مكتبة الإسكندرية هي واحدة من أكبر المكتبات في العالم، واللي بتحتوي على مجموعة ضخمة من الموارد الثقافية والعلمية والفنية.
فبتتضمن أنشطة مكتبة الإسكندرية العديد من الفعاليات والورش التعليمية الشيقة لمختلف الأعمار مش بس للكبار، الأطفال كمان ليهم أنشطة كتير يقدروا ينضموا ليها بتساعدهم على توسيع مداركهم وتعلم المهارات الجديدة. بالإضافة للإمكانيات البحثية والمكتبية.
فبتوفر مكتبة الإسكندرية لطفلك فرصة التعلم والتفاعل والإبداع في مختلف المجالات الثقافية والعلمية والفنية؛ عشان يبقى قادر يبني شخصيته وهويته من بدري، وعشان تعرف أكتر عن الأنشطة دي، جمعنا لك أهمهم، فتابع معانا.
10 أنشطة يمكن لطفلك فعلها عند زيارة المكتبة
من المعروف إن مكتبة إسكندرية فيها كتب ومحاضرات وندوات علمية ومتاحف، عشان كدا السياح بييجوا من مختلف البلاد يتعرفوا على الحضارة المصرية والتراث القديم الموجود في مكتبة الإسكندرية.
بس هل سألت نفسك، إذا كانت المكتبة مناسبة للأطفال ولا لأ؟
المكتبة طبعًا مناسبة للأطفال، وفيها كتير من الأنشطة اللي يقدروا يمارسوها.
مش بس كده، كمان في أنشطة تقدر تنضم ليها أنت وطفلك، وتتعلموا، وتستمتعوا في نفس الوقت، ومنها:
1- أنشطة مكتبة الأطفال
من أنشطة مكتبة الإسكندرية المُخصصة للأطفال اللي عمرهم من 6 لـ 14 سنة، وبتهدف لتشجيع الأطفال على القراءة وسبل البحث، من خلال توفيرها لمصادر تعليمية وثقافية وترفيهية للأطفال:
المصادر التعليمية
- مواد بلغات متعددة وبتشمل موضوعات متنوعة، زي الفنون وعلم الحيوان.
- معمل للحاسب الآلي.
الأنشطة الترفيهية
- مشاهدة الرسوم المتحركة.
- ألعاب ذكاء ومسابقات.
- مسرح العرايس.
- أشغال يدوية.
- رسم وتلوين.
الأنشطة الثقافية
- محاضرات وعروض تقديمية عن الأخلاقيات والسلوكيات العامة.
- والمهارات المختلفة للأطفال.
وبتقدم المكتبة “عرض الأطفال”، وهو عرض تقديمي بيحكي بطريقة مُبسطة تاريخ المكتبة وأنشطتها مع عرض صور كرتونية.
كمان المكتبة بتنظم برنامج خاص بالتوعية الأسرية والتربية الإيجابية، بيقدمه مجموعة من المتخصصين في المجال، وبتعمل إدارة الزيارات والقاعات مؤخرًا على تنظيم برامج جديدة للحضانات.
2- أنشطة مكتبة النشء
مكتبة النشء هي مكتبة فيها كتير من الأنشطة والبرامج والمحاضرات والزيارات الخارجية المتنوعة من سن 12 لـ 16 سنة، ودا من خلال البرامج والورش الفنية والعلمية والثقافية، ومنها:
- الزيارات الخارجية لأهم الأماكن الأثرية والتاريخية.
- مسابقات العروض التقديمية
- محاضرات التوعية المتعددة.
- الورش العلمية والتاريخية.
- تنمية المهارات الشخصية.
- مسابقات الرسم والتصوير.
- مسابقة الشعر والإلقاء.
- ورش الكتابة.
3- أنشطة مكتبة المواد السمعية والبصرية
كمان من أنشطة مكتبة الإسكندرية، لو طفلك مهتم بتعلم اللغات فمكتبة المواد السمعية والبصرية، بتوفر كتب خاصة بالتعلم الذاتى للغات، في منها كتب تعليم اللغات الإنجليزية، والفرنسية، والألمانية، والإيطالية، والصينية، والروسية، والتركية، لكل المستويات، والكتب موجودة صوتية ومرئية عشان طفلك يتعلم ويمارس بكل سهولة.
وبتضم المكتبة مجموعة من البرامج التعليمية وأدوات التعليم الذاتى فى مجال اللغات والكمبيوتر، فردية وجماعية عشان تقدر تشارك طفلك، وطفلك يشارك صحابه.
