إيه هي أفضل أماكن خروج في الإسكندرية للأطفال؟
الترفيه واللعب بيشغل الحجم الأكبر من حياة الطفل، وبيساهم في تكوين شخصيته، واكتسابه لكتير من المهارات، غير أثره الكبير على صحة الطفل النفسية.
ومن خلال المقال دا بنعرض لك أفضل أماكن الخروج المناسبة للأطفال في الإسكندرية، والأنشطة اللي ممكن ينفذوها فيها.
أفضل أماكن خروج في الإسكندرية للأطفال
تبعاً لدراسة اتنشرت على موقع Researchgate هنلاقي إن الأنشطة الخارجية للأطفال ليها فوايد كبيرة على صحتهم النفسية والجسدية، وبتساعد في تقليل التوتر وردود الفعل العدوانية عندهم.
ومن هنا نفهم إن الخروج والترفيه لطفلك شيء أساسي؛ عشان يتعرف على بيئات مختلفة عن البيت، ويكتسب خبرات ومهارات معرفية، وسكان مدينة الإسكندرية محظوظين بجوها الجميل، وشواطئها في كل مكان، دا غير الأماكن الترفيهية الموجودة في مختلف الأماكن، ومنها:
1- جزيرة الشاي
من أفضل الأماكن بالإسكندرية، ودا لاحتوائها على قصور ملكية فاخرة متاحة لدخول جميع المواطنين للاستمتاع بيها، فهي بتشمل مرافق ترفيهية، وحدائق واسعة، ومطاعم راقية على البحر مباشرة.
دا غير إنها بتضم أماكن أثرية زي: استراحة الملك فاروق، وحديقة فنار المنتزة، وبرج الشاي، وخليج المنتزة.
الأنشطة المتاحة بجزيرة الشاي:
1- التقاط الصور التذكارية في مختلف الأماكن ودا لاحتوائها على مناظر خلابة.
2- التنزه واللعب في الحدائق المفتوحة أو في حديقة الفنار.
3- اللعب بالكرة في الساحات المخصصة.
4- تناول الطعام في الكافيهات المتاحة.
المواعيد: من الساعة 10 صباحاً للساعة 8 مساءً.
سعر التذكرة 50 جنيه للدخول شامل مشروب، دا غير دخول المنتزة 40 جنيه، ولو في سيارة بيكون ليها تذكرة بـ 50 جنيه، والراوند بالجولف في المكان بـ 20 جنيه للفرد.
2- ماجيك بلانيت سيتي سنتر
واحد من أفضل أماكن خروج في الإسكندرية للأطفال، لإنه عالم كله إثارة وطاقة، مخصص للعب والجري والقفز، ودا لإن المكان بيضم عشرات الألعاب الكهربائية وألعاب الفيديو جيم، زي:
- لعبة السيارات الكهربائية.
- لعبة القطار السريع.
- الطائرات المتحركة.
- سباق السيارات.
- العجلة الدوارة.
العنوان: تقاطع الطريق الدائري مع طريق مصر إسكندرية الصحراوي، مول سيتي سنتر منطقة العامرية.
المواعيد: يومياً من الساعة 10 صباحاً لـ 12 منتصف الليل.
بيبدأ سعر شحن كارت الدخول من 500 جنيه، وبيوفر المكان نظام باقات للشحن وبيكون عليها نقط كتير فري للعب.
3- ملاهي المعمورة
من أشهر وأفضل أماكن خروج في الإسكندرية للأطفال في منطقة شرق الإسكندرية، ودا لاحتوائها على عدد كبير من الألعاب المناسبة للكبار والأطفال، زي: الصاروخ الدوار، وسباق السيارات، ولعبة الماتيرون.
الأنشطة اللي ممكن تقوموا بيها كعيلة:
- تناول المأكولات السريعة في كافتيريا الملاهي.
- اللعب بكرة القدم في الساحات المفتوحة.
- دخول الألعاب الكهربائية والإلكترونية.
- التمشية على شاطئ المعمورة.
- حضور العروض المسرحية.
