أشهر 7 أماكن تدريب كرة السلة بالإسكندرية

بتدور لطفلك على رياضة يمارسها في الأجازة؟ 

كرة السلة هي خيار مميز لطفلك بداية من عمر 4 سنوات، ودا لإن اللعبة من الرياضات الشهيرة اللي بتساعد الطفل في بناء عضلاته، وبتديله فرصة تكوين صداقات صحية جديدة. في المقال دا بنقدملك قائمة بأفضل 7 أماكن تدريب كرة السلة بالإسكندرية.

تابع معانا عشان تقدر تختار المكان الأنسب، والأقرب ليك.

كيفية اختيار مكان التدريب المناسب لطفلك

رياضة كرة السلة ليها فوايد كبيرة لجسم الطفل على المستوى البدني والنفسي والشخصي، فتبعاً لدراسة اتنشرت على موقع ResearchGate وجدوا إن الأطفال اللي بتلعب كرة السلة عندهم احترام لذواتهم بشكل أكبر عن غيرهم من الأطفال.

دا غير إنها بتحسن مهارات حركية مختلفة عن باقي الرياضات زي زيادة سرعة الحركة، والدقة والقوة في المساحات الثابتة والديناميكية تبعاً لمقال آخر اتنشر على موقع ResearchGate.

وتطور طفلك في لعبة زي كرة السلة، مش بس بيعتمد على مهاراته وقدرته على التعلم، لكن كمان بيرجع لعامل تاني مهم، وهو مكان التدريب؛ فمن أهم عوامل اختيار أماكن التدريب للعبة كرة السلة هي:

1. اهتمام المكان بتطوير مهارات الطفل سواء على المستوى الشخصي أو الاحترافي. 
2. كفاءة المدربين المسؤولين عن طفلك، ومعرفتهم بكيفية التعامل مع الأطفال.
3. إمكانية المشاركة في المسابقات والبطولات، لتشجيع الطفل على الاستمرار.
4. قرب أو بعد المكان عن البيت، عشان يسهل على الأهل، وتوفيراً للوقت.

ومن هنا، بنقدملك قائمة بأشهر أماكن تدريب كرة السلة في الإسكندرية، تقدر تختار لطفلك الأنسب ليه وليك.

أشهر 7 أماكن تدريب كرة السلة بالإسكندرية

تضم مدينة الإسكندرية مجموعة كبيرة من الأكاديميات والنوادي العريقة، ومنها اللي بيهتم بالرياضات بشكل عام، والمتخصص في كرة السلة بشكل خاص، ومن أشهرهم:

1- نادي الإسكندرية الرياضي

تأسس نادي الإسكندرية الرياضي سنة 1890م، وبيسعى طوال فترة تواجده لتقديم رياضات فنية تساعد الشباب والناشئين على الوصول لأعلى المستويات البدنية.

النادي بينفرد بمميزات كبيرة بتسمح له يحتل المراتب الأولى ضمن أفضل أماكن تدريب كرة السلة بالإسكندرية، ومنها:

• توفير رياضات مختلفة زي: كرة السلة، والقدم، والاسكواش وغيرها.
• وجود مدربين متخصصين، ومديرين فنيين.
• المشاركة ببطولات محلية وعالمية.
• تدريب أطفال وناشئين.

وتقدر كولي أمر تعرف كل أخبار النادي، واللاعبين، والمباريات المحلية والدولية، وتألق الأبطال من خلال الموقع الرسمي لنادي الإسكندرية الرياضي.

والنادي بيقبل الأطفال في تدريبات كرة السلة تحت 9 سنوات، بهدف بناء لاعبين محترفين في نهاية الفترة التدريبية، عشان كدا بيظهر في صورة مدرسة متكاملة لتنمية مهارات الناشئين في لعب كرة السلة، ودا بيخليه من أحسن أماكن تدريب كرة السلة بالإسكندرية.

