضحنا

عدم وجود قسم أدبي

مدرسة المتفوقين الثانوية بالإسكندرية بترعى الطلبة المتفوقين في العلوم والتكنولوجيا، ومش بتهتم بالطلبة اللي ميولهم بتكون أدبية، وبالتالي مش بيكون في فرصة لأي طالب حابب يكمل في المجال الأدبي إنه يلتحق بالمدارس دي.

زيادة الضغط النفسي على الطلبة

امتحانات مدرسة المتفوقين الثانوية بالإسكندرية معروفة بصعوبتها مقارنة بالامتحانات اللي بتكون موجودة في المدارس الأخرى، وبالطالب بيكون عليه ضغط كبير؛ عشان بيكون مطلوب منه يحصل على درجات مرتفعة في الامتحانات دي عشان يقدر يكمل ويلتحق بالجامعة.

مميزات مدرسة المتفوقين الثانوية بالإسكندرية

بتتعدد المميزات اللي بتقدمها مدرسة المتفوقين الثانوية بالإسكندرية، واللي من أهمها:

التطبيق العملي

التطبيق العملي في مدارس ستيم بيكسبها ميزة مهمة جدًا؛ لإن بالطريقة دي بيقدر الطالب يستوعب المادة العلمية أكثر ويفهم كل أبعاد المواضيع اللي بيدرسها، وكمان بتساعده يفكر بطريقة عملية في حل المشكلات الموجودة حواليه.

تدريس مناهج متطورة

تعتمد المناهج اللي بيتم تدريسها في مدرسة المتفوقين الثانوية بالإسكندرية على البحث بشكل أساسي، وبيتضح دا في نظام الدراسة، فبيكون مطلوب من الطالب إنه يبحث في موضوع معين ويجمع أهم النقاط عن الموضوع دا ويعيد شرحها على زمايله في حضور مدرس المادة، ودي ميزة كويسة جدا للطلبة المهتمين بمجال البحث العلمي.

تقديم شهادة تعادل الثانوية العامة

تمنح مدارس ستيم خريجيها شهادة الثانوية المصرية في العلوم والتكنولوجيا اللي بتكون بمثابة شهادة الثانوية العامة في مصر، ومن خلالها يقدر الطالب يلتحق بالكليات المصرية بدون ما يحتاج إلى معادلات أو غيرها.

الحرص على تنمية مهارات الطلاب

حرص القائمين على مدارس ستيم على تقديم أفضل تعليم مش بيخليهم ينسوا تطوير مهارات وسلوكيات الطلبة ومساعدته على اكتساب مهارات جديدة أثناء تواجده بالمدرسة، فالطالب بيتعلم الالتزام والنظام، والمشاركة؛ لإنه يبشتغل مع زمايله لوقت طويل جدًا من اليوم، دا غير إن مدارس ستيم بتساعده على الإبداع والتفكير في حل المشكلات الموجودة فعليًا في البيئة حواليه.

وأخيرًا، إدراك مميزات وعيوب مدرسة المتفوقين بالإسكندرية هيسهل علينا كتير كأولياء أمور وهيساعدنا نحدد بسهولة إذا كانت المدارس دي مناسبة فعلا لأولادنا ولا في مدارس تانية هتكون مناسبة أكثر؛ عشان نضمن لأولادنا تعليم مناسب لقدراتهم وبجودة عالية.

دليل المدارس الاسكندرية

ابحث عن المدرسة واحصل علي أدق النتائج وكافة المعلومات.

إقرأ أكثر..

  • لاليس
    فبراير 14, 2022 في 3:09 ص

    امتحان القبول في ستيم بيبقي يوم واحد ولا مقسم علي عدد من الايام وهل اقدر اتواصل مع حد في المدرسه مثلا ولو نقصت 5 درجات من نتيجة الشهادة الاعدادية الترم الاول والتاني هينفع أتقبل في ستيم

    • Mazen
      مايو 22, 2022 في 7:01 ص

      طب هو لازم يكون الطالب كان في مدرسة خاصة في اعدادي ماينفعش حكومي؟

اضف تعليق