10 معلومات عن مدرسة المتفوقين الثانوية بالإسكندرية (س و ج)

بعد حصول الطالب على شهادة إتمام المرحلة الإعدادية بيبدأ ولي الأمر يحتار في اختيار المدرسة الثانوية المناسبة لابنه؛ لإن بيكون قدامه خيارات كتيرة على رأسهم مدارس الثانوية العامة ومدارس المتفوقين-مدارس ستيم- اللي من أشهرهم مدرسة المتفوقين الثانوية بالإسكندرية.

وبتختلف مدارس ستيم عن الثانوية العامة، لإنها بتهتم برعاية الطلبة المتفوقين في مجال العلوم والتكنولوجيا، وبتقدم لهم مجموعة كبيرة من المميزات اللي مش بتكون موجودة في مدارس الثانوية العامة زي إنها بتركز أكتر على التفكير والإبداع، وبتهتم بتطوير مهاراتهم، وغيره.

لكن رغم المميزات دي بنلاقي مجموعة من العيوب اللي بتخلي الطلبة وأولياء الأمور يرفضوا التقديم فيها، عشان كدا هنتكلم بالتفصيل عن مدرسة ستيم وخاصةً مدرسة المتفوقين الثانوية بالإسكندرية، ونعرف أهم المميزات والعيوب الموجودة فيها.

1- ما هي مدارس المتفوقين للعلوم والتكنولوجيا STEM؟

مدارس المتفوقين للعلوم والتكنولوجيا هي مدارس حكومية بدأ تواجدها في مصر من عام 2011 بهدف رعاية الموهوبين في العلوم والتكنولوجيا، وتنمية مهاراتهم عن طريق تطبيق نظام تعليمي أمريكي بيركز بشكل كبير على التطبيق العملي والبحث العلمي؛ اللي بيساعد الطلبة يستوعبوا المادة العلمية أكتر، ويعودهم على التفكير وإيجاد حلول بسيطة وفعالة للمشكلات اللي حواليهم.

وكمان بيعلمهم يعتمدوا على نفسهم في الحصول على المعلومات؛ لإن الطالب في مدارس ستيم بيكون هو المسئول الأول عن شرح المادة العلمية، والمعلم بيكون دوره إرشادي فقط.

ومن الوقت دا ومدارس ستيم معروفة بإنها من أفضل المدارس اللي بتقدم خدمات تعليمية للطلبة في المرحلة الثانوية، وبتأهلهم للكليات العملية.

وعدد كبير من أولياء الأمور والطلبة بيعتبروا مدارس ستيم بديل مميز للثانوية العامة في مصر؛ لإن الطالب هنا مش بيكون مضطر يحفظ مواد علمية مرهقة عشان يقدر يحصل على درجات مرتفعة في نهاية العام، كل المطلوب هنا هو إن الطالب يجتهد في البحث عن المعلومات، ويعمل الأنشطة المطلوبة بدون أي داعي للحفظ والتلقين.

اعرف أكتر عن: المدارس الحكومية بالإسكندرية. 

2- ما هو عنوان مدرسة STEM بالإسكندرية؟

بعد نجاح نظام STEM في مصر، بدأ التوسع في إنشاء مدارس المتفوقين في العلوم والتكنولوجيا اللي بتطبق النظام دا لحد ما وصلت لمحافظة الإسكندرية.

وبتعد مدرسة المتفوقين الثانوية بالإسكندرية من أشهر مدارس المتفوقين في مصر، واللي مازالت بتحرص على تقديم خدمة تعليمية فريدة من نوعها وبتهتم بشكل كبير بتطوير مهارات الطلاب.

والمدرسة موجودة في مدينة برج العرب الجديدة أمام مسجد دار الأيتام والجامعة اليابانية، وخلف التأمينات الاجتماعية الجديدة، وتقدر تتواصل معاها لمعرفة تفاصيل أكتر عن نظام الدراسة والمصاريف الدراسية المطلوبة عن طريق صفحة الفيسبوك أو الموقع الالكتروني الخاص بالمدرسة. 