- ركوب الدراجات.
العنوان: شارع ملك حفني، شاطئ المعمورة، بمنطقة المندرة.
سعر تذكرة دخول منطقة المعمورة 30 جنيه، والدخول الخاص ببوابة الملاهي 15 جنيه، والألعاب بتبدأ من 30 جنيه لحد 100 جنيه.
المواعيد: يومياً من الساعة 12 ظ لـ 12 صباحاً.
4- قصر وحدائق المنتزة
من أفضل الأماكن السياحية بمدينة الإسكندرية خاصةً بعد التجديد، وهو تحفة معمارية تطل على أجمل الشواطئ في الإسكندرية.
أنشطة يمكن تنفيذها في المنتزة:
- زيارة قصر السلاملك والحرملك.
- اللعب في الساحات الخضراء.
- السباحة عند شاطئ المنتزة.
- القيام بجلسات الشواء.
- قضاء يوم كامل للعيلة.
- السكيتنج في الساحات.
- ركوب الدراجات.
- التقاط الصور.
العنوان: حي المنتزة، في منطقة المندرة البحرية بالإسكندرية.
المواعيد: بتختلف المواعيد المتاحة للزيارة، الحدائق الملكية من 7 صباحاً لـ 11 مساءً، وقصر المنتزة من 8 صباحاً لـ 6 مساءاً.
سعر تذكرة دخول المنتزة للفرد 50 جنيه ابتداءََ من يناير عام 2025.
5- حدائق أنطونيادس
توفر حدائق أنطونيادس مساحة خضراء واسعة للعب وإقامة حفلات شواء، واللعب بالكرة، والسكيتنج للأطفال، دا غير إنها بتضم عدد من التماثيل الرخام النادرة، وأعمدة القصور المزخرفة من العصر البطلمي، وفي نفس الوقت تصميم الحدائق بيجمع بين الحجارة البيضاء، والمساحات الخضراء الخلابة اللي بتوفر جو مناسب، وهي من أهم أماكن خروج في الإسكندرية للأطفال لقيامهم بكتير من الأنشطة فيها، زي:
- ممارسة مختلف أنواع الألعاب الجماعية في الساحات الخضراء.
- زيارة قصر ومسرح أنطونيادس.
- السكيتنج وركوب الدراجات.
- التقاط الصور.
سعر التذكرة للفرد الواحد من يوم السبت للأربعاء بـ 15 جنيه، وفي يوم الجمعة والسبت 20 جنيه.
المواعيد: يومياً من الساعة 8 صباحاً لـ 6.30 مساءً.
6- متحف الإسكندرية القومي
من أشهر أماكن الخروج بالإسكندرية، وبيضم 1800 قطعة أثرية مجمعة من المتاحف المختلفة، وبيتميز المتحف بجدران مزخرفة بالطراز الإيطالي.
بتبدأ الجولة في المتحف من الطابق السفلي اللي بيضم آثار من العصر الفرعوني، والمدن الغارقة لحد ما يوصل للطوابق الثلاثة، وتتدرج الآثار المعروضة من القديم للحديث.
العنوان: 131 ش الشهيد جلال الدسوقي في منطقة باب شرقي بالإسكندرية.
المواعيد: يومياً من 9 صباحاً لـ 4 مساءً.
قيمة التذكرة للمصريين 60 جنيه، و100 جنيه للأجانب,
7- حدائق الشلالات
المساحات الخضراء من الأماكن الممتعة ومتعددة الأنشطة للأطفال للحركة، وحدائق الشلالات واحدة من أفضل أماكن خروج في الإسكندرية للأطفال، لإنها بتضم بعض المعالم السياحية زي أبراج وسور الإسكندرية.
الأنشطة المتاحة للأنشطة في حدائق الشلالات:
- تناول الطعام في مطاعم الحديقة.
- الاستمتاع بمشاهدة الشلالات.
- مشاهدة البط في البحيرات.
- جولة بالقوارب الصغيرة.
- التنزه في الحديقة.
