إيه هي أفضل الأنشطة الصيفية للأطفال في الإسكندرية؟
بعد نهاية الفصل الدراسي التاني بتبدأ الإجازة الصيفية الطويلة اللي بتوصل لحوالي 3 شهور ، وخاصةً في حالة الأطفال، ودا بيكون الوقت اللي الطفل بيستناه عشان يخرج، ويتفسح،ويلعب براحته.
وهنا بيبدأ ولي الأمر يفكر في طريقة استثمار دا عن طريق أنشطة صيفية للأطفال مفيدة، عشان يطلع من الصيف وهو متعلم شيء جديد، طيب إزاي نقدر نستثمر الإجازة الصيفية للطفل وتكون مثمرة له بشكل كبير؟
دا اللي هنقدمه من خلال المقال؛ هنتكلم على أفضل الأنشطة الصيفية اللي ممكن الأطفال يقوموا بيها في إسكندرية، ونصائح للاستفادة من الإجازة من غير ضغط على الطفل أو الأسرة.
الأنشطة الصيفية للأطفال في الإسكندرية
فترة الدراسة بتكون فترة ضغط كبير على الأطفال من المدرسة من الواجبات والمذاكرة والدروس، وبالتالي بيقل وقت ترفيه الطفل، وبيكون مرهق من المجهود اللي عمله طول اليوم.
بتيجي الإجازة كفرصة مهمة للانطلاق والترفيه للطفل، ومهم جداً وجود أنشطة للطفل، للاستفادة من إجازة الصيف، ودي أهم الأنشطة:
1- الخروج للبحر
قضاء يوم كامل على واحد من شواطئ الإسكندرية واحد من أمتع الأنشطة الصيفية للأطفال في الإسكندرية، ودا للترويح عن الطفل، وتقضية طول اليوم في اللعب بالرمل أو في البحر، وفي حالة الأطفال الأكبر سناً، يقدروا يقوموا بعدد من الأنشطة الموجودة على الشواطئ، زي:
- ركوب مركب.
- الألعاب المائية.
- الباراشوت.
- لعب الكرة.
البحر من الأماكن المحببة لمعظم الأطفال، ومن أكتر الأماكن اللي الطفل بينبسط بيها، وبيخرج فيها طاقة كبيرة، ويمكن تكرار يوم البحر مرة في الأسبوع طوال الإجازة في حال الظروف سمحت بكدا، أو السفر لمدة على واحد من الشواطئ الأخرى.
2- الطبخ
الطبخ من أفضل الأنشطة الصيفية للأطفال في الإسكندرية أو غيرها، وبيعود على الطفل والأسرة بفوائد كبيرة زي:
- بيقوي الشعور الأسري، وروح المرح، فمشاركة للطفل في عمل الحلوى المفضلة له أو أكلة بيحبها بيضيف المرح لليوم.
- بيعزز احترام الذات عند الطفل، لإنه بيحس بالإنجاز وتقدير الذات عشان قدر يعمل وجبة من الصفر أو يشارك فيها.
- بيزود من حماس الطفل تجاه الأكل لإنه هو اللي مشارك فيه.
- بيعزز العمل الجماعي وروح التعاون عند الطفل.
- بيزود الخيال والإبداع عند الأطفال.
ممكن الأب والأم يثبتوا النشاط دا مرتين أسبوعياً، وينظموا مع طفلهم أيام ووصفات معينة، ويساعدوهم فيها، وبمرور الوقت ممكن الأطفال هما اللي ينفذوا الوصفات لوحدهم.
3- الرحلات
واحدة من أفضل الأنشطة الصيفية للأطفال في الإسكندرية أو في أي محافظة تانية هي الرحلات، لإن لها فوايد كبيرة لنفسية الطفل، ومنها:
- اكتساب مهارات جديدة وأنشطة جديدة وتقضية وقت ممتع.
- تحسن صحته النفسية نتيجة لتغيير المكان والأشخاص.
- البُعد عن رقابة الأهل، وتصرف الطفل بمسؤولية.
- تعزيز روح المغامرة عند الطفل، والشجاعة.
- تحسن مهارات التواصل مع الآخرين.