3- كم عدد طلبة مدرسة المتفوقين بالإسكندرية؟

من المميزات الموجودة في مدرسة المتفوقين الثانوية بالإسكندرية إن عدد الطلبة اللي بيتم قبولهم كل سنة بيكون محدود جداً مقارنة بباقي المدارس الحكومية؛ ودا لإن المدرسة بتحرص على تقديم أعلى جودة من التعليم، وبتهتم بكل طالب على حدة؛ عشان تضمن له استفادة كبيرة من دراسته.

وتبعًا لآخر الأرقام المذكورة في عام 2023 بنلاقي إن مدرسة المتفوقين الثانوية بالإسكندرية بتقبل حوالي 150 طالب في كل دفعة جديدة من الجنسين، ودا بيثبت فعلاً حرصها على جودة الخدمة التعليمية اللي بتقدمها. 

4- ما هو تنسيق مدرسة STEM بالإسكندرية؟

من المتعارف عليه إن جميع مدارس ستيم بتمنح الطلبة في نهاية الدراسة الشهادة المصرية في العلوم والتكنولوجيا، واللي بتمثل شهادة الثانوية العامة في الشعبة العلمية فبتأهل الطلبة للالتحاق بالكليات العلمية المختلفة زي الطب والهندسة والصيدلة وغيرهم ولكن التنسيق بتاعهم بيكون مختلف عن تنسيق الثانوية العامة.

وبنلاقي إن طلبة مدرسة المتفوقين الثانوية بالإسكندرية بيخضعوا لنظام النسبة المرنة عشان يقدروا يلتحقوا بالكليات، بمعنى إن عدد الطلبة اللي اتخرجوا من ستيم بيكون ليهم مقاعد محدودة في الكليات، وعدد المقاعد دي بيختلف كل سنة تبعاً لمجموع طلبة الثانوية العامة وطلبة ستيم.

أما النسبة المرنة فبيتم حسابها بقسمة عدد طلبة مدارس ستيم على عدد طلبة مدارس الثانوية العامة، وبعدين ضرب الناتج في عدد المقاعد الموجودة بكل كلية، وبالتالي ممكن الطالب يكون عايز يدخل كلية علمية معينة وما يقدرش يدخلها بسبب إن النسبة المرنة ماسمحتش في السنة دي.

وعشان كدا بنوضح إن لو هدف الطالب من البداية هو دخول كلية علمية معينة من غير ما يهتم بطريقة تلقيه العلم أو جودة الخدمة التعليمية المقدمة فيفضل اختيار نظام تعليمي تاني غير اللي بيتم تطبيقه في مدارس ستيم، أما إن كان حابب مجال البحث العلمي وبيتطلع إلى التطوير في مجال العلوم والتكنولوجيا فبنلاقي إن مدارس ستيم هي أنسب خيار له في الحالة دي.

أما بالنسبة لتنسيق مدرسة المتقوقين بالإسكندرية لعام 2024 – 2025، فبينقسم لحالتين:

•  أن يكون مجموع درجات الطالب 274.5 درجة أو أكتر بنسبة تعادل 98% من المجموع الكلى، وفي الحالة دي لا يشترط حصول الطالب على الدرجة النهائية في أيّ من المواد المقررة.
• أن يكون مجموع درجات الطالب 266 درجة أو أكتر بنسبة تعادل 95% من المجموع الكلى، ولكن في الحالة دي بيُشترط حصول الطالب على الدرجة النهائية في مادة واحدة على الأقل من 3 مواد (الرياضيات – اللغة الإنجليزية – العلوم). 

5- ما هي شروط الالتحاق بمدرسة STEM بالإسكندرية؟

مدرسة المتفوقين الثانوية بالإسكندرية بتوضح مجموعة من الشروط اللي لازم تتوافر في الطالب المتقدم؛ عشان تضمن إنه مؤهل فعلاً للالتحاق بيها واستكمال دراسته الثانوية فيها، وفي حين سقوط أحد الشروط دي بيكون قدامه فرصة واحدة للقبول هنتعرف عليها، غير كدا بيتم رفض ملف الطالب وبيلتحق بأي مدرسة ثانوية تانية. 