المكتبية بتسمح باستعارة الكتب السمعية أو البصرية من خلال مكتب الخدمات المرجعية بوحدة الوسائط المتعددة بالمستوى الثالث السفلى (B3)، بمبنى المكتبة الرئيسي.
4- أنشطة مكتبة طه حسين للمكفوفين
مكتبة طه حسين هي أول مكتبة إلكترونية على مستوى الجمهورية بتخدم المكفوفين وضعاف البصر، عشان يقدروا يستفيدوا من كل موارد المكتبة ومواقع الإنترنت، باستخدام أحدث الأساليب التكنولوجية.
المكتبة كمان وفرت مجموعة من المتطوعين المُبصرين عشان يساعدوا رواد المكتبة المكفوفين وضعاف البصر في القراءة والبحث، بالإضافة لإتاحة مجموعة من المقالات والموضوعات المتخصصة بالتأهيل التعليمي للأطفال المكفوفين.
وبتعتمد مكتبة طه حسين على أحدث الابتكارات في مجال تكنولوجيا المعلومات، فالمكتبة بتشمل 6 أجهزة سطور Braille one مع شاشة تليفزيون سمارت، وهى عبارة عن مفكرة إلكترونية ذكية فيها خلايا إلكترونية بتمكن الطالب الكفيف من الكتابة والقراءة بطريقة برايل بسهولة.
بالإضافة لإنه يقدر يوصلها بشاشة الكمبيوتر ويعرض المكتبة كاملة كملف Word، ويحول الجهاز ملفات البرايل لـ Word والعكس، عشان يقدر يحس بالاستقلالية ويعتمد على نفسه.
5- المشاركة في برامج ذوي الاحتياجات الخاصة
من أنشطة مكتبة الإسكندرية برامج ذوي الاحتياجات الخاصة الخدمات والأنشطة والفعاليات عن طريق الإنترنت، فلو طفلك من ذوي القدرات الخاصة وبيواجه صعوبة مع للبيئة المحيطة، فالمكتبة بتوفرله أنشطة، زي جلسات التخاطب الفردية والجماعية وتنمية المهارات الحياتية، وموجود بعض الفيديوهات والأوراق التعليمية للأطفال ويقدر يحضرها ويتطلع عليها عن بُعد، وكمان بيتم تنظيم محاضرات إرشادية وتوعوية لأولياء الأمور والأطفال من خلال متخصصين.
6- زيارة مكتبة المواد الميكروفيلمية
الميكروفيلم أو الرقمنة هي أهم أنشطة مكتبة الإسكندرية، وهي عبارة عن الوسائل اللي بيتم استخدامها في حفظ صور المخطوطات والمطبوعات النادرة والوثائق الهامة؛ عشان نحافظ عليها من التلف أو الضياع، ونحافظ على كل ما هو قديم ونادر من المخطوطات في مختلف العلوم، زي:
- الصحف اليومية المصرية منذ تاريخ صدورها.
- الوثائق المختلفة.
- المخطوطات.
فممكن تزورها مع طفلك وتعرفوا أكتر عن مواد الميكروفيلم.
7- زيارة مكتبة الكتب النادرة والمجموعات الخاصة
لو طفلك من عشاق الإثارة والغموض فتقدر تزور مكتبة الكتب النادرة والمجموعات الخاصة، فالقاعة بتضم مجموعة ثرية من الكتب النادرة، والخرائط والمجموعات الخاصة، ففي أكثر من 15.000 كتاب نادر، بيرجع تاريخ طباعته لعام 1496 م، بالإضافة لأكثر من 700 دورية (54.000 عدد) و 66.000 من كتب المجموعات الخاصة.
أما بالنسبة للكتب النادرة فالمكتبة فيها كتب تم طبعها منذ عام 1920 م، بالإضافة لعدد من الكتب المهداة للمكتبة من قِبل كبار الشخصيات زي: مجموعة السلطان قابوس، ومجموعة الدكتور عبد الرزّاق السنهوري، ومجموعة الدكتور حسين هيكل، وغيرهم كتير. ومخطوطات للغات مُختلفة منها: العربية، والتركية،والفارسية.