ودا بيكون بسماح الأبوين للطفل برحلة آمنة ومناسبة لسنه، ومعرفة الناس المصاحبة له.
4- زيارة المتاحف
واحد من الأنشطة الثقافية المهمة للطفل، هي زيارة المتاحف والمعالم الآثرية لمعرفة حضارة البلد، وتثقيف الطفل بمعلومات مهمة.
ودا من خلال التخطيط لزيارة المتاحف الموجودة بالإسكندرية، زي:
- المتحف اليوناني الروماني.
- متحف المجوهرات الملكية.
- متحف الإسكندرية القومي.
- متحف الأحياء المائية.
- متحف الآثار الغارقة.
الرحلة دي هتكون من أهم الأنشطة الصيفية للأطفال في الإسكندرية؛ لإنها خبرة جديدة للطفل، وهتوسع مداركه ومعرفته، وهتفيده فإنه يشوف الأماكن دي مش بس يشوفها في الكتب.
5- المعسكرات الصيفية
واحدة من الانشطة المهمة للطفل هي المعسكرات الصيفية، لإنها بتعود على الطفل بفوائد كبيرة زي:
- استراحة من الشاشات، وقضاء وقت في الطبيعة.
- تعلم الاستقلالية، وزيادة الثقة بالنفس عند الطفل.
- قضاء وقت ممتع في بيئة جديدة عليه.
- تكوين صداقات جديدة، وصنع ذكريات.
- تحسن المهارات، وتعلم أنشطة جديدة.
أهم شيء يكون الطفل في سن يسمح له إنه يعتمد على نفسه، والأفضل من سن 10 سنوات، والمدارس حالياً أصبحت بتحرص على وجود نشاط المعسكر في الإجازة، لأنها من أهم الأنشطة الصيفية للأطفال في الإسكندرية أو غيرها، ومفيدة جداً ليهم، فبيكون الأهل مطمنين على أولادهم، وممكن يروح أي معسكر صيفي لأكاديمية معروفة، والاستفادة من النشاط ده هيكون تجربة جديدة له.
اقرأ أيضاً: أفضل أماكن خروج في الإسكندرية للأطفال | تعرف على 16 مكان.
6- التنزه في أماكن طبيعية
بيتواجد أماكن طبيعية وحدائق مفتوحة لقضاء يوم عائلي لطيف مع الأسرة، زي:
- المعمورة.
- المنتزة.
- الحديقة الدولية.
- حدائق أنطونيادس. وغيرها من الأماكن في الإسكندرية.
بإمكانكم تقضية يوم كامل مع الطفل، وممارسة أنشطة كتير معاه زي: اللعب بالكرة أو الدراجة الخاصة بيه في مساحة كبيرة من غير قيود، أو لعبة جماعية زي السباق، أو نط الحبل، دا هيفرق جداً في تحسن نفسية الطفل والبعد عن ملل تمضية يوم كامل في البيت.
7- قراءة الكتب
من أفضل الأنشطة الصيفية للأطفال، وفرصة لعادة مفيدة يكتسبها، ودا بيكون باختيار الكتب المناسبة لسن الطفل، والمواضيع الشيقة والمهمة اللي هتجذبه وتخليه يقراها.
فوائد القراءة كتير للطفل، زي:
- زيادة الحصيلة اللغوية والثقافية.
- تحسن القراءة عند الطفل.
- تقوية الذاكرة.
- التقليل من التوتر.
- زيادة المعرفة.
- النوم بشكل أفضل.
- ارتفاع معدل الذكاء.
- زيادة القدرة على التخيل.
ودي هتكون نقطة مهمة لو الطفل مش متعود عليها، هيكون قدامه فترة الصيف يكتسب العادة، وتقدروا تختاروا مع بعض عدد من الكتب عشان يقراها خلال الإجازة، مع وضع ساعات معينة للنشاط دا في اليوم بالإتفاق معاه.
8- الاشتراك في دورات لتحسين اللغات
من أفضل الأنشطة الصيفية للأطفال في الإسكندرية هي تعلم لغة خارج إطار الدراسة، في أماكن تسمح للطفل بالتمتع بتعلم اللغة من خلال الأنشطة وخلق بيئة مختلفة عن ضغط المدرسة.