وتقييمات النادي مرتفعة جدًا بمعدل 9600 تقييم على Google، والـ Rate بتاعه 4.6، ومن ضمن الـ Reviews إنه:

• نادي عريق، وعلى قدر عالي من المسئولية تجاه لاعبيه.

• أفضل النوادي نظراً لمستواه الراقي.
• يتميز باهتمامه بالألعاب الجماعية.

ورغم المميزات إلا إن البعض بيشوف ارتفاع قيمة الاشتراكات كأحد عيوب النادي؛ فسعر العضوية في النادي بتبدأ من 450 ألف جنيه، وبالتالي بيكون مناسب لبعض الفئات فقط.

عنوان النادي: قسم سيدي جابر – سبورتنج – الإسكندرية.

رقم التليفون: 03/5458044.

الإيميل: [email protected]

2- نادي سموحة

بيصنف نادي سموحة ضمن أقدم وأعرق نوادي الإسكندرية اللي بيهدف لنشر الثقافة الرياضية، والترفيهية على مستوى جميع الألعاب الرياضية. 

النادي بيضم ألعاب متعددة منها:

• ألعاب التنس والبادل.
• لعبة كرة السلة.
• لعبة كرة القدم.
• ألعاب البلياردو.
• ألعاب الجمباز.
• ألعاب القوى.

كمان بيتميز بانفراده بمستوى مدربين عالي جداً؛ بهدف إنشاء جيل رياضي رفيع المستوى للمشاركة في البطولات المحلية والدولية والفوز بيها.

ومن هنا، نادي سموحة بيحتل مكانه بجدارة ضمن أفضل أماكن تدريب كرة السلة بالإسكندرية، وبيقبل الأطفال من عمر 10 سنوات من مختلف الجنسين، حتى وصولهم لبطولات كأس العالم لكرة السلة.

والنادي بيكسر معدل التقييمات على Google ووصل لـ 9200 تقييم، والـ Rate بتاعه 4.5، ومن بين الـ Feedbacks من اللاعبين وأولياء الأمور إنه بيتميز بالتالي: 

• إدارة ومدربين ناجحين وممتازين جداً في تعاملهم.
• توفير جميع الرياضات المهمة للأطفال والناشئين.

وبالإضافة لكل المميزات السابقة النادي بيوفر موقع رسمي لعرض جميع أخبار الرياضة على مستوى الجمهورية.

وكمان أخبار النادي والنشاطات اللي بينفذها، دا غير توفير متجر إلكتروني، واللي بيضم مجموعة كبيرة من الملابس الرياضية، والأدوات الأصلية.

والألعاب الرياضية متاحة للأعضاء فقط.

عنوان النادي: سموحة، إسكندرية.

رقم التليفون: 03/4257324.

الإيميل: [email protected] 

3- نادي FORZA 

الهدف الأول لنادي FORZA الرياضي هو بناء أبطال ولاعبين على مستوى محترف بهدف المنافسة والفوز في المباريات على جميع المستويات، ودا بيخليه يهتم بتطوير الأطفال واللاعبين في مختلف الأعمار في جوانب متعددة، زي:

• الجانب التعليمي.
• الجانب النفسي.
• الجانب البدني.
• الجانب الفني.

ومن هنا كان ضروري يبقى ضمن قائمة أفضل أماكن تدريب كرة السلة بالإسكندرية.

والنادي بيقبل الأعمار بداية من 4 سنوات وحتى 20 سنة (بنين وبنات)، دا غير إن التدريب بيكون بمعدل 3 مرات أسبوعياً، ودا بيدل على مدى الجدية والاهتمام.