الشروط دي هي:

• أن يكون الطالب حاصل على شهادة إتمام الدراسة بمرحلة التعليم الأساسي دور أول خلال العام الدراسي الماضي.
• ألا يزيد عمر الطالب المتقدم عن 18 سنة في شهر أكتوبر للعام الجاري.
• أن يحصل على التنسيق المحدد لطلاب مدارس ستيم.
• ألا يكون الطالب رسب في أي عام دراسي ماضي.
• أن يكون الطالب مصري الجنسية.
•  أن يجتاز امتحانات القبول.

ملحوظة: في حالة عدم حصول الطالب على الحد الأدنى للالتحاق بمدارس ستيم بيكون لسه قدامه فرصة لو هو حاصل على براءة اختراع معتمدة من أكاديمية البحث العلمي.

تعرف على تفاصيل أكتر من خلال شروط مدارس ستيم للتقديم 2024 – 2025. 

6- ما هي الأوراق المطلوبة للتقديم لمدرسة المتفوقين بالإسكندرية؟ 

التقديم لمدرسة Stem بالإسكندرية بيكون إلكتروني في البداية من خلال موقع مركز معلومات وزارة التربية والتعليم، وبعدها بيتم طباعة استمارة التقديم الإلكتروني وإمضاؤها من ولي أمر الطالب وتقديمها لشئون الطلبة.

بعدها بيقدم الأوراق المطلوبة، وهي:

• شهادة صحية معتمدة “كشف طبي” تخصصات صدر وقلب وباطنة وجلدية (مختوم بشعار الجمهورية من مستشفى حكومي أو التأمين الصحي).
• شهادة وفاة الوالد للأيتام + صورة من الوصاية أو الولاية التعليمية.
• إيصال سداد المصروفات الدراسية للصف الأول الثانوي.
• بيان نجاح الطالب في المرحلة الإعدادية + 4 صور للبيان.
• 3 صور للبطاقة الشخصية لولي الأمر.
• توكيل رسمي في حالة سفر الوالد.
• طوابع بريدية + طابع تعليمي.
• 4 شهادات ميلاد + صور لها.
• 8 صور شخصية للطالب.
• استمارة الكشف الطبي.
• إيصال تأمين اللابتوب.
• تحليل سكر تراكمي.
• 3 ظرف بلاستيكي.
• تحليل فصيلة دم.
• طلب الالتحاق.

7- ما هي مصاريف مدرسة المتفوقين الثانوية بالإسكندرية؟

بالإضافة للمميزات اللي بتقدمها مدرسة المتفوقين بالإسكندرية بنلاقي إن مصاريفها محدودة جداً ومناسبة لفئة محدودي الدخل من أولياء الأمور، فالمصاريف بالنسبة للطلبة اللي كانوا بيدرسوا في مدارس ستيم الرسمية بتكون 1000 جنيه مصري، بالإضافة إلى 3000 جنيه مصري تأمين على اللابتوب اللي بيستلمه الطالب مع بداية دخوله المدرسة، بتُسترد عند التخرج.

بالإضافة لـ 500 جنيه للأنشطة الطلابية (اختياري).

ملحوظة: الطالب في مدرسة المتفوقين بالإسكندرية أو في مدارس STEM عموماً مش بيستلم كتب مدرسية، هو فقط بيعتمد على اللابتوب للحصول على المعلومات المطلوبة منه وتحضيرها عشان يشرحها لزمايله في الفصل تحت إشراف معلم المادة، عشان كدا بيكون مهم جداً إنه يستلم اللابتوب في بداية التحاقه بالمدرسة. 