وده هيعود على الطفل بفايدة كبيرة، زي:
- توسيع مدارك الطفل، ورفع قدراته الاستيعابية.
- إمكانية التحاق الطفل بمدارس اللغات.
- فتح مدارك جديدة للطفل.
- ارتفاع قدرة العقل للتخزين.
أهم شيء هو التركيز على المكان اللي الطفل هيتعلم فيه، ويكون مكان بيعتمد على أساليب ترفيهية للتعلم، لإن الطفل في إجازة، ومحتاج يحس إن مفيش ضغط زي المدرسة، عشان يقدر يحبه ويكمل الدورة، ومش شرط بس يكون لغة، ممكن:
- دورة برمجة.
- دورة رسم.
- تعلم آلة موسيقية.
- تعلم فن معين.
كل دا في إطار تعلم شيء جديد ومفيد للطفل بشكل ترفيهي.
9- الرياضة
الرياضة لا غنى عنها، وأصبحت من الأمور اللي الأسرة بتهتم بيها من سن صغير، لكن إجازة الصيف هتسمح للطفل بممارسة رياضة جديدة محببة له كان صعب يمارسها وقت الدراسة.
من فوائد الرياضة للطفل:
- تعزيز مناعة الطفل، ومقاومة الأمراض، زي القلب والسمنة.
- نمو عضلات وعظام الطفل بشكل سليم وصحي.
- إكساب الطفل شكل جسم سليم وصحي متوازن.
- تحسن صحة الطفل، وإخراج طاقته في شيء مفيد.
وعشان كدا الرياضة من أهم الأنشطة الصيفية للأطفال في الإسكندرية، وكمان مهمة في وقت الدراسة طالما مش هتعطل الطفل عن مذاكرته أو تضغطه.
10- الألعاب الترفيهية
الألعاب الترفيهية لا غنى عنها للطفل، وبتكون مصدر سعادة كبير له، ودلوقتي اتوفر في الإسكندرية عدد كبير من الأماكن المخصصة للأطفال، زي: ملاهي المعمورة، وكرامنتس، وجرافيتي كود، وغيرها من الأماكن المحببة للأطفال.
والنشاط دا يمكن تكراره على حسب ظروف كل أسرة، وفي الأول هنحاول نفهم الطفل إنه يختار عدد ألعاب معين، ونفهمه اليوم هيمشي إزاي، وإن له مصروف محدد للألعاب، دا بيخليه يتحمل المسؤولية، ويساعده على حسن الاختيار.
11- أنشطة مكتبة الإسكندرية
من أهم الأنشطة الصيفية للأطفال في الإسكندرية هي زيارة المكاتب وتعلم مهارات جديدة، ومن ضمن الأحداث المهمة هي تنظيم مكتبة الإسكندرية لنشاط صيفي مكثف للأطفال، بيبدأ في شهر يونيو وبيستمر لحد شهر سبتمبر، بيشمل أنشطة ثقافية، وفنية، وعلمية، وترفيهية متنوعة تناسب الميول المختلفة، بالإضافة لمحاضرات توعية للأطفال عن الصحة والتغذية والإسعافات الأولية وغيرها من المعلومات المفيدة.
وبتستقبل المكتبة الأطفال من سن 6 سنوات لسن 18 سنة، وبتختلف الأنشطة تبعاً للسن، فبيكون الأطفال من سن 6 – 7 سنوات مجموعة، ومن 8 – 11 مجموعة، ومن 11 – 18 سنة مجموعة، وبيضم البرنامج اجتماع لأولياء الأمور، وفي نهاية الإجازة الصيفية بيكون فيه حفل تكريمي بيستلم فيه الأطفال شهادات تقدير وكتب لتشجيعهم وتفوقهم في الأنشطة الصيفية.
وبتتنوع الأنشطة بين برامج لتنمية مهارات الكمبيوتر والإنترنت، وورش فنية وعلمية، وعروض أفلام، وتنفيذ عروض مسرحية، ودورات لتعليم الرسم، وسلسة لقاءات محاضرات عن الأدب والكتابة العربية.