8- زيارة مكتبة الخرائط
ولو طفلك من عشاق الجغرافيا تقدروا تزوروا سوا مكتبة الخرائط اللي بتضم حوالي 7 آلاف خريطة، وبتغطي جميع أنحاء العالم، واللي بتركز بشكل أكبر على مصر والدول العربية والدول المحيطة بالبحر المتوسط، ومن أهم مقتنياتها: خريطة الشريف الإدريسي اللي بيرجع تاريخها لعام 1154 م واللي كانت لكتاب (صورة الأرض).
9- زيارة قاعة البانوراما
قاعة البانوراما الحضارية هي عرض تفاعلي بيستعرض فيه التراث المصري من 5000 عام حتى الآن، بالاعتماد على الوسائط المتعددة. واللي بتركز أكتر على التراث الفرعوني والتراث القبطي والإسلامي، بطريقة شيقة ومبهرة من خلال 9 شاشات عرض.
10- زيارة متاحف المكتبة الجديدة
ممكن تزوروا متاحف المكتبة الجديدة اللي بتحتوي على 6 متاحف، وقطع أثرية لعصور مختلفة للحضارة المصرية منذ بدء العصر الفرعوني وحتى العصر الإسلامي، ومن تلك المتاحف:
متحف المخطوطات
هو أحد المراكز الأكاديمية المُلحقة بالمكتبة الجديدة، واللي بيحتوي على كتير من المخطوطات من مكتبة بلدية الاسكندرية، وبتضم 12 مركز للبحث الأكاديمى:
- برنامج دراسات التنمية المستدامة وبناء قدرات الشباب ودعم العلاقات الإفريقية.
- مركز دراسات الخطوط، مركز الدراسات والبرامج الخاصة.
- مركز توثيق التراث الحضاري والطبيعي ومقره القاهرة.
- مركز دراسات الإسكندرية وحضارة البحر المتوسط.
- برنامج دراسات المرأة والتحول الاجتماعي.
- مركز الإسكندرية للدراسات الهلينستية.
- المعهد الدولي للدراسات المعلوماتية.
- مركز دراسات الحضارة الإسلامية.
- مركز الدراسات الاستراتيجية.
- مركز الدراسات القبطية.
- مركز المخطوطات.
- مركز الفنون.
متحف الأوعية النادرة
أما عن متحف الأوعية النادرة فبيحتوي على مقتنيات محفوظة ثمينة جدا بالنسبة لمكتبة الإسكندرية ومنها:
- الإهداءات النفيسة المقدَّمة للمكتبة.
- المقتنيات الشخصية للمشاهير.
- المخطوطات الأصلية.
- العملات القديمة.
- الكتب النادرة.
- الخرائط.
القبة السماوية
بعد ما تخلص أنشطة مكتبة الإسكندرية، تقدر تزور مركز القبة السماوية العلمي هو قسم تابع لمكتبة الإسكندرية، بيهدف لتعزيز مفهوم المراكز العلمية بأنها أدوات لنشر التعليم، كمان بيعرض منظر رائع بيطل على مدينة الاسكندرية.
أوقات الزيارة في الأماكن المختلفة داخل مكتبة الإسكندرية
تقدروا تزوروا جميع الأنشطة دي وتقضوا وقتكوا وسط التعلم والترفيه، من خلال المواعيد دي:
القاعة الرئيسية
من الأحد إلى الخميس:10.00 صباحًا – 7.00 مساءً.
والسبت: 10.00 صباحًا – 2.00 ظهرًا.
الزيارات والمتاحف ومركز القبة السماوية العلمية
من الأحد إلى الخميس: 9.30 صباحًا – 5.00 مساءً.
والسبت: 10.00 صباحًا – 2.00 ظهرًا.
مكتبة الطفل والنشء
من الأحد إلى الخميس: 9.30 صباحًا – 4.00 عصرًا.
والسبت: 10.00 صباحًا – 2.00 ظهرًا
مكتبة طه حسين للمكفوفين
من الأحد إلى الخميس: 9.30 صباحًا – 4.00 عصرًا.
أسعار تذكرة دخول مكتبة الإسكندرية
المصرين: 5 جنيهات.
أصحاب المعاشات: 3 جنيهات.
طلبة المدارس: جنيه واحد.
السياح (الغير المصريين): 70 جنيهًا.
طلبة الجامعات والمدارس غير المصريين: 10 جنيهات.
وبكده دي تكون أهم أنشطة مكتبة الإسكندرية، يمكن لطفلك فعلها عند زيارتها، تقدر تشاركه فيها وتقضي معاه وقت كافي، تتعلموا وتستمتعوا فيه سوا.
أضف تعليق