والمصاريف دي هي اللي تم إعلانها من وزارة التربية والتعليم للعام الدراسي 2024 – 2025، وبتكون خاصة بالطلبة اللي حصلوا على الشهادة الإعدادية من المدارس الرسمية أو الرسمية للغات، أما بالنسبة للمدارس الخاصة فهنتعرف على مصاريفها حالًا.

8- ما هي مصاريف مدرسة STEM بالإسكندرية لطلبة المدارس الخاصة؟

المصاريف اللي بتطلبها مدرسة المتفوقين الثانوية بالإسكندرية من الطلبة اللي حصلوا على الشهادة الإعدادية في مدارس خاصة بتختلف تبعاً للمدرسة اللي كان مسجل فيها الطالب، واللي بيتراوح من 10000 – 30000 جنيه مصري تبعاً لرسوم كل مدرسة. 

بمعنى إن مدرسة ستيم بتطلب نفس المصاريف اللي كان بيدفعها الطالب في المدرسة الخاصة بالإضافة لـ 3000 جنيه مصري تأمين اللابتوب  و1000 جنيه للأنشطة الطلابية. 

9- ما الفرق بين الدراسة في مدرسة المتفوقين ومدارس الثانوية العامة؟

بيفرق نظام ستيم عن الثاوية العامة في نقطتين، هما:

المناهج

الدراسة في مدارس المتفوقين بتختلف تماماً عن الدراسة في مدارس الثانوية العامة في طبيعة المناهج والمواد العلمية اللي بيتلقاها كل طالب، فبنلاقي إن المناهج في مدارس ستيم بتكون مناسبة لعقلية الطالب ومدى استيعابه، وبتركز أكتر على التطبيق العملي بغض النظر عن الحفظ.

أما في الثانوية العامة بتكون أغلب المناهج مركزة على الحفظ، والطالب بيضطر إنه يحفظ كل الحاجات المطلوبة منه عشان يقدر يحل كويس في الامتحانات، ومنها يحصل على درجات عالية تمكنه من الالتحاق بالكلية اللي حابب يدخلها.

طريقة التدريس

كمان طريقة تدريس المواد دي بيكون مختلف، ففي مدارس ستيم بنلاقي إن الطالب هو المسئول الأول عن شرح المادة العلمية لزمايله، والمعلم بيكون دوره إرشادي فقط زي ما ذكرنا، وبيكون في نسبة مرتفعة من الدرجات على المشاريع اللي بيعملها الطالب، لكن في الثانوية العامة بيكون المعلم هو المسئول عن الشرح، والدرجات موزعة فقط على الامتحانات اللي بيدخلها الطالب.

اختلاف طبيعة الدراسة في مدارس المتفوقين بالإسكندرية عن باقي المدارس بتكسبها كتير من المميزات، إلا إننا بنلاقي بعض العيوب اللي بتخلي بعض أولياء الأمور يرفضوا التقديم فيها لأولادهم، طيب إيه المميزات والعيوب دي؟ دا اللي هنعرفه حالاً.

10- ما هي عيوب ومميزات مدرسة STEM؟

أي نظام تعليمي سواء موجود داخل مصر أو خارجها بيكون له عدة مميزات بتجذب الطلبة وبتخليهم مقبلين عليه، لكن مع الوقت بتظهر مجموعة من العيوب اللي بتخلي الطالب وولي الأمر يفكروا أكتر من مرة قبل ما يختاروه.

عيوب مدرسة المتفوقين الثانوية بالإسكندرية

من أشهر العيوب الموجودة في مدارس ستيم بنلاقي:

صعوبة نظام الدراسة

نظام الدراسة في مدارس ستيم بيتطلب مجهود كبير جداً من الطالب عشان يقدر يبحث ويحصل على المعلومات اللي محتاج يعرفها، ويستوعبها كويس، وبعدين يشرحها لزمايله في الفصل، والموضوع بيكون ممتع للطلبة اللي بتحب البحث العلمي، لكن دا ما يمنعش إن بعض الطلبة شايفين إن الأمر مرهق جداً ليهم وصعب إنهم يكملوا فيه. 