العنوان: الحي اللاتيني في منطقة باب شرق بالإسكندرية.
أوقات الزيارة: يوميًا من الساعة 10 صباحًا إلى الساعة 11 مساءً ما عدا يوم الجمعة بيكون من الساعة 6 صباحًا حتى الساعة 9 مساءً.
وأسعار الدخول لحدائق الشلالات: الدخول مجانًا، لا يوجد أي رسوم.
8- قلعة قايتباي
من أفضل أماكن خروج في الإسكندرية للأطفال والكبار، والقلعة موجودة على البحر ، وعبارة عن 3 أدوار وساحة.
ومن أبرز الأنشطة اللي ممكن تقوم بيها العيلة في منطقة القلعة:
- تناول الطعام في الكافيهات المجاورة للقلعة.
- دخول القلعة وشرح معالمها للأطفال.
- جولة بالقارب في منطقة الشاطئ.
- ركوب الدراجات والسكيتنج.
العنوان: نهاية جزيرة فاروس، منطقة الميناء الشرقي، غرب الإسكندرية.
المواعيد: من الساعة 8 صباحاً لـ 5 مساءً.
سعر التذكرة 60 جنيه للمصريين، و30 جنيه للطلاب.
وحالياََ أصبح متوفر عرض الصوت والضوء بقلعة قايتباي بقيمة تذكرة 150 جنيه للعرب والمصريين، و210 جنيه للتذكرة الـ VIP.
9- مكتبة الإسكندرية
من أعظم المباني في مدينة الإسكندرية، وهي مش مكان ترفيهي بشكل أساسي، ولكنها مكان مبهر ويستحق يدخله الأطفال يتعرفوا عليه، واتسمت بأكتر من اسم لأهميتها، فهي المكتبة العظمي، لإنها بتشمل عدد من المباني، المبنى الخاص بالمكتبة، ومبنى الحضارة، ومراكز الأبحاث المتخصصة، ومتحف السادات، وقاعة تبسيط العلوم للأطفال، والمعارض الفنية والمسارح المكشوفة.
أنشطة يمكن تنفيذها في مكتبة الإسكندرية:
- دخول المتاحف، زي: متحف العلوم والمخطوطات.
- مشاهدة الفقرات المسرحية المعلن عنها.
- المشاركة في الأنشطة الصيفية للأطفال.
- حضور مجالس الخط العربي المستمرة.
- دخول عروض القبة السماوية المفيدة.
- تعلم الكتابة الهيروغليفية.
- حضور الورش التعليمية.
العنوان: أمام شاطئ السلسلة بالقرب من كورنيش الإسكندرية، في منطقة الأزاريطة.
وبتختلف مواعيد الدخول في أيام الأسبوع.
- قاعة الاطلاع الرئيسية: من الأحد إلى الخميس: من 10.00 صباحًا لـ 7.00 مساءً، والسبت: من 10.00 صباحًا لـ 2.00 ظهرًا، الجمعة: مغلقة.
- الزيارات والمتاحف ومركز القبة السماوية العلمي: من الأحد إلى الخميس من 9.30 صباحًا إلى 5.00 مساءً، والسبت: من 10.00 صباحًا إلى 2.00 ظهرًا.
- مكتبة الطفل والنشء ومكتبة طه حسين: من الأحد إلى الخميس: من 9.30 صباحًا إلى 4.00 عصرًا، والسبت: من 10.00 صباحًا إلى 2.00 ظهرًا (ما عدا مكتبة طه حسين بتكون مغلقة).
سعر التذكرة للطالب 5 جنيه، وللفرد العادي 10 جنيه، و20 جنيه لعرض القبة السماوية.
10- أفريكانو بارك
واحد من أمتع أماكن خروج في الإسكندرية للأطفال، وهي عبارة عن غابة إفريقية مبهرة فيها حيوانات برية من غير أقفاص هتساعد الأطفال على التعرف على أشكال الحيوانات على الطبيعة، وملامستها وخوض تجربة جديدة ليهم.