بالإضافة إن مركز القبة السماوية بيقدم برنامج “نادي الشطرنج” بالتعاون مع الاتحاد المصري للعبة الشطرنج، ودا للأطفال والشباب من سن 6 – 16 سنة، وهدف البرنامج تنمية القدرات الذهنية للأطفال، ومساعدتهم على توسيع مداركهم وقدراتهم الإبداعية.
وبرنامج “الإلكترونيات والروبوتكس” بيقدمه المركز بالتعاون مع الأكاديمية العربية للعلوم والتكنولوجيا والنقل البحري للشباب من سن 12 – 16 سنة، لزيادة وعي الشباب بأحدث التقنيات التكنولوجية.
وبيقدم مركز الخطوط بالمكتبة مجموعة من الأنشطة الثقافية السنوية، من ضمنها ورشة تعليم الهيروغليفية والخط العربي للأطفال، بيتعلم فيها الأطفال أساسيات الحضارة المصرية القديمة واللغة.
وينظم متحف الآثار بمكتبة الإسكندرية، نشاط التربية المتحفية للأطفال والشباب من سن 9 – 16 سنة، بيشمل عروض أفلام وورش عمل، زي:
- الحفر على الجبس.
- الرسم على التوال.
- التشكيل والنحت.
- الطباعة بالألوان.
- تشكيل البلايستوسين.
دي كانت أبرز الأنشطة الصيفية للأطفال في الإسكندرية اللي تقدر من خلالها تفيد طفلك، لكن إيه النصائح اللي ممكن تساعدك تستغل الإجازة بأفضل شكل؟
أهم النصائح للاستفادة من الإجازة الصيفية لطفلك
مفهوم الإجازة عند الأطفال هو الراحة الزايدة، والسهر، والقعدة قدام الشاشات لفترات طويلة، ولكن إزاي الأهل يقدروا يفيدوا طفلهم من الإجازة من غير ما يضغطوا عليه؟.
أهم النصائح لاستخدام الإجازة في شيء إيجابي للطفل، والاستفادة من الأنشطة الصيفية للأطفال اللي هتخططوا ليها:
- التركيز على الترفيه للطفل، ونبعد مفهوم إن اللعب مش مفيد له؛ لإن اللعب إيجابي جداً لصحة الطفل النفسية، ومهاراته الحركية.
- تقليل وقت الطفل قدام الشاشات من تليفزيون والموبيل قدر الإمكان، والأفضل يكون له وقت محدد، وتحت رقابة على اللي بيعمله.
- تقديم الأمور المحببة للطفل، لو تمرين معين كان متأجل بسبب الدراسة، بيفضل الملاهي، بيفضل البحر أكتر، ممارسة هواية معينة وهكذا.
- الموازنة بين الأنشطة اللي الطفل بيميل ليها وبين الأنشطة اللي حابين إنها تدخل في روتينه الصيفي، ويستفيد بيها.
- التغيير في روتين الطفل، ونخليه يشوف ناس جديدة من الأهل ويتعرف عليهم.
- الاعتماد على الأماكن الطبيعية والمساحات الواسعة لترفيه الطفل.
- منع بدء الدروس الخصوصية للعام الدراسي الجديد بدري.
والأهم من كل دا هو ترتيب الأنشطة اللي هتقوموا بيها معاه، وتنظيم الوقت عشان يناسب وقت الأب، وكمان حساب تكلفة الأمور دي مهم جداً قبل ما تقولوا لطفلكم عشان ما يكونش ضغط عليكم، فالأهم من عدد الأنشطة، تنفيذ وعدك مع طفلك بالأنشطة اللي وعدتوه بيها، واللي تقدروا تقسموها خلال الإجازة كلها في شكل خطة، وتقولوا لطفلكم عليها لتشجيعه لتنفيذها.
وأخيراً، لازم كولي أمر تفكر في أنشطة مفيدة للأطفال لاستغلال فترة الصيف، وتعلم مهارات جديدة، واكتساب عادات صحية ومتوازنة، ذكرنا أكتر الأنشطة الصيفية للأطفال في الإسكندرية اللي تقدر تنفذها، وتفيد طفلك بيها.
أضف تعليق