تطبيق نظام النسبة المرنة

نظام النسبة المرنة اللي بيتم تطبيقه في مدرسة المتفوقين الثانوية بالإسكندرية بيعد من أشهر عيوب المدارس دي؛ لإنه ممكن يكون سبب في إن الطالب ما يدخلش الكلية اللي حاببها عشان عدد المقاعد بيكون محدود، وممكن يضطر يلتحق بكلية مش عايزها لنفس السبب، وبالتالي لو الطالب حاطط قدام عينه كلية معينة وحابب يدخلها بغض النظر عن طريقة الدراسة في المرحلة الثانوية، فيفضل إنه يلتحق بنظام تعليمي غير ستيم زي ما وضحنا.

عدم وجود قسم أدبي

مدرسة المتفوقين الثانوية بالإسكندرية بترعى الطلبة المتفوقين في العلوم والتكنولوجيا، ومش بتهتم بالطلبة اللي ميولهم بتكون أدبية، وبالتالي مش بيكون في فرصة لأي طالب حابب يكمل في المجال الأدبي إنه يلتحق بالمدارس دي.

زيادة الضغط النفسي على الطلبة

امتحانات مدرسة المتفوقين الثانوية بالإسكندرية معروفة بصعوبتها مقارنة بالامتحانات اللي بتكون موجودة في المدارس الأخرى، والطالب بيكون عليه ضغط كبير؛ عشان بيكون مطلوب منه يحصل على درجات مرتفعة في الامتحانات دي عشان يقدر يكمل ويلتحق بالجامعة.

مميزات مدرسة المتفوقين الثانوية بالإسكندرية

بتتعدد المميزات اللي بتقدمها مدرسة المتفوقين بالإسكندرية، واللي من أهمها:

التطبيق العملي

التطبيق العملي في مدارس ستيم بيكسبها ميزة مهمة جدًا؛ لإن بالطريقة دي بيقدر الطالب يستوعب المادة العلمية أكتر، ويفهم كل أبعاد المواضيع اللي بيدرسها، وكمان بتساعده يفكر بطريقة عملية في حل المشكلات الموجودة حواليه.

تدريس مناهج متطورة

بتعتمد المناهج اللي بتدرس في مدرسة المتفوقين الثانوية بالإسكندرية على البحث بشكل أساسي، وبيتضح دا في نظام الدراسة، فبيكون مطلوب من الطالب إنه يبحث في موضوع معين، ويجمع أهم النقاط عن الموضوع دا ويعيد شرحها على زمايله في حضور مدرس المادة، ودي ميزة كويسة جداً للطلبة المهتمين بمجال البحث العلمي. 

تقديم شهادة تعادل الثانوية العامة

بتمنح مدارس ستيم خريجيها شهادة الثانوية المصرية في العلوم والتكنولوجيا، واللي بتكون بمثابة شهادة الثانوية العامة في مصر، ومن خلالها بيقدر الطالب يلتحق بالكليات المصرية من غير ما يحتاج لمعادلات أو غيرها.

الحرص على تنمية مهارات الطلاب

حرص القائمين على مدارس ستيم على تقديم أفضل تعليم مش بيخليهم ينسوا تطوير مهارات وسلوكيات الطلبة، ومساعدتهم على اكتساب مهارات جديدة أثناء تواجدهم بالمدرسة، فالطالب بيتعلم الالتزام والنظام، والمشاركة؛ لإنه بيشتغل مع زمايله لوقت طويل جدًا من اليوم، دا غير إن مدارس ستيم بتساعده على الإبداع والتفكير في حل المشكلات الموجودة فعليًا في البيئة حواليه.

وأخيرًا، إدراك مميزات وعيوب مدرسة المتفوقين بالإسكندرية هيسهل عليك كتير كولي أمر، عشان تحدد إذا كانت المدارس دي مناسبة فعلاً لأولادك ولا في مدارس تانية هتكون مناسبة أكتر؛ عشان تضمنلهم تعليم مناسب لقدراتهم وبجودة عالية.