يمكن وصف أفريكانو بارك بأنها غابة مفتوحة مناسبة لخروج العائلات، وفيها كتير من الأنشطة الممتعة.
أنشطة يمكن الاستمتاع بها في أفريكانو بارك:
- الاستمتاع بملاعب كرة القدم، وتنس الطاولة.
- تناول الأطعمة الأفريقية على النهر بالحديقة.
- القيام برحلة نهرية داخل الكهف المظلم.
- زيارة بيت الطيور ومشاهدة الببغاوات.
- ملامسة الحيوانات واللعب معهم.
- القيام برحلة سفاري داخل الحديقة.
- الإقامة في الفندق للمبيت والراحة.
- إقامة الحفلات وأعياد الميلاد.
- ممارسة صيد السمك.
العنوان: الكيلو 65 طريق مصر إسكندرية الصحراوي بغرب النوبارية.
المواعيد: يومياً من الساعة 9 صباحاً لـ 5 مساءاً.
الأسعار: إدارة المكان بتنظم رحلات بتشمل الدخول للحديقة، وصور لأفراد الأسرة طوال اليوم، بالإضافة لجولة حرة في الإسكندرية، بالإضافة لتكلفة الأتوبيس ذهاب وعودة، قيمة الفرد فيها 300 جنيه.
أما الدخول المباشر بتختلف قيمته على حسب المجموعات، سعر دخول السيارة 1500 جنيه، ودخول الأطفال أقل من 4 سنوات مجاناً.
11- كرامنتس (Castle)
من أمتع أماكن خروج في الإسكندرية للأطفال، وهي عبارة عن ملاهي بتاخد شكل قلعة ضخمة مصممة للأطفال بتضم عدد كبير من الألعاب الحركية، زي: الألعاب الإلكترونية، والكهربائية، والترامبولين، والعربات الصغيرة وغيرها من الألعاب المناسبة للأطفال.
وكمان بتضم ألعاب للكبار زي: صالات البولينج، والبلياردو، والبينج بونج؛ فبتكون مناسبة لأعمار مختلفة، دا بالإضافة لتوافر ألعاب الـ VR والفيديو.
العنوان: الكورنيش أسفل كوبري سيدي جابر – أمام بوابة نادي المعلمين – الإسكندرية.
المواعيد يومياً من الساعة 10 صباحاً لـ 9 مساءً، وبتختلف الأسعار على حسب الألعاب، ويمكن حجز باقة ليوم واحد بتبدأ من 150 جنيه.
12- جرافيتي كود
من أحدث أماكن خروج في الإسكندرية للأطفال، لإنها أول مقر لألعاب الترامبولين في مصر، ومكان مناسب للعائلات، وفيها أماكن ملائمة للأطفال وسلامتهم، وألعاب للكبار.
وهي عبارة عن مساحة كبيرة من الترامبولين المخصصة للقفز، وبتنقسم لأكتر من ساحة في مختلف عناصر الترفيه، في مناطق بتضم:
- الشخصيات الكرتونية.
- الألعاب الإلكترونية.
- أزياء الديناصورات.
- الكرات المضيئة.
- التسلق بالحبال.
- ألعاب الكيكرز.
العنوان: تقاطع الطريق الدائري مع طريق مصر إسكندرية الصحراوي، مول سيتي سنتر.
المواعيد: يومياً من الساعة 10 صباحاً لـ 10 مساءً، ما عدا الخميس والجمعة لـ 11م.
مسموح للدخول من 5 سنين وبيكون بالتيكيت العادي، والحد الأدنى للطول 120 سم، ويوجد 3 أنواع تيكيت:
- 300 جنيه الساعة للفرد.
- 420 جنيه ساعتين للفرد.
- 470 جنيه ساعتين + تحديات يلا كورة كيكز + 5 دقايق بالون + جولة ليزر روم.
الألعاب الأساسية (ترامبولين، زيب لاين، دودج بول، الكرة الطائرة، باسكيت بول، إير باج، كيكيرز).