وبينفرد النادي بتوفير ألعاب كتير مختلفة زي كرة القدم، والتايكوندو، وكرة السلة وغيرها، ودا بيسمح له يكون من أفضل الأماكن الرياضية. بالإضافة لوجود مميزات كتير للاعب، منها توفير:

• مُعدين نفسيين بهدف الإشراف على حالة اللاعب النفسية.
• مدربين لياقة بدنية للوصول لمستوى عالي من اللياقة.
• كوادر فنية على مستوى عالي لتدريب المشاركين.
• أطباء أخصائيين تغذية، لمتابعة الحالة الغذائية.

دا غير إنه بيوفر تقييمات لقبول لاعبي كرة السلة، وبيتم الإعلان قبلها عن المواعيد والأماكن على صفحة الـ Facebook الخاصة بيه.

العنوان: المدينة الجامعية – عزبة سعد سموحة – سيدي جابر – الإسكندرية.

رقم التواصل: 01286023067.

البريد الالكتروني: [email protected].

4- أكاديمية Alex Talent Basketball 

الأكاديمية بتنفرد بميزة تأهيل لاعبيها في كرة السلة كونها من أوائل الأكاديميات المتخصصة في اللعبة، ودا بيخليها من أفضل أماكن تدريب كرة السلة بالإسكندرية.

بالإضافة إلى إنها بتسعى دايماََ لرفع مستوى اللاعبين عن طريق استضافة مدربين كبار، ومديرين فنيين بهدف الإرشاد الفني والتعليمي، وإلقاء محاضرات عن مهارات اللعبة.

وكمان بتقيم مباريات ودية في الملاعب الخاصة بيها؛ عشان تزود من مستوى طفلك، ويكتسب مهارات بدنية وتحليلية في لعبة كرة السلة. 

والفيديوهات على صفحة الأكاديمية بتبين مهارة الأطفال في اللعب، دا غير إنها واخدة تقييم 4.1، والـ Feedbacks كلها بتشيد بالتالي:

• اهتمام الأكاديمية بمستوى اللاعب البدني، والفني، والنفسي.
• مهارة المدربين، ومستواهم الممتاز في تعليم اللاعبين.
• أمانة المكان، وتوفير كافة الإمكانيات للعب.
• رفع مستوى اللاعبين في وقت قصير.

الأكاديمية بتدرب الأطفال من عمر 5 سنوات حتى 15 سنة، وسعر الاشتراك بيبدأ من 350 جنيه، وبيكون فيه يوم كامل لعمل تقييمات القبول، ودا من أسباب كونها من أفضل أماكن تدريب كرة السلة بالإسكندرية.

رقم التواصل: 01228253420.

عنوان الأكاديمية: مقر الأكاديمية في كلية فيكتوريا كوليدج – شارع الإقبال بالإسكندرية.

5- أكاديمية El Agamy basketball 

الـ Agamy Academy هي أول أكاديمية لتعليم مهارات كرة السلة بمنطقة العجمي، وبتتميز بتقديم تدريبات على أعلى مستوى بحضور مدربين متخصصين في اللعبة، ودا بيسمح لها تكون ضمن قائمة أفضل أماكن تدريب كرة السلة بالإسكندرية.

والتدريب بيكون 8 مرات في الشهر بمعدل مرتين أسبوعياً، ومن أهداف الأكاديمية تجهيز لاعبين على أعلى مستوى للفوز بمباريات الدوري، دا غير إنها بتعلن عن حاجتها لمتدربين قبل البطولات بوقت كافي، عشان توفر للطفل التدريبات اللازمة.

والأكاديمية بتقبل الأطفال من عمر 6 سنوات حتى 10 سنوات، ومن تعليقات أولياء الأمور على الأكاديمية إنها: 

1- متميزة، والمدربين محترمين ومتعاونين، والأولاد مستواهم بيتطور بسرعه فيها.

2- منظمة من حيث تقسيم الفرق بهدف التركيز على مهارات الأولاد أثناء التدريب.

3- أكاديمية ممتازة واهتمام بالأولاد ومنتهى الرقي في التعامل ربنا يوفقكم.

4- ممتازة، بتهتم بالأولاد، وبتتعامل بمنتهى الرقي.

العنوان: البيطاش بيانكي شارع الأربعين – شارع فتح الله ماركت – الإسكندرية.

تليفون: 01550851168.

6- أكاديمية Fly Basketball 

الأكاديمية مرخصة من وزارة الشباب والرياضة ومسجلة بالاتحاد المصري لكرة السلة وبتشارك في جميع المسابقات والبطولات الرسمية، وتقام التدريبات على ملاعب أكاديمية فلاي في مدرسة محمد كريم بسموحة، وكلية تربية رياضية بفلمنج.

ودا يعني إن طفلك يقدر يشارك من خلالها في جميع بطولات الدوري والبطولات الرسمية اللي بينظمها الاتحاد. 

والتدريبات على كرة السلة في الأكاديمية مش بس بتركز على إتقان مهارات اللعبة، ولكنها كمان بتقدم:

• مدربين على مستوى عالي لمساعدة الطفل في التأهل للبطولات.
• اهتمام ذاتي بكل طفل، ومهاراته داخل وخارج الملعب.
• تدريبات لياقة بدنية بهدف تقوية عضلات طفلك.
• تشجيع وإعدادات نفسية داخل الملعب.

وبتتميز الأكاديمية إنها متخصصة في تعليم وتدريب الأطفال لرياضة كرة السلة فقط، وبتقبل لاعبين من مختلف الجنسين بداية من عمر 5 سنوات حتى 18 سنة، سواء سبق ليهم اللعب أو بدون خبرة نهائي، وكمان التدريبات مستمرة طوال العام، وأيام العمل من الأحد للأربعاء من الساعة 8 صباحاً حتى 11 مساءاً.

والمكان واخد تقييم 5.0 على Google والصفحة الرسمية على الـ Facebook بتبين تأثير وقوة الأكاديمية، وإزاي أبطالها بيفوزوا بميداليات وبطولات.

الأكاديمية موجودة في: توت عنخ آمون – عزبة سعد – سيدي جابر – الإسكندرية.  

أرقام التواصل: 01227110010 – 012111956669.

رقم الواتساب: 01211195669.

7- نادي النصر لضباط القوات المسلحة بالإسكندرية

يعد نادي النصر واحد من أفضل أماكن تدريب كرة السلة بالإسكندرية، ودا لإنه:

• بيتميز بسعر عضوية معقول ومناسب لكتير من الأهالي.
• بيوفر ملاعب لمختلف الرياضات على أحسن مستوى.
• بيقدم تدريبات على أعلى مستوى مع مدربين متميزين.
• بيشارك النادي في دوري الاتحاد المصري لكرة السلة.

وبيستقبل النادي الأطفال من عمر 4 سنوات، وسعر الاشتراك 300 جنيه ويضاف ليهم 80 جنيه للمدني و270 جنيه للعسكريين، والفريق المدني 400 جنيه، والفريق العسكري 360 جنيه.

وبيكون التدريب تحت إشراف كابتن ولاء، وبالنسبة للمواعيد الجمعة والأربعاء من 5 – 8 م.

ومواعيد تدريب الفريق السبت والثلاثاء والخميس من 6.30 – 9.30 م.

العنوان: سموحة – امتداد كوبري 14 مايو – أمام جرين بلازا – الإسكندرية.

الخلاصة 

اختيارك لأفضل أماكن تدريب كرة السلة بالإسكندرية شيء ضروري؛ لإن ممارسة الرياضة للطفل وهو صغير من أفضل الحاجات اللي ممكن يقدمها كل ولي أمر لطفله.

وكرة السلة بتدخل ضمن أفضل الرياضات، لإنها بتعلم طفلك مهارات مختلفة، وكمان بتلعب على تحسين صحته البدنية، والنفسية؛ فاستثمر في طفلك من صغره، وهتلاقي نتيجة عظيمة في المستقبل.