ومتاح اشتراك 10 ساعات بـ 1250 جنيه، و20 ساعة بـ 2500 جنيه، تروح بيهم خلال الأسبوع.
الحجز يفضل يكون أونلاين لضمان وجود أماكن والدفع من خلال الفرع.
13- ملاهي Frenzy Station
تعد ملاهي Frenzy Station من أجدد الملاهي في الإسكندرية، ومن أبرز أماكن خروج في الإسكندرية للأطفال، واللي كان موجود مكانها سكاي زون وقفلت وفتحت من سنتين ملاهي فرينزي عشان تكون من أهم المناطق الترفيهية في إسكندرية.
واللي بيميزها إنها في منطقة جرين بلازا، ودي منطقة حيوية لتوافر كل الخدمات فيها، غير جليم باي اللي أصبح وجهة محببة لأهالي إسكندرية وباقي المحافظات.
وبيتوفر فيها ألعاب متنوعة وعلى حسب سن الطفل، وبيكون الدفع عن طريق شحن كارت على بوابة الملاهي.
وفي قسم خاص للبولينج وعربيات السباق للكبار، وبيوفر مجموعة ألعاب بسيطة لعمر السنة، والأسعار هناك بتختلف على حسب الألعاب يعني الألعاب للأطفال الصغيرين من 20 – 25 جنيه، أما للأطفال الأكبر من 35 -75 جنيه.
في ألعاب فيديو و VR وترامبولين كبيرة بتسمح للكبار والأطفال اللعب فيها، وفي كيدز أريا خاصة بالأطفال دي بتكون بالساعة.
المكان مفتوح في أيام الأسبوع من 12 ظ – 11 م، وبتفضل لـ 12 ص في أيام الأجازة.
تقدر تشوف الألعاب المتاحة من خلال فيديو ملاهي جرين بلازا بعد التحديد.
العنوان: طريق 14 مايو، جرين بلازا، الإسكندرية.
14- أكواريوم الإسكندرية
من أمتع أماكن خروج في الإسكندرية للأطفال، هيقضي فيه طفلك وقت ممتع، وتجربة جديدة بالنسباله، لإن الأكواريوم بتضم مجموعة من الأحواض الزجاجية اللي بتجمع عدد كبير من الكائنات البحرية المتنوعة.
ومن خلال التجول الطفل هيتعرف على الحيوانات البحرية ومسمايتها، دا غير إن المكان بيحتوي على عدد من الأقسام، وكل قسم بيضم مجموعة مختلفة من الأسماك، زي السمكة المنتفخة، وسمكة التنين الحمراء وغيرها.
سعر الفرد 20 جنيه، وللطالب 10 جنيه.
العنوان: منطقة بحري، أمام قلعة قايتباي، الإسكندرية.
15- الحديقة الدولية في الإسكندرية
من أشهر أماكن خروج في الإسكندرية للأطفال والعيلة عامةً، ودا لإنها مكان واسع فيه مساحة خضراء وواسعة تسمح بالتنزه فيها، ولعب الأطفال، وبتضم مجموعة من الألعاب المناسبة لكل الأعمار وآمنة على الأطفال، وفيها بعض المطاعم، ومكانها قريب من المطار الدولي بالإسكندرية.
سعر التذكرة في الأيام العادية 20 جنيه، وفي الأجازات الرسمية بتوصل لـ 40 جنيه.
العنوان: 6 طريق القاهرة، الإسكندرية الصحراوي، أبيس، محرم بك، الإسكندرية.
وأخيراً، جزء من تربية الطفل بيكون من خلال اللعب والترفيه، وسكان مدينة الإسكندرية الاختيارات قدامهم كتيرة، لإنها بتضم عدد كبير من الأماكن الترفيهية للألعاب، والحدائق والمساحات الخضراء، والأماكن الأثرية، ودا بيخلق تنوع كبير قدام الطفل، وبيساهم في تنمية مداركه، وذكرنا من خلال المقال 15 مكان من أفضل أماكن خروج في الإسكندرية للأطفال، للاستفادة منها، وإسعاد طفلك.
أضف